اسلام آباد: بجٹ 25-2024 کی تیاریاں زور و شور سے جاری ہیں، آئندہ بجٹ میں تاجر دوست ایپ میں شامل نہ ہونے والوں کے خلاف بھی کارروائیوں کا امکان ہے۔
وزارت خزانہ کے ذرائع کے مطابق آئندہ بجٹ میں تاجر دوست ایپ میں شامل نہ ہونے والوں کو نوٹس بھیجے جائیں گے، جرمانے بھی عائد کیے جا سکتے ہیں۔
ذرائع کا کہنا ہے کہ غیر رجسٹرڈ کاروبار کے خلاف انکم ٹیکس آرڈیننس سیکشن 182 کے تحت کارروائی ہو سکتی ہے، تاجر دوست ایپ نہ لینے والے غیر رجسٹرڈ کاروبار پر 10 ہزار روپے جرمانہ عائد ہو سکتا ہے۔
آئندہ بجٹ میں نان فائلرز کے بینکوں سے کیش نکلوانے پر مزید ٹیکس لگانے کی تجویز بھی ہے، نان فائلرز کے بینکوں سے 50 ہزار روپے سے زائد رقم نکالنے پر 0.6 فی صد ایڈوانس ٹیکس عائد ہے، آئندہ بجٹ میں کیش نکالنے پر ٹیکس کی شرح 0.9 فی صد کرنے کی تجویز ہے۔
آئی ایم ایف کا بڑا مطالبہ ، پاکستانی عوام تیاری کرلیں!
ذرائع کے مطابق نان فائلرز کے کیش نکالنے پر ایڈوانس ٹیکس کی مد میں مزید 15 ارب روپے سے زائد جمع کرنے کا تخمینہ لگایا گیا ہے، آئندہ بجٹ میں غیر ضروری اور لگژری اشیا کی امپورٹ پر ٹیکس بڑھانے کی بھی تجویز ہے۔
1300 سی سی سے زائد کی امپورٹ گاڑیوں پر ٹیکس بڑھنے کا امکان ہے، 850 سی سی سے زائد کی تمام نئی گاڑیوں پر ود ہولڈنگ ٹیکس بڑھانے کی تجویز ہے، غیر ضروری اور لگژری آئٹمز پر ڈیوٹی بڑھائے جانے کا امکان ہے، اور چھٹے شیڈول میں موجود ٹیکس رعایتیں کم کرنے پر بھی غور کیا جا رہا ہے۔
