پڑوسی ملک بھارت کی جانب سے پاکستان کے خلاف سندھ طاس معاہدے کی معطلی کے اعلان کے ذریعے اشتعال انگیزی کے نتیجے میں بھارتی پروازیں غیر معمولی تاخیر کا شکار ہونے لگی ہیں۔
تفصیلات کے مطابق سندھ طاس معاہدے کی معطلی کے اعلان کے بعد پاکستان کی جانب سے بھارت کو کرارا جواب دیا گیا اور پاکستانی فضائی حدود بند کر دی گئیں، جس کی وجہ سے بھارتی ایئر لائنز کا فلائٹ آپریشن بری طرح متاثر ہو گیا ہے، اور تاحال سنبھل نہیں سکا ہے۔
طویل فاصلوں سے دہلی امرتسر آمد کی 33 پروازوں میں 2 سے 9 گھنٹے کی تاخیر ہوئی، نجی ایئر کی دہلی الماتے کی پروازیں 6 ای 801، 6 ای 802 آج تیسرے روز بھی منسوخ کی گئیں، بھارتی نائب صدر کو روم سے دہلی واپس لے جانے والی خصوصی پرواز کو بھی طویل مسافت طے کرنی پڑی۔
پی آئی اے کی پرواز بھارت کی بجائے چین کی فضائی حدود استعمال کرے گی
نیویارک، ٹورنٹو، ویانا، لندن سے دہلی کی 8 پروازوں میں 3 سے 9 گھنٹے تاخیر ہوئی، دمام، فرینکفرٹ، برمنگھم، پیرس، میلان سے دبئی کی پروازیں بھی تاخیر کا شکار ہوئیں، ایمسٹرڈم، کوپن ہیگن، واشنگٹن، شکاگو سے دہلی کی پروازوں میں غیر معمولی تاخیر ہوئی۔
تبلیسی، پیرس، جدہ، دوحہ، تاشقند سے دہلی کی پروازوں میں بھی 2 سے 7 گھنٹے تاخیر ہوئی، جب کہ طویل روٹ سے لندن اور دبئی سے امرتسر کی پروازوں میں بھی 2 گھنٹے تک تاخیر ہوئی ہے۔
