واشنگٹن: امریکی فوج نے عراق اور شام میں ایرانی حمایت یافتہ ملیشیا پر فضائی حملے کیے ہیں۔
تفصیلات کے مطابق امریکی وزیر دفاع نے کہا ہے کہ امریکی فوج نے عراق اور شام میں ایرانی حمایت یافتہ ملیشیا پر فضائی حملے کیے ہیں، ان فضائی حملوں میں اہداف کو کام یابی کے ساتھ نشانہ بنایا گیا۔
امریکی وزیر دفاع مارک ایسپر کے مطابق کتیب حزب اللہ کے اسلحہ ڈپو سمیت 5 ٹھکانوں پر فضائی حملے کیے گئے، صدر ٹرمپ کو بھی کام یاب کارروائی سے متعلق بریفنگ دی گئی۔ ایران کے خلاف مزید اقدامات کا عندیہ دیتے ہوئے مارک ایسپر نے کہا کہ امریکا ایران کے خلاف مزید کارروائیوں کے لیے بھی تیار ہے۔
امریکی دفاعی حکام کے مطابق فضائی حملوں میں ایئر فورس کے F-15 جیٹ فائٹرز نے حصہ لیا۔
خیال رہے کہ ہفتے کو عراق کے شہر کرکوک میں حملے میں امریکی سیکورٹی کنٹریکٹر ہلاک ہو گیا تھا اور 4 فوجی زخمی ہوئے تھے، امریکا نے اس راکٹ حملے کا الزام کتیب حزب اللہ پر لگایا تھا۔ امریکا نے راکٹ حملے کے لیے ایران کو جوابی کارروائی کی دھمکی بھی دی تھی۔
یاد رہے کہ رواں ماہ کے دوسرے ہفتے میں امریکا اور ایران نے تعلقات میں شدید تناؤ کے باوجود ایک اچھا قدم اٹھاتے ہوئے قیدیوں کا تبادلہ کیا تھا، ایران نے چینی نژاد امریکی اسکالر جب کہ امریکا نے ایک ایرانی سائنس دان کو رہا کیا تھا۔ ایران کے وزیر خارجہ محمد جواد ظریف نے قیدیوں کے تبادلے کا اعلان کرتے ہوئے اس پر خوشی کا اظہار کیا تھا جب کہ چند گھنٹوں بعد امریکی صدر ڈونلڈ ٹرمپ نے ٹویٹر پر اپنے پیغام میں لکھا: ’انتہائی مناسب مذاکرات پر ایران کا شکریہ۔ دیکھا ہم مل کر ڈیل کر سکتے ہیں۔‘
