Tag: تاپسی پنو

بالی ووڈ کی معروف اداکارہ تاپسی پنو نے بھارتی میڈیا پر اپنی شادی کے بارے میں پھیلی افواہوں پر خاموشی توڑ دی۔

اداکارہ تاپسی پنو سے متعلق چند ماہ سے یہ خبریں گردش کررہی تھیں کہ وہ اپنے بوائے فرینڈ اور سابق بیڈ منٹن کھلاڑی میتھیاس بوئے سے مارچ کے آخر میں شادی کرنے والی ہیں۔

حالیہ انٹرویو میں تاپسی پنو نے کہا کہ ہمارے معاشرے میں کسی بھی انسان کی پرائیویسی کو نظر انداز کرتے ہوئے اس کی ذاتی زندگی ے بارے میں جاننے کے لیے اس پر دباؤ ڈالنا ایک عام بات ہے۔

36 سالہ اداکارہ نے کہا کہ میں جب بھی شادی کرنے کا فیصلہ کروں گی تو وہ فیصلہ میری اپنی شرائط پر ہوگا اور میں اپنی زندگی کے بارے میں کوئی بھی بات دوسروں کو اس طرح دباؤ میں نہیں بلکہ مناسب وقت پر بتاتی ہوں۔

تاپسی پنو نے کہا کہ میں ایک دن شادی ضرور کروں گی اور جب بھی کروں گی آپ کو اس کے بارے میں پتا چل جائے گا اگر مجھے اس کے لیے صحیح جگہ اور لمحہ ملا تو میں خود اس بارے میں بات کروں گی۔

اداکارہ نے کہا کہ ایسا نہیں ہے کہ میں کسی کو دھوکا دے رہی ہوں، ایسا نہیں ہے کہ میں کوئی غیر قانونی کام کررہی ہوں، تو پھر یہ سب قیاس آرائیاں کیوں کی جارہی ہیں۔

تاپسی پنو نے کہا کہ میں فی الحال سنگل ہوں، میں اپنے رشتے سے متعلق بہت ایماندار ہوں ایسا نہیں ہے کہ میں نے اسے چھپایا ہو، اس لیے جب بھی یہ شادی ہوگی آپ کو معلوم ہوجائے گا۔