مظفر آباد: وزیر اعظم آزاد کشمیر راجہ فاروق حیدر کا کہنا ہے کہ ایل او سی پر بسنے والوں کے لیے وفاق کے تعاون سے منصوبہ منظور ہو چکا، آزاد کشمیر کے عوام اپنی پاک فوج کے ساتھ کھڑے ہیں۔
تفصیلات کے مطابق وزیر اعظم آزاد کشمیر راجہ فاروق حیدر لائن آف کنٹرول پر تتہ پانی سیکٹر پہنچے۔ اس موقع پر ان کا کہنا تھا کہ ایل او سی پر بسنے والے بہادر کشمیریوں کو سلام پیش کرتا ہوں۔
وزیر اعظم آزاد کشمیر کا کہنا تھا کہ پاک فوج ہمارا مان ہے، کشمیری پاک فوج کے شانہ بشانہ ہیں۔ ایل او سی پر بسنے والوں کے لیے وفاق کے تعاون سے منصوبہ منظور ہو چکا۔
انہوں نے کہا کہ جارحیت کی گئی تو آزاد کشمیر کو بھارتی فوج کا قبرستان بنا دیں گے، آزاد کشمیر کے عوام اپنی پاک فوج کے ساتھ کھڑے ہیں۔ بھارت نے جنگ مسلط کی تو پاک فوج کے شانہ بشانہ لڑیں گے۔
راجہ فاروق حیدر کا مزید کہنا تھا کہ کنٹرول لائن پر بسنے والوں کو ان کی دہلیز پر سہولتیں فراہم کریں گے۔
دوسری جانب وزیر خارجہ شاہ محمود قریشی کا کہنا ہے کہ بھارت میں مسلمانوں کو تیسرے درجے کا مقام دیا جارہا ہے، مقبوضہ کشمیرمیں اس وقت کوئی مریض اسپتال نہیں پہنچ سکتا۔ مقبوضہ وادی کو بھارت نےجیل میں تبدیل کردیا ہے۔
انہوں نے کہا تھا کہ مقبوضہ کشمیر میں انسانیت کو چار دیواروں تک محدود کردیا گیا، آج مودی کی سوچ پوری دنیا کو اپنا اصل چہرہ دکھا رہی ہے۔ دنیا کہہ رہی ہے بھارتی اقدامات عالمی قوانین کی خلاف ورزی ہے۔
