واشنگٹن: امریکی وزیر تجارت ولبر روس کا کہنا ہے کہ چین اور امریکا کے درمیان جاری تجارتی جنگ کے خاتمے کے ابھی امکانات کم ہیں۔
تفصیلات کے مطابق چین اور امریکا کے درمیان کئی مہینوں سے تجارتی جنگ جاری ہے، دونوں ممالک کی جانب سے ایک دوسرے کی درآمدات پر اضافی محصولات بھی عائد کیے جاچکے ہیں۔
امریکی وزیر تجارت نے نجی ٹی وی کو انٹرویو دیتے ہوئے کہا کہ اس تجارتی جنگ میں فریقین کے درمیان اختلافات ہیں، اور بہت سے مسائل بھی درپیش ہیں۔
ان کا کہنا تھا کہ امریکا اور چین تجارتی اختلافات ختم کرنے کے سلسلے میں ابھی میلوں دوری پر کھڑے ہیں، دونوں ممالک نے اس بابت متوقع اقدامات کیے لیکن مسئلے کا خاتمہ ممکن نظر نہیں آتا۔
ولبر روس نے امکان ظاہر کیا ہے کہ مذاکرات کے نئے دور میں دونوں ملک کسی ڈیل پر پہنچ سکتے ہیں، فریقین کے درمیان رواں ماہ ہونے والی ملاقات سود مند ثابت سکتی ہے۔
چین امریکا تجارتی جنگ، دونوں فریقین نے ملاقات کا عندیہ دے دیا
دوسری جانب 30 رکنی چینی وفد رواں ماہ 30 اور 31 کے درمیانی شپ تجارتی جنگ کے خاتمے کے لیے امریکی دارالحکومت واشنگٹن پہنچ رہا ہے، امریکی حکومتی عہدیداروں سے ملاقاتیں ہوں گی۔
خیال رہے کہ دونوں ممالک کی کوشش ہے کہ یکم مارچ سے قبل تجارتی تنازعے کے حوالے سے کسی ڈیل کو حتمی شکل دی جا سکے، چینی دارالحکومت بیجنگ میں منعقدہ ایسے ہی سابقہ مذاکراتی دور کو مثبت قرار دیا گیا تھا۔
