ARYNews.tv | Urdu – Har Lamha Bakhabar

Tag: تجاوزات کیخلاف آپریشن

  • اے آر وائی کی خبر پر ایکشن، وزیراعلیٰ کا سوات میں تجاوزات کیخلاف آپریشن دوبارہ شروع کرنیکا حکم

    اے آر وائی کی خبر پر ایکشن، وزیراعلیٰ کا سوات میں تجاوزات کیخلاف آپریشن دوبارہ شروع کرنیکا حکم

    اے آر وائی نیوزکی خبر پر ایکشن لیتے ہوئے وزیراعلیٰ نے سوات میں تجاوزات کیخلاف آپریشن فوری دوبارہ شروع کرنے کا حکم دیدیا۔

    تفصیلات کے مطابق دریائے سوات کے کنارے تجاوزات کےخلاف آپریشن کو سیاسی مداخلت کے باعث روک دیا گیا تھا، تاہم اب وزیراعلیٰ علی امین گنڈاپور نے مذکورہ آپریشن فوری طور پر دوبارہ شروع کرنے کے احکامات دیے ہیں۔

    وزیراعلیٰ کےپی کے ترجمان نے کہا کہ تجاوزات کیخلاف آپریشن میں کوتاہی برداشت نہیں کی جائےگی، کسی بھی شخصیت کی تجاوزات ہوں تو ان کو مسمار کیا جائےگا۔

    سوات: بااثر سیاسی شخصیات کی تعمیرات تک پہنچنے پرآپریشن روک دیاگیا

    ترجمان نے کہا کہ کسی افسر نے کوتاہی برتی تو اس کو بھی نہیں بخشا جائےگا، 10منٹ میں آپریشن دوبارہ شروع کرنے کا حکم دیا ہے۔

    سوات میں تجاوزات کیخلاف آپریشن میں سیاسی اثرو رسوخ آڑے آیا، بااثر سیاسی شخصیات کی تعمیرات تک پہنچنے پر آپریشن روک دیا گیا تھا۔

    تجاوزات کے خلاف جاری آپریشن بااثر سیاسی شخصیات کی وجہ سے روکا گیا تھا، 4 گھنٹے انتظار کے بعد کارروائی روکنے کا کہا گیا اور تجاوزات کےخلاف آپریشن کرنے والی ٹیموں کو واپس جانے کی ہدایت کی گئی۔

    کمشنر ملاکنڈ کی زیرصدارت 3 گھنٹے جاری اجلاس بھی بےنتیجہ ختم ہوا، سیاسی شخصیت کی تعمیرات پر اجلاس کے شرکا کی مختلف رائے تھی۔

    https://urdu.arynews.tv/anp-plaintiff-murder-case-should-registered-cm-gandapur/

  • گلستان جوہر میں تجاوزات کیخلاف آپریشن، شرپسند عناصر نے رینجرز اور پولیس پر گولیاں برسادیں

    گلستان جوہر میں تجاوزات کیخلاف آپریشن، شرپسند عناصر نے رینجرز اور پولیس پر گولیاں برسادیں

    کراچی : گلستان جوہر میں تجاوزات کیخلاف آپریشن کے دوران علاقہ میدان جنگ بن گیا، شرپسند عناصر نے رینجرز اور پولیس پر گولیاں برسادیں۔

    تفصیلات کے مطابق کراچی کے علاقے گلستان جوہر بلاگ گیارہ میں عدالتی حکم پر  تجاوزات کیخلاف آپریشن شروع ہوا تو اینٹی انکروچمنٹ عملے کو مزاحمت کا سامنا کرنا پڑا۔

    پولیس اورمظاہرین آمنے سامنے آگئے اور صورتحال کشیدہ ہوگئی، اس دوران شرپسندوں نے اینٹی انکروچمنٹ عملے پر حملہ کردیا۔

    شرپسند عناصرکی جانب سے رینجرز اور پولیس پر شدید فائرنگ کی گئی جبکہ مشتعل مظاہرین کی جانب سے پتھراؤ اور احتجاج کا سلسلہ جاری رہا۔

    مشتعل مظاہرین نے ٹائروں کو بھی آگ لگا دی ، پتھراؤ سے آج ٹی وی کی گاڑی کو بھی نقصان پہنچا جبکہ متعدد افراد بھی زخمی ہوگئے۔

    آپریشن کے دوران محرر گلستان جوہر عاصم اورایس ایچ او اینٹی انکروچمنٹ احمد بھی  پتھراؤ سے زخمی ہوئے ، جنہیں اسپتال منتقل کردیا گیا۔

    کشیدہ صورتحال کے باعث پولیس ، رینجرز اور کے ڈی اے کا عملہ پیچھے ہٹ گیا، پولیس کو نفری اور ہتھیاروں کی کمی کا سامنا تھا۔

    پولیس کا کہنا ہے کہ ہم پر براہِ راست گولیاں چلائی گئیں، جب تک آپریشن مکمل نہں ہوجاتا پولیس علاقے میں موجود رہے گی، شر پسندوں کو گرفتارکررہی ہے۔

  • کراچی : سرجانی میں تجاوزات کیخلاف آپریشن میں مختیار کار کی ہلاکت کے واقعے کا مقدمہ درج

    کراچی : سرجانی میں تجاوزات کیخلاف آپریشن میں مختیار کار کی ہلاکت کے واقعے کا مقدمہ درج

    کراچی : سرجانی میں تجاوزات کیخلاف آپریشن میں مختیارکار کی ہلاکت کے واقعے کا مقدمہ درج کرلیا گیا ، مقدمے میں قتل اور اقدام قتل دہشت گردی و دیگر دفعات شامل کی گئیں۔

    تفصیلات کے مطابق کراچی کے علاقے سرجانی میں تجاوزات کیخلاف آپریشن میں مختیارکار کی ہلاکت کے واقعے کا مقدمہ منگھو پیر تھانے میں مختیار کار یار محمد کی مدعیت میں درج کرلیا گیا۔

    پولیس کا کہنا ہے کہ مقدمہ قتل اور اقدام قتل دہشت گردی و دیگر دفعات کے تحت درج کیا گیا۔

    مدعی مقدمے نے کہا کہ میں اور دیگرافسران شرافی گوٹھ تجاوزات کیخلاف آپریشن کیلئےپہنچےتھے، ہمارےساتھ اینٹی انکروچمنٹ فورس اورعلاقہ پولیس بھی موجود تھی۔

    ایف آئی آر میں کہا گیا کہ اینٹی انکروچمنٹ فورس نےکارروائی شروع کی تو اچانک ہنگامہ آرائی ہوگئی، لینڈگریبر امان، نبی بخش ، بخت شیر، بلاول، شیر علی ساتھیوں سمیت آئے۔

    مدعی نے بتایا کہ لینڈ گریبر ندیم اور امتیاز و دیگر40لینڈ گریبرموجود تھے، ہنگامہ آرائی کےدوران پتھراؤکےبعدفائرنگ کی گئی، فائرنگ سےمیں اور مختیارکار منگھوپیر اعجازچانڈیو زخمی ہوئے۔

    مدعی مقدمے کے مطابق اس دوران تپہ داراورمشین آپریٹر عالم شاہ بھی گولیاں لگنےسےزخمی ہوئے ، نامزد ملزمان اور ان کے ساتھیوں کے خلاف کارروائی کی جائے۔

  • کراچی : تجاوزات کیخلاف آپریشن کا جمعرات سے دوبارہ آغاز، کے ایم سی نے کمر کس لی

    کراچی : تجاوزات کیخلاف آپریشن کا جمعرات سے دوبارہ آغاز، کے ایم سی نے کمر کس لی

    کراچی : گلشن اقبال میں تجاوزات کے خلاف آپریشن کا آغاز کراچی میونسپل کارپوریشن جمعرات سے کرے گی، اس موقع پر پولیس اور رینجرز کی بھاری نفری بھی موجود ہوگی۔

    تفصیلات کے مطابق شہر کے مختلف علاقوں میں تجاوزات کے خلاف آپریشن کا دوسرا مرحلہ3جنوری کو شروع ہوگا، دوسرے مرحلے میں کے ایم سی اینٹی انکروچمنٹ سیل نے گلشن اقبال کا انتخاب کرلیا۔

    سینئر ڈائریکٹر اینٹی انکروچمنٹ سیل بشیر صدیقی نے کسی بھی ناخوشگوار واقعے سے نمٹنے کیلئے ڈی سی ایسٹ، رینجرز اور پولیس کو خط لکھ دیا ہے، خط میں گلشن اقبال بلاک11میں آپریشن کیلئے پولیس اوررینجرز کی نفری طلب کی گئی ہے۔

    اس حوالے سے ڈائریکٹر بشیر صدیقی کا کہنا ہے کہ مذکورہ آپریشن کا فیصلہ مکینوں کی مسلسل شکایات پر کیا گیا ہے، اس سے پہلے بھی اس علاقے میں تجاوزات کے خلاف آپریشن کیے گئے ہیں۔

    مزید پڑھیں: کراچی، وفاقی حکومت کا تجاوزات کے خلاف آپریشن میں غیر قانونی گھر نہ گرانے کا فیصلہ

    ان کا مزید کہنا تھا کہ ماضی میں آپریشن ہوئے وہ سیاسی مداخلت اور بااثر افراد کی پشت پناہی کے باعث کامیاب نہیں ہوسکے تھے، اس لیے دوران آپریشن ممکنہ مزاحمت کے پیش نظر پولیس اور رینجرز کی نفری کو طلب کیا گیا ہے۔

  • تجاوزات کیخلاف آپریشن : پہلوان گوٹھ میں تجاوزات کا خاتمہ، شہری ملبے کے ڈھیر سے پریشان

    تجاوزات کیخلاف آپریشن : پہلوان گوٹھ میں تجاوزات کا خاتمہ، شہری ملبے کے ڈھیر سے پریشان

    کراچی : شہر قائد میں تجاوزات کے خلاف نان اسٹاپ آپریشن جاری ہے، پہلوان گوٹھ میں دو کلومیٹر کے علاقے میں تجاوزات کا خاتمہ کیا گیا، شہری سڑکوں پر پڑے ملبے سے پریشان ہوگئے۔

    تفصیلات کے مطابق پانچ نومبر سے شروع کیا گیا تجاوزات کے خلاف کے ایم سی کا نان اسٹاپ آپریشن جاری ہے، کراچی کےعلاقے پہلوان گوٹھ میں رات گئے انتظامیہ کی بھاری مشینری نے دو کلومیٹر کے علاقے میں تجاوزات کے خلاف کارروائی کی۔

    کراچی کے شہری تجاوزات کے خاتمے پر خوش تو ہوئے تھے مگر اس خوشی پر ملبے کا ڈھیر چھا گیا۔ ترجمان کے ایم سی کے مطابق ایمپریس مارکیٹ سے ایک لاکھ ٹن ملبہ بحریہ ٹاؤن کی مدد سے اٹھایا گیا، بلدیہ عظمیٰ نےملبہ اٹھانے کیلئے حکومت سندھ سے فنڈ بھی مانگا ہے۔

    ترجمان کا کہنا ہے کہ اٹھارہ ہزار غیر قانونی تعمیرات اور تجاوزات کا خاتمہ کیا گیا۔ سات ہزار ایک سو تراسی دکانیں، تین ہزارتین سونوے وال فکسنگ دکانیں، آٹھ ہزار سن شیڈ ز، بارہ ہزار چبوترے ،پانچ ہزار کیبن اور دو غیر قانونی شادی لان مسمار کیے گئے۔

    ترجمان کے ایم سی کے مطابق ایمپریس مارکیٹ سے ایک لاکھ ٹن ملبہ بحریہ ٹاؤن کی مدد سے اٹھایا گیا ۔تاہم ملبہ شہر کے اٹھارہ سے زائد علاقوں میں اب بھی موجود ہے ۔ترجمان کےمطابق بلدیہ عظمیٰ کراچی نے ملبہ اٹھانے کیلئے حکومت سندھ سے فنڈز بھی مانگا ہے۔

  • تجاوزات کیخلاف آپریشن : سندھ حکومت کی سپریم کورٹ میں نظرثانی کی درخواست دائر

    تجاوزات کیخلاف آپریشن : سندھ حکومت کی سپریم کورٹ میں نظرثانی کی درخواست دائر

    کراچی : سندھ حکومت نے کراچی میں تجاوزات کے خلاف آپریشن پرنظرثانی کیلئے فوری سماعت کی درخواست دائر کردی، درخواست کی سماعت آئندہ ہفتے ہونے کا امکان ہے۔

    تفصیلات کے مطابق سپریم کورٹ کے احکامات پر کراچی میں جاری تجاوزات کے خاتمے کے خلاف کارروائی زور شور سے جاری ہے، کارروائی کے بعد پیدا ہونے والی صورتحال پر سندھ حکومت کو شدید مخالفت کا سامنا کرنا پڑرہا ہے۔

    جس کو مد نظر رکھتے ہوئے سندھ حکومت نے کراچی میں تجاوزات کےخلاف آپریشن پرنظرثانی کی درخواست سپریم کورٹ میں دائر کردی ہے، درخواست میں عدالت سے فوری سماعت کی استدعا کی گئی ہے۔

    اس حوالے سے ذرائع کا کہنا ہے کہ معاملے کی حساسیت کے پیش نظر فوری سماعت کی درخواست کی گئی ہے، فوری سماعت سے متعلق درخواست کی سماعت آئندہ ہفتے ہونے کا امکان ہے، منگل کوچیف جسٹس کی سربراہی میں لارجربینچ مقدمات کی سماعت کرے گا۔

    سندھ حکومت نے درخواست میں مؤقف اختیار کیا ہے کہ حالیہ تجاوزات آپریشن میں انسانی ہمدردی کو مدنظر رکھا جائے، کارروائی سے غریب طبقہ بھی بےروزگار ہورہا ہے، سندھ حکومت تجاوزات کیخلاف آپریشن میں ہرممکن مدد کو تیار ہے، تاہم تجاوزات آپریشن بہتر اور منظم انداز میں کرنے کی ضرورت ہے۔

    سپریم کورٹ حالیہ تجاوزات آپریشن کے حکم پر نظرثانی کرے، سندھ حکومت کا کہنا ہے کہ تجاوزات آپریشن سے پہلے لوگوں کو متبادل جگہ فراہم کرنا ہوگی، ہماری جانب سے متاثرین کو متبادل گھر اور دکانیں دینے کا کام کیا جارہا ہے۔

  • کراچی : تجاوزات کیخلاف آپریشن جاری، دکانوں کے ملبے پر پھر پتھارے لگ گئے

    کراچی : تجاوزات کیخلاف آپریشن جاری، دکانوں کے ملبے پر پھر پتھارے لگ گئے

    کراچی : شہر قائد میں غیر قانونی تعمیرات  اور تجاوزات کے خلاف نان اسٹاپ گرینڈ آپریشن جاری ہے تو دوسری جانب ملبے کے ڈھیر پر پھر پتھارے لگنا شروع ہوگئے۔

    تفصیلات کے مطابق کراچی میں ایک ماہ سے تجاوزات کے خاتمے کے لئے کےایم سی کا گرینڈ آپریشن بھرپور طریقے سے جاری ہے، اولڈ سٹی ایریا سمیت کراچی کے مختلف علاقوں میں غیر قانونی تعمیرات اور پتھارے ہٹائے جارہے ہیں۔

    ایک طرف تجاوزات کا خاتمہ تو دوسری طرف ملبے کے ڈھیر لگ گئے ہیں، لائٹ ہاؤس میں کے ایم سی کے ہیڈ آفس کے قریب ٹوٹی ہوئی دکانوں کے ملبے پر پھرسے پتھارے لگنا شروع ہوگئے۔

    علاوہ ازیں ایم سی کا عملہ ہیوی مشینری کے ساتھ اولڈ سٹی ایریا کھجور بازار پہنچا، تنگ گلیوں کے باعث آپریشن میں کارروائی میں مشکلات درپیش رہیں۔

    مزید پڑھیں: انسداد تجاوزات آپریشن، متاثرین کو متبادل فراہم کیا جائے گا، میئر کراچی

    بلدیہ عظمیٰ کراچی کی جانب سے اولڈ سٹی ایریا کے علاقے جوڑیا بازار اور برتن گلی میں آپریشن کیا جائے گا۔ ضلع وسطی اور ضلع غربی میں بھی فٹ پاتھوں، پارکس اور گراؤنڈز میں قائم تجاوزات کے خلاف کارروائی کی جائے گی۔

  • تجاوزات کیخلاف آپریشن : صدر کے متاثرین کو متبادل جگہ دیں گے، وسیم اختر

    تجاوزات کیخلاف آپریشن : صدر کے متاثرین کو متبادل جگہ دیں گے، وسیم اختر

    کراچی : میئر کراچی وسیم اختر نے کہا ہے کہ شہر کی تعمیر میں پختون بھائیوں کا خون پسینہ شامل ہے، کچھ لوگ صدر میں تجاوزات کے خلاف کارروائی پر سیاست کر رہے ہیں، متاثرین کو متبادل جگہ دی جائے گی۔

    ان خیالات کا اظہار انہوں نے کراچی میں میڈیا سے گفتگو کرتے ہوئے کیا،اس موقع پر صوبائی وزیر بلدیات سعید غنی بھی موجود تھے،  وسیم اختر نے کہا کہ ہم سپریم کورٹ کے احکامات پر عملدرآمد کروارہے ہیں، صدر میں تجاوزات کے خلاف ہونے والے آپریشن سے متاثرہ افراد کو متبادل جگہ دینے کیلئے حکومت سندھ غور کررہی ہے۔

    انہوں نے بتایا کہ 30 سے35 سال قبل ایک معاہدے کے تحت چار بائی چار کی جگہ دی گئی تھی جو اب چار سو تک پہنچ گئی، کچھ لوگوں نے سرکاری اراضی پر قبضہ کرکے کئی منزلہ عمارتیں بنالی تھیں، اب ان  متاثرین کو متبادل جگہ فراہم کی جائے گی لیکن قبضہ مافیا سے کوئی بات نہیں ہوگی۔

    میئرکراچی کا مزید کہنا تھا کہ کامیاب کارروائی کے بعد ایمپریس مارکیٹ کے چاروں طرف قائم تجاوزات کا صفایا کردیا گیا ہے، صدر کی صفائی پہلا فیز ہے، دوسرے فیز میں متاثرین کو جگہ دی جائے گی، اس کے علاوہ شہربھر تجاوزات کے خلاف آپریشن شروع کریں گے۔

    کراچی ایمپریس مارکیٹ سے تجاوزات کا خاتمہ: 50 سال بعد تاریخی عمارت کی دھلائی

    واضح رہے کہ کراچی کے دل صدر میں تجاوازات کے خاتمہ کے بعد ایمپریس مارکیٹ نکھر گئی اور اس کی اصلی شکل نکلی آئی، عام شہریوں کے ساتھ ساتھ غیر ملکی بھی تاریخی عمارت کی تعریف کئے بغیر رہ نہ سکے۔

    بیلجئم سے آئے ہوئے سیاحوں نے مارکیٹ کا دورہ کیا اور اس کی خوبصورتی کی تعریف کی، سیاحوں کا کہنا ہے اس تاریخی مارکیٹ کو تزئین و آرائش کی ضرورت ہے، ایمپریس مارکیٹ کی دھلائی دیکھ کر شہریوں کا دل اور بھی خوش ہوگیا۔

  • پنجاب میں تجاوزات کیخلاف آپریشن: ن لیگ کا سٹی میئر قبضہ مافیا کا کارندہ نکلا

    پنجاب میں تجاوزات کیخلاف آپریشن: ن لیگ کا سٹی میئر قبضہ مافیا کا کارندہ نکلا

    فیصل آباد / ملتان / گوجرانوالہ : پنجاب کے مختلف شہروں میں تجاوزات اور قبضہ مافیا کے خلاف آپریشن جاری ہے، ن لیگ کے سٹی میئر خود قبضہ مافیا نکلا، آپریشنز میں کروڑوں روپے کی سرکاری زمین واگزار کرالی گئی۔

    تفصیلات کے مطابق وزیر اعلیٰ پنجاب سردار عثمان بزدار کی ہدایت پر صوبے کے مختلف شہروں فیصل آباد، ملتان اور گوجرانوالہ میں سرکاری زمینوں پر قبضہ کرنے والوں کے خلاف آپریشن کا سلسلہ جاری ہے۔

    اس دوران قبضہ مافیا نے انتظامیہ کے خلاف نعرے بازی کی، پولیس نے کار سرکار میں مداخلت پر دو افراد کو گرفتار کرلیا۔ فیصل آباد میں ن لیگ کے سٹی میئر ملک رزاق کی زیر قبضہ سرکاری اراضی واگزار کرالی گئی۔

    ضلعی انتظامیہ کے مطابق سٹی میئر نے نڑوالا روڈ پر سترہ کنال اراضی پر قبضہ کر رکھا تھا، گوجرانوالہ میں انتظامیہ سرکاری اسکول کی اراضی کو قبضہ مافیا سے واگزار کرانے پہنچی تو اسے مزاحمت کا سامنا کرنا پڑا، پولیس نے دو افراد کو حراست میں لے لیا۔

    مزید پڑھیں: تجاوزات کے خلاف آپریشن کی خود مانیٹرنگ کررہا ہوں‘عثمان بزدار

    بااثر افراد نے پچاس سال سے زائد عرصے سے سرکاری اسکول کی اراضی پرقبضہ کررکھا تھا، ملتان کے علاقے گلگشت گول باغ چوک پر غیرقانونی طور پر تعمیر کی گئی، مارکیٹ مسمار کردی گئی۔

    مزید پڑھیں: انسداد تجاوزات مہم، خرم دستگیر کا غیرقانونی پیٹرول پمپ گرادیا گیا

    اراضی کی مالیت کروڑوں روپے بتائی گئی ہے موجودہ پنجاب حکومت اب تک قبضہ مافیا سے اربوں روپے کی زمین واپس لے چکی ہے۔

  • کراچی : شاہراہ قائدین پر تجاوزات کیخلاف گرینڈ آپریشن، کیبن اور پتھارے ضبط

    کراچی : شاہراہ قائدین پر تجاوزات کیخلاف گرینڈ آپریشن، کیبن اور پتھارے ضبط

    کراچی : محکمہ انسداد تجاوزات کی ٹیم نے شاہراہ قائدین پر گرینڈ آپریشن کرکے فٹ پاتھ پر موجود کیبن اور پتھارے ضبط کرلیے جبکہ کئی فٹ باہر نکلے شیڈز کو بھی گرا دیا گیا۔

    تفصیلات کے مطابق کراچی میں محکمہ انسداد تجاوزات سیل عدالتی حکم کے بعد ایکشن میں آگیا، ٹیم نے پولیس کی بھاری نفری اور مشینری کے ساتھ شاہراہ قائدین کے سروس روڈ پر قائم تجاوزات کے خلاف گرینڈ آپریشن کرتے ہوئے فٹ پاتھ پر موجود کیبنوں اور پتھاروں کو اٹھا لیا۔

    اس موقع پر موجود افراد نے کچھ مزاحمت کی کوشش کی جسے پولیس نے کنٹرول کرلیا۔، انتظامیہ نے کچھ افراد کو پیر تک تجاوزات ہٹانے کی مہلت دے دی۔

    آپریشن کے دوران کئی فٹ باہر نکلے شیڈز کو بھی باھری مشینری کے ذریعے نکال دیا گیا، فٹ پاتھ پر موجود پتھارے اور کیبن بھی اٹھا لیے گئے۔

    آپریشن کےدوران کوئی گرفتاری عمل میں آئی نہ ہی کوئی جرمانہ کیا گیا، بیشترافراد کی جانب سے پیر تک کی مہلت مانگنے پر انسداد تجاوزات سیل نے آپریشن پیر تک ملتوی کردیا۔