Tag: تجاوزات

کراچی: سپریم کورٹ نے تجاوزات کے خلاف آپریشن میں انتظامیہ کی جانب سے سست روی دکھائے جانے پر برہمی کا اظہار کیا ہے۔

تفصیلات کے مطابق سپریم کورٹ کراچی رجسٹری میں انسدادِ تجاوزات پر اجلاس منعقد ہوا، جس کی صدارت جسٹس گلزار احمد نے کی، اجلاس میں سیکرٹری بلدیات، کراچی پولیس چیف، کے ڈی اے حکام، پی آئی اے، سی اے اے، اور چیف سیکریٹری فوکل پرسن و دیگر حکام شریک ہوئے۔

[bs-quote quote=”کراچی میں بنے غیر قانونی سنیما ہاؤسز اور شادی ہالز گرانے، فٹ پاتھوں پر قائم نرسریاں ختم کرنے کا حکم” style=”style-7″ align=”left” color=”#dd3333″][/bs-quote]

اجلاس میں تجاوزات کے خلاف آپریشن میں پیش رفت کا جائزہ لیا گیا۔

اجلاس میں میدانوں پر قائم تجاوزات، نالوں پر بنی مارکیٹوں، گھروں کو گرانے کے معاملے، ریلوے ٹریک پر قبضوں اور چائنا کٹنگ کے خلاف آپریشن کا جائزہ لیا گیا۔

جسٹس گلزار نے تجاوزات کے خلاف آپریشن میں سست روی پر برہمی کا اظہار کرتے ہوئے متعلقہ حکام سے استفسار کیا کہ اب تک تجاوزات کا خاتمہ کیوں نہیں ہوا، ریلوے کی اراضی بحال کیوں نہیں کی گئی؟

جسٹس گلزار نے کیس کی سماعت کرتے ہوئے کراچی میں بنے غیر قانونی سنیما ہاؤسز اور شادی ہالز گرانے کا حکم اور فٹ پاتھوں پر قائم نرسریاں بھی ختم کرنے کی ہدایت کی۔ انھوں نے کہا کہ کوئی کتنا با اثر کیوں نہ ہو، غیر قانونی تعمیرات کی اجازت نہیں ہوگی۔

یہ بھی پڑھیں:  سندھ حکومت کےعدم تعاون کے باعث بہترخدمت نہ کرسکے‘ وسیم اختر

جسٹس گلزار احمد نے کہا عزیز بھٹی پارک سمیت تمام پارکوں سے تجاوزات ختم کریں، سندھ بلڈنگ کنٹرول اتھارٹی (ایس بی سی اے) نے شہر کو تباہ کر دیا ہے، سندھ حکومت شہر کا ماسٹر پلان ایس بی سی اے سے واپس لے کر نئی پلاننگ کرے۔

جسٹس گلزار نے شہر بھر کے پارکس کو ایک ہفتے میں تجاوزات سے پاک کرنے کی ہدایت کی، انھوں نے کہا کہ فٹ پاتھ پر فلاحی اداروں کو سرگرمیوں کی اجازت بھی نہیں ہوگی۔

بعد ازاں میونسپل کمشنر کے ایم سی نے بتایا کہ عدالت نے کنٹونمنٹ بورڈز میں بھی شادی ہالز گرانے کا حکم دیا ہے۔

خیال رہے کہ آج میئر کراچی وسیم اختر نے شکوہ کرتے ہوئے کہا ہے کہ وہ حکومت سندھ کےعدم تعاون کے باعث بہتر خدمت نہ کر سکے، جہاں آپریشن ہوا وہاں پختہ تعمیرات نہیں ہوئیں لیکن پتھارے ضرور لگ گئے ہیں۔

کراچی: شہرقائد کے مختلف علاقوں میں تجاوزات کے خلاف تابڑتوڑ آپریشن جاری ہے، سرکاری اراضی پر قائم چبوترے، جھو نپڑیاں اور ہوٹل مسمار کردیے گئے۔

تفصیلات کے مطابق کورنگی میں سرکلرریلوے کی جگہ واگزار کرانے کے لیے آپریشن کیا گیا، اس دوران ریلوے ٹریک کے اطراف ڈیڑھ سو سے زائد جھگیاں مسمار کی گئیں۔

دوسری جانب کراچی کے علاقے ملیرہالٹ میں سرکاری اراضی پر قائم چبوترے، جھو نپڑیاں اور ہوٹل گرا دئیے گئے۔

انتظامیہ کی جانب سے خبر دار کیا گیا ہے کہ دوبارہ جھگیاں قائم کرنے والوں کو حراست میں لیا جائے گا۔

خیال رہے کہ گذشتہ ہفتے کراچی میں تجاوزات کے خلاف آپریشن کرنے والی سرکاری ٹیم پرقبضہ مافیا نے حملہ کیا تھا، جس کے باعث تین افراد زخمی بھی ہوئے تھے۔

کراچی:‌ قبضہ مافیا کا تجاوزات کے خلاف آپریشن کرنے والی ٹیم پرحملہ

واضح رہے کہ اس وقت پورے کراچی میں تجاوزات کے خلاف آپریشن جارہی ہے، اس کا آغاز ایمپریس مارکیٹ سے کیا گیا، جہاں برسوں سے قائم تجاوزات کا خاتمہ کیا گیا۔

اس آپریشن کی وجہ سے میئر کراچی کو تنقید کا نشانہ بھی بنایا گیا، انھوں نے یہ دعویٰ بھی کیا تھا کہ انھیں دھمکیاں دی جارہی ہیں۔

خیال رہے کہ سپریم کورٹ کے حکم پر پورے شہر میں تجاوزات کے خلاف آپریشن جاری ہے، اس ضمن میں سپریم کورٹ کی جانب سے میئر کراچی کو سراہا بھی گیا، البتہ ایم کیو ایم پاکستان ہی کے ایک دھڑے نے فاروق ستار کی قیادت میں اس پر تحفظات کا اظہار کیا ہے۔

کراچی: میئر کراچی وسیم اختر نے ایمپریس مارکیٹ کے متاثرین کو متبادل دکانیں دینے کا اعلان کر دیا، پہلے مرحلے میں 1470 دکانیں اور اسٹالز قرعہ اندازی کے ذریعے دیے جائیں گے۔

اے آر وائی نیوز کے نمائندے رافع حسین کے مطابق میئر کراچی نے ایمپریس مارکیٹ کے متاثرین سے کیا وعدہ نبھانے کا آغاز کر دیا، متاثرین کو قرعہ اندازی کے ذریعے مرحلہ وار متبادل جگہیں دینے کا اعلان کر دیا گیا۔

[bs-quote quote=”مختلف علاقوں میں دکانیں قرعہ اندازی کے ذریعے دی جائیں گی۔” style=”style-7″ align=”left” color=”#dd3333″ author_name=”میئر کراچی”][/bs-quote]

پہلے مرحلے کے بعد دوسرے مرحلے میں متاثرین کو قرعہ اندازی سے 2100 دکانیں دی جائیں گی، لائنز ایریا پارکنگ پلازہ کے گراؤنڈ، میز نائن فلور میں 240 دکانیں دی جائیں گی۔

پی آئی ڈی سی روڈ پر کے ایم سی فرنیچر مارکیٹ میں 250 دکانیں دی جائیں گی، جب کہ پارکنگ پلازہ کے سامنے خالی پلاٹ پر 400 دکانیں دی جائیں گی اور لائنز ایریا شہاب الدین مارکیٹ میں 350 دکانیں دی جائیں گی۔

رنچھوڑ لائن کے ایم سی مارکیٹ میں بھی 61 اسٹال، اکبر روڈ فرنیچر مارکیٹ کے ایم سی میں 42 اسٹالز الاٹ کیے جائیں گے جب کہ لیاری کھڈا مارکیٹ میں 100 متبادل دکانیں، اور کے ایم سی لیاقت آباد سپر مارکیٹ میں 27 اسٹالز دیے جائیں گے۔

یہ بھی پڑھیں:  میئر کراچی وسیم اختر کا خرم شیرزمان کو 50 کروڑ روپے ہرجانے کا نوٹس

قبل ازیں ایمپریس مارکیٹ و دیگر متاثرین کی بحالی کے منصوبے کا جائزہ اجلاس منعقد ہوا جس میں حکمتِ عملی کا تفصیلی جائزہ لیا گیا، اجلاس میں فیصلہ کیا گیا کہ تمام متاثرین کو متبادل دکانیں دی جائیں گی۔

میونسپل کمشنر ڈاکٹر سیف الرحمان نے کہا کہ بحالی منصوبے پر عمل درآمد کے انتظامات مکمل کر لیے گئے، متاثرین کی تفصیلات جمع کر لی گئی ہیں۔

میئر کراچی کا کہنا تھا کہ مختلف علاقوں میں دکانیں قرعہ اندازی کے ذریعے دی جائیں گی، اجلاس میں ایمپریس مارکیٹ کی تاریخی حیثیت کی بحالی کے اقدامات پر غور کیا گیا، محکمہ ثقافت کی مشاورت سے منصوبے پر عمل درآمد کیا جائے گا۔