کراچی: گورنر سندھ عمران اسماعیل کا کہنا ہے کہ ’کے فور‘ کا ڈیزائن 21 بار تبدیل ہوا، دیکھا جائے گا کہ کے فور پراجیکٹ 25 سے 125 ارب پر کیسے پہنچا۔
تفصیلات کے مطابق گورنر سندھ عمران اسماعیل نے کراچی میں پانی کے بڑے منصوبے سے متعلق کہا ہے کہ کے فور کا ڈیزائن اکیس بار تبدیل کیا گیا اور اس منصوبے کی لاگت پچیس سے ایک سو پچیس ارب روپے تک پہنچی۔
[bs-quote quote=”وزیرِ اعظم کے ساتھ وزیرِ اعلیٰ سندھ نے لنچ بھی کیا اور تمام امور پر بات ہوئی۔” style=”style-7″ align=”left” color=”#dd3333″ author_name=”گورنر سندھ”][/bs-quote]
26 نومبر کو وزیرِ اعلیٰ سندھ سید مراد علی شاہ اور وفاقی وزیر آبی وسائل فیصل واوڈا کی ملاقات میں اتفاق کیا گیا تھا کہ کے فور کو سندھ اور وفاقی حکومتیں مل کر مکمل کریں گی۔
گورنر سندھ کا کہنا تھا کہ وفاق اور صوبے میں کوئی کھینچا تانی نہیں، وزیرِ اعظم کے ساتھ وزیرِ اعلیٰ سندھ نے لنچ بھی کیا اور تمام امور پر بات ہوئی۔
عمران اسماعیل نے کہا کہ وزیرِ اعظم کا کراچی آنے کا مقصد بزنس کمیونٹی کو اعتماد میں لینا تھا، تاجر برادری نے وزیرِ اعظم کو اپنی اپنی تجاویز پیش کی ہیں۔
یہ بھی پڑھیں: کے فور منصوبے کو مل کر مکمل کرنے پر سندھ اور وفاق میں اتفاق
ان کا کہنا تھا کہ وزیرِ اعظم کا اختیار ہے جہاں مرضی منصوبے دیے جائیں، عدالتی حکم کو لے کر انکروچمنٹ کے نام پر ظلم بھی ہوا ہے، اس آپریشن کا پی ٹی آئی یا وفاقی حکومت کا کوئی تعلق نہیں ہے، اس پر نظرِ ثانی کی اپیل کی ہے کہ صورتِ حال کا جائزہ لیا جائے۔
عمران اسماعیل نے مزید کہا کہ ہم نے اس آپریشن کو فوری روکنے کی بھی اپیل کی ہے، تجاوزات گرانے کا شوق ہے تو پہلے کلفٹن کی بڑی دیواریں گرائیں، پہلے بڑے سے شروع کریں پھر نیچے تک آئیں۔
