Tag: تحریک انصاف

مظفرآباد: پاکستان تحریک انصاف نے آزاد جموں و کشمیر میں بھرپور انتخابی مہم چلانے کا فیصلہ کیا ہے۔

تفصیلات کے مطابق تحریک انصاف آزاد جموں و کشمیر کے صدر بیرسٹر سلطان محمود چوہدری نے چیف آرگنائزر سیف اللہ خان نیازی سے خصوصی ملاقات کی جس میں آزاد جموں و کشمیر کی سیاسی صورتحال اور آئندہ انتخابات کی حکمت عملی پر تفصیلی تبادلہ خیال کیا گیا۔

ملاقات میں آزاد جموں کشمیر کے آئندہ انتخابات کے لیے بھرپور حکمت عملی کی تیاری اور کسی اتحاد کے بغیر انتخابی میدان میں اترنے کا دوٹوک اعلان کیا گیا۔

اس موقع پر بیرسٹر سلطان محمود چوہدری کا کہنا تھا کہ وزیراعظم عمران خان کے کشمیر پر واضح، ٹھوس اور غیر متزلزل مؤقف نے اہلِ کشمیر میں جدوجہد کی نئی امنگ جگائی ہے۔

صدر تحریک انصاف آزاد جموں و کشمیر نے کہا کہ جنگ بندی لکیر کے دونوں اطراف میں بسنے والے کشمیری وزیراعظم کی قیادت سے امیدیں وابستہ کیے ہوئے ہیں۔

دوسری جانب چیف آرگنائزر تحریک انصاف نے کہا کہ کشمیر ہمارے وجود کا حصہ، حق خودارادیت اور آزادی حقیقی منزل ہے،وزیراعظم کی قیادت میں تحریک انصاف ہر فورم ہر محاذ پر اہل کشمیر کی ترجمان ہے۔

سیف اللہ خان نیازی کا کہنا تھا کہ آزادجموں و کشمیر کی تعمیر وترقی کا پورا خاکہ تیار کرچکے ہیں،کارکن تیاری کریں،جلدآزاد جموں و کشمیر کے لیے انتخابی حکمت عملی کا اعلان کریں گے۔

اسلام آباد: نعیم الحق کے انتقال پر تحریک انصاف نے 3 روز کے سوگ کا اعلان کردیا۔

اے آر وائی نیوز کے مطابق تین روزہ سوگ کے دوران تحریک انصاف کی سیاسی سرگرمیاں معطل رہیں گی۔ یہ اعلان پی ٹی آئی کے بانی رہنما نعیم الحق کے انتقال کے بعد سامنے آیا۔ اس واقعے نے وزیراعظم عمران خان کو بھی صدمے میں مبتلا کردیا۔

وزیراعظم عمران خان نے سماجی رابطے کی ویب سائٹ ٹوئٹر پر تعزیتی پیغام جاری کیا۔ ان کا کہنا تھا کہ نعیم الحق پی ٹی آئی کے دس بانی ممبران میں شامل تھے، وہ اب تک پی ٹی آئی کے سب سے وفادار ساتھی تھے، تیئیس سال کی جدوجہد میں نعیم الحق ہمیشہ میرے ساتھ کھڑے رہے، جب بھی پارٹی پر مشکل وقت آیا انہوں نے ساتھ دیا۔

موت کی خبر سن کر مختلف سیاسی شخصیات کی جانب سے تعزیت کا سلسلہ جاری ہے۔

تحریک انصاف کے بانی رہنما نعیم الحق انتقال کر گئے

خیال رہے کہ پاکستان تحریک انصاف کے بانی رہنما نعیم الحق70برس کی عمر میں انتقال کرگئے، وہ 11جولائی1949کو کراچی میں پیدا ہوئے، نعیم الحق پیشے کے اعتبار سے بینکر اور کاروباری شخصیت تھے، وہ پی ٹی آئی کے بانی ارکین میں شمار کیے جاتے تھے، انہوں نے 1996میں عمران خان کے ساتھ پاکستان تحریک انصاف کی بنیاد رکھی۔

نعیم الحق کی نماز جنازہ آج بعد نماز عصر مسجد عائشہ خیابان اتحاد کراچی میں ادا کی جائے گی۔

اسلام آباد: تحریک انصاف کے رہنما ندیم افضل چن کا کہنا ہے کہ احتساب بلا امتیاز ہوگا تو کسی بھی بےگناہ کوسزا نہیں ہوگی۔

تفصیلات کے مطابق اے آروائی نیوز کے پروگرام آف دی ریکارڈ میں گفتگو کرتے ہوئے پی ٹی آئی کے رہنما ندیم افضل چن نے کہا کہ تحقیقات میں عدل ہوگا تو ہی لوگ تسلیم کریں گے، عدل نہیں ہوگا توگناہ گار بھی چھوٹ جائیں گے۔

تحریک انصاف کے رہنما کا کہنا تھا کہ احتساب بلا امتیاز ہوگا تو کسی بھی بےگناہ کوسزا نہیں ہوگی،مسائل کوحل کرنا ہے، قانون سازی بھی کرنی ہے، پی پی کو ن لیگ اور ن لیگ کو پی پی قانون سازی نہیں کرنے دیتی تھی۔

ندیم افضل چن نے کہا کہ پی ٹی آئی کو ایک خاص بیانیہ قانون سازی سے روک رہا ہے، ریفارمز سے روکنے کی کوشش، قانون سازی نہیں ہونے دی جاتی، اسمبلی میں جنگ وجدل کے دوران اصلاحات نہیں ہوسکتی۔

تحریک انصاف کے رہنما کا کہنا تھا کہ پاکستان میں سب سے زیادہ حکومت مسلم لیگ ن کی رہی، احتساب قوانین سے مسئلہ تھا تو ن لیگ نے درست کیوں نہیں کیا۔

انہوں نے مزید کہا کہ چینی کے کاروبار سے متعلق لوگ تمام سیاسی جماعتوں میں ہیں، دیکھنا یہ ہے چینی کے کاروبار سے متعلق لوگ کرپٹ ہیں بھی یا نہیں، جہانگیرترین کاروبار قانون کے مطابق کرتے ہیں ٹیکس دیتے ہیں۔