Tag: تحریک انصاف

سوہاوا: وزیر سائنس و ٹیکنالوجی فواد چوہدری نے کہا ہے کہ عمران خان انسانیت کی قدر کرنے والے رہنما ہیں، پاکستان میں عمران خان کے عروج کو کوئی نہیں روک سکتا، وزیراعظم نے انقلاب برپا کیا۔

تفصیلات کے مطابق القادر یونیورسٹی کے سنگ بنیاد کی تقریب سے خطاب کرتے ہوئے وزیر سائنس و ٹیکنالوجی فواد چوہدری نے کہا کہ 30 سال سے اقتدار پر بیٹھے لوگ خود کو ہر چیز سے بالاتر سمجھتے تھے، اقتدار سے چمٹے لوگ چوہے کی طرح بلوں میں گھستے ہیں۔

انہوں نے کہا کہ کبھی لندن جاتے ہیں کبھی کسی کو معافی دلوانے کا کہتے ہیں، نواز شریف جیل جارہے ہیں، زرداری کیس بھگت رہے ہیں، شہباز شریف بھاگ رہے ہیں یہ سب عمران خان کی کوشش کا نتیجہ ہے۔

مزید پڑھیں: رویت ہلال کے لیے 5 رکنی کمیٹی قائم کردی ہے، فواد چوہدری

فواد چوہدری نے کہا کہ تحریک انصاف متوسط طبقے کی نمائندہ جماعت ہے، پیٹرول کی قیمتیں بڑھتی ہیں، دال سبزی کی قیمتیں بڑھتی ہیں تو دل دکھتا ہے، ملک میں مہنگائی کا سامنا ماضی کے حکمرانوں کی وجہ سے ہے۔

وزیر سائنس و ٹیکنالوجی نے کہا کہ ماضی کے حکمرانوں کے دل میں غریب کا خیال ہوتا تو یہ حالات کا سامنا نہ ہوتا، پی ٹی آئی نے سیاسی کامیابی حاصل کی ہے متوسط طبقے کا راج قائم کیا۔

فواد چوہدری نے کہا کہ یقین ہے حکومت عوام کو مسائل سے باہر نکالے گی، عمران خان کی قیادت پر جہلم کے عوام نے اعتماد کا اظہار کیا ہے، نظام کے خلاف جدوجہد ختم نہیں ہوئی ہے، عمران خان کی قیادت میں پسماندہ نظام کو جڑ سے اکھاڑ پھینکیں گے۔

لودھراں: تحریک انصاف کے رہنما جہانگیر ترین نے کہا ہے کہ ملک میں صدارتی نظام کی کوئی گنجائش نہیں ہے۔

تفصیلات کے مطابق تحریک انصاف کے رہنما جہانگیر ترین نے گرین اینڈ کلین لودھراں مہم کا افتتاح کیا، گرین اینڈ کلین مہم کے تحت ایک لاکھ پودے لگائے جائیں گے، جہانگیر ترین نے نواحی علاقہ دورہٹہ میں سوئی گیس سپلائی کا بھی افتتاح کیا۔

جہانگیر ترین نے کہا کہ عمران خان ضرورت کے مطابق بیٹنگ لائن چینج کرتے ہیں، وزیراعلیٰ پنجاب عثمان بزدار کہیں نہیں جارہے ہیں، ن لیگ والے وزیر اعلیٰ کی تبدیلی کی افواہیں پھیلا رہے ہیں۔

انہوں نے کہا کہ وزیراعظم عمران خان نے ووٹوں سے حکومت بنائی ہے، وزیراعظم معیشت کی گاڑی ٹریک پر لے آئے ہیں، برآمدات میں اضافہ ہرہا ہے۔

مزید پڑھیں: صرف ایک شخص ہے جسے لیڈر مانتا ، وہ عمران خان ہیں ، جہانگیر ترین

جہانگیر ترین نے کہا کہ سابقہ حکومت نے صنعتوں کو بند کردیا تھا، دنیا بھر سے ایکسپورٹ آرڈر آرہے ہیں۔

ان کا کہنا تھا کہ لوگوں نے پی ٹی آئی کو ووٹ عوام دوست قانون سازی کیلئے دیئے ہیں، عمران خان کی قیادت میں پاکستان کو فلاحی ریاست بنائیں گے۔

واضح رہے کہ رواں ماہ کے اوائل میں جہانگیر ترین کا کہنا تھا کہ صرف ایک شخص ہے جسے لیڈر مانتا ہوں اور اس کے سامنے جوابدہ ہوں، وہ لیڈر عمران خان ہیں، آخری سانس تک ان کے ساتھ رہوں گا۔

ان کا کہنا تھا جہاں بھی جاتا ہوں وزیراعظم کی خواہش پرجاتاہوں، سیاسی معاملات پرصرف وزیر اعظم کوجوابدہ ہوں، پاکستان کی خدمت میراحق ہے اور اس کوکوئی نہیں چھین سکتا۔

لاہور: سابق وزیر اعظم نواز شریف کی صاحب زادی مریم نواز نے کارکنوں کو مشورہ دیا ہے کہ انتقام کی کوئی ضرورت نہیں ہے، بس دیکھو اور انتظار کرو۔

تفصیلات کے مطابق مریم نواز شریف نے سماجی رابطے کی ویب سائٹ ٹویٹر پر کارکنوں کو پیغام دیا ہے کہ انھیں سیاسی مخالفین سے کسی انتقام کی ضرورت ہی نہیں ہے بلکہ انھیں صرف دیکھنا انتظار کرنا چاہیے۔

مریم نواز نے کارکنوں سے کہا کہ جنھوں نے آپ کو تکلیف پہنچائی آخر کار وہ خود اپنے آپ کو نقصان پہنچائیں گے۔

سابق وزیر اعظم کی صاحب زادی کا کہنا تھا کہ کارکنوں کے ساتھ خوش قسمتی ساتھ رہی تو انھیں یہ نظارہ دیکھنے کا موقع بھی مل جائے گا۔

No need for revenge. Just sit back and wait. Those who hurt you will eventually screw themselves up and if you’re lucky, God will let you watch.

— Maryam Nawaz Sharif (@MaryamNSharif) April 18, 2019

خیال رہے کہ گزشتہ روز وزیر خزانہ اسد عمر کے استعفے سے شروع ہونے والی خبروں‌ کا سلسلہ اس وقت اپنے اختتام کو پہنچا جب وزیر اعظم ہاؤس سے اہم بیان جاری ہوا جس کے مطابق کئی وزرا کے قلم دان تبدیل کر دیے گئے۔

وزیر اعظم آفس کے مطابق فواد چوہدری کو سائنس و ٹیکنالوجی، غلام سرور کو ایوی ایشن، اعجاز احمد شاہ کو وفاقی وزیر داخلہ، شہریار آفریدی کو سیفران، اعظم سواتی کو پارلیمانی امور کے قلم دان سونپے گئے جب کہ اسد عمر کی جگہ فی الحال عبدالحفیظ شیخ کو مشیر خزانہ مقرر کیا گیا ہے۔

لاہور: ترجمان وزیراعلیٰ پنجاب شہباز گل نے کہا ہے کہ مختلف حلقوں میں کابینہ میں ردوبدل کی باتیں چل رہی ہیں، کابینہ میں ردوبدل کوئی غیر آئینی اقدام نہیں ہے۔

تفصیلات کے مطابق ترجمان وزیراعلیٰ پنجاب شہباز گل نے اے آر وائی نیوز سے گفتگو کرتے ہوئے کہا کہ کابینہ میں ردوبدول کوئی غیرآئینی اقدام نہیں ہے، عمران خان لیڈر ہیں ان کا جو بھی فیصلہ ہوگا ہمیں عمل کرنا ہے۔

شہباز گل نے کہا کہ اسد عمر بہت قابل آدمی اور پی ٹی آئی کے لیڈر ہیں، ان کی زندگی کے کسی بھی شعبے میں باعث عزت ہے، بہت سے لوگ اسد عمر کو اپنا آئیڈیل سمجھتے ہیں ان کی بہت عزت کرتا ہوں۔

انہوں نے کہا کہ اسد عمر نے مشکل صورت حال میں بہت اچھا کام کیا ہے، ذاتی حیثٰت میں اسد عمر کے جانے سے اچھا محسوس نہیں ہوا، کابینہ میں کون کام کرے گا وہ وزیراعظم عمران خان کا اختیار ہے۔

ترجمان پنجاب حکومت شہباز گل نے کہا کہ عثمان بزدار اگلے 5 سال کے لیے وزیراعلیٰ پنجاب ہیں، وزیراعظم چاہتے ہیں عثمان بزدار محنت کریں اور کارکردگی دکھائیں۔

مزید پڑھیں: وفاقی کابینہ میں بڑی تبدیلیاں، کئی وزرا کے قلم دان تبدیل

شہباز گل نے کہا کہ 2014 میں جب مسلم لیگ ن حکومت میں آئی تو 20 بلین ڈالر کا خسارہ تھا، 2018 میں جب ن لیگ حکومت گئی تو ملکی خسارہ 37 بلین ڈالر ہوگیا، اسد عمر نے 8 ماہ میں خسارے کو 16 فیصد کم کیا ہے۔

واضح رہے کہ وزیراعظم نے وزرا کے قلمدان میں تبدیلی کی ہے ، وزیر اعظم آفس کے مطابق فوادچوہدری کوسائنس و ٹیکنالوجی کا قلم دان دیا گیا ہے، غلام سرور کو ایوی ایشن کی وزارت دی گئی، جب کہ میاں محمد سومرو سے ایوی ایشن کا اضافی چارج واپس لے لیا گیا۔

اعجاز احمد شاہ کو وفاقی وزیر داخلہ بنا دیا گیا، شہریارآفریدی سیفران کے وزیرمملکت ہوں گے، اعظم سواتی کو پارلیمانی امور کا قلمدان دےدیا گیا، جب کہ اسد عمر کی جگہ فی الحال عبدالحفیظ شیخ مشیر خزانہ مقرر کیے گئے ہیں.

فردوس عاشق اعوان وزارت اطلاعات ونشریات کی معاون خصوصی مقرر کی گئی ہیں، ظفر اللہ مرزا وزیراعظم کے معاون خصوصی برائے صحت مقرر کیا گیا ہے.

اسلام آباد: تحریک انصاف نے مختلف ممالک میں پارٹی کا نام استعمال کرنے والی ذیلی تنظیموں سے لاتعلقی کا اعلان کرتے ہوئے باضابطہ آئینی سرکلر جاری کردیا۔

پی ٹی آئی کی جانب سے باقاعدہ نوٹی فکیشن جاری کیا گیا جس پر سیکریٹری جنرل ارشد داد کے دستخط موجود ہیں۔ سرکلر میں یوتھ کونسل لاہور، یوتھ کونسل مڈل ایسٹ سعودی عرب، پاکستان انصافین فورم قطر کا نام سرکل میں شامل ہے۔

علاوہ ازیں تحریک انصاف جنون گروپ یو اے ای، تحریک انصاف دبئی کشمیر چیپٹر، ویلفیئر ونگ سعودیہ اور تحریک انصاف ہالینڈ کے ناموں سے بنائی جانے والی تنظیموں سے بھی تحریک انصاف لاتعلقی کا اعلان کیا۔

سرکلر میں واضح طور پر کہا گیا ہے کہ متذکرہ تنظیموں کا پاکستان تحریک انصاف کے ساتھ کسی قسم کا کوئی تعلق نہیں اور نہ ہی پارٹی کی جانب سے انہیں کوئی شناخت دی گئی۔

مزید پڑھیں: تحریک انصاف قوم سے کیے تمام وعدے پورے کرے گی: گورنرپنجاب

یاد رہے کہ تحریک انصاف کا 23واں یومِ تاسیس یکم مئی کو منایا جائے گا جس کی مرکزی تقریب اسلام آباد کے جناح کنونشن سینٹر میں منعقد کی جائے گی، تقریب میں وزیر اعظم بطور مہمان خصوصی شرکت کریں گے۔

تحریک انصاف نے یومِ تاسیس کی تیاریوں کا آغاز کردیا اس ضمن میں ایک روز قبل چیف آرگنائزر سیف اللہ خان نیازی کی زیر صدارت اجلاس کا انعقاد کیا گیا تھا جس میں مرکزی ایڈیشنل سیکرٹری جنرل اعجاز احمد چوہدری، سینٹر فیصل جاوید اور ڈاکٹر ابوالحسن سمیت دیگر شریک ہوئے  تھے۔

اجلاس میں فیصلہ کیا گیا تھا کہ یوم تاسیس کی مرکزی تقریب اسلام آباد کے جناح کنونشن سینٹر میں منعقد کی جائے گی جس میں بانی چیئرمین و وزیراعظم بطور مہمان خصوصی شریک ہوں گے، تقریب میں پارٹی کا نظر ثانی شدہ آئینی مسودہ منظوری کے لیے پیش کیا جائے گا ۔

پاکستان تحریک انصاف کی قومی کونسل مجوزہ آئینی مسودے کی باضابطہ منظوری دے گی ، جبکہ بانی چیئرمین و وزیراعظم عمران خان یوم تاسیس کی تقریب سے خصوصی خطاب کریں گے ۔

یہ بھی پڑھیں: پاکستان تحریک انصاف نے چمکتا دمکتا کراچی مہم کا افتتاح کردیا

وزیراعظم اپنے خصوصی خطاب میں مستقبل کے اہداف کا احاطہ اور بائیس سالہ جدوجہد کا اجمالی جائزہ بھی پیش کریں گے،  یوم تاسیس کے موقع پر پارٹی آئین کی منظوری کے بعد مرکزی و صوبائی تنظیمی تبدیلیاں کی جائیں گی۔

اسلام آباد: وزیر مملکت برائے داخلہ شہریار آفریدی نے کہا کہ ملک کی بدنامی کا باعث بننے والی تنظیموں کو نشان عبرت بنایا جائے گا، آئین اور قانون پر کسی قسم کا سمجھوتہ نہیں کیا جائے گا۔

تفصیلات کے مطابق وزیر مملکت برائے داخلہ شہریار آفریدی نے نیوز کانفرنس کرتے ہوئے کہا کہ وزیراعظم کی ہدایت پر معاون خصوصی زلفی بخاری کے ہمراہ کوئٹہ گئے تھے، مذاکرات کے بعد ہزارہ کمیونٹی نے دھرنا ختم کرنے پر اتفاق کیا، ہزارہ برادری کے ساتھ جو بھی زیادتیاں ہوئیں ان کا الزالہ کیا جائے گا۔

شہریار آفریدی نے کہا کہ شہریوں کی جان و مال کی حفاظت کی ذمہ داری ریاست کی ہے، نیشنل ایکشن پلان پر عمل درآمد کے لیے پرعزم ہیں، نیشنل ایکشن پلان پر ماہرین پر مشتمل کمیٹی تشکیل دی گئی ہے، عملی اقدامات یقینی بنائے جائیں گے۔

انہوں نے کہا کہ ایسے اقدامات کیے جارہے ہیں کہ کسی کو قانون ہاتھ میں لینے کی جرأت نہیں ہوگی، بلوچستان کے عوام میں حب الوطنی کا مثالی جذبہ پایا جاتا ہے۔

مزید پڑھیں: کالعدم تنظیموں کے خلاف ایکشن میں تمام اداروں، اپوزیشن کو آن بورڈ لیا: شہریار آفریدی

وزیر مملکت برائے داخلہ نے کہا کہ ہمارے لیے ہر شہری قابل احترام ہے، تحفظ کی فراہمی ریاست کی ذمہ داری ہے، نئے پاکستان میں کسی سے امتیازی سلوک روا نہیں رکھا جائے گا۔

شہریار آفریدی نے کہا کہ ماضی کی حکومتوں کی ناقص پالیسیوں کے باعث ملکی اقدار تک داؤ پر لگا دیا گیا، ملک کے مثبت تشخص کے لیے موجودہ حکومت نے انقلابی اقدامات اٹھائے ہیں۔

انہوں نے کہا کہ خارجہ پالیسی میں اصلاحات کے ساتھ نئی ویزا پالیسی متعارف کرائی، ہم نے اپنے کردار اور اقدار سے دنیا پر ثابت کرنا ہے کہ ہم ایک مہذب قوم ہیں، نوجوان نسل کو پیغام ہے کہ وہ غیرملکی مہمانوں کو عزت دیں۔