Tag: تحریک انصاف

اسلام آباد: وزیر مملکت برائے ریونیو حماد اظہر نے کہا ہے کہ گزشتہ حکومت نے معیشت کا بیڑا غرق کیا، ماضی کی حکومتیں جو کرکے گئیں اس کے اثرات ہم بھگت رہے ہیں، مشکلات جلد ختم ہوجائیں گی۔

تفصیلات کے مطابق وزیر مملکت برائے ریونیو حماد اظہر نے پریس کانفرنس کرتے ہوئے کہا کہ اسحاق ڈار نے معیشت سے متعلق غلط اعداد و شمار پیش کیے، ن لیگ کی حکومت کو موجودہ خساروں کا سامنا نہیں تھا، مہنگائی میں اضافہ روپے کی قدر میں کمی سے ہوا۔

حماد اظہر نے کہا کہ گزشتہ حکومت کا بگاڑ بہت زیادہ تھا، نکلنے میں وقت لگے گا، ہماری پالیسیاں پرانے بگاڑ سے متاثر ہورہی ہیں، اسحاق ڈار صرف قوم سے نہیں کابینہ سے بھی جھوٹ بولتے تھے۔

انہوں نے کہا کہ زرداری، اومنی اور حمزہ شہباز کیس میں کوئی فرق نہیں ہے، حمزہ شہباز اپنے کیسز سے توجہ ہٹانے کے لیے ایسی باتیں کررہے ہیں، یہ جتنا مرضی رو لیں، این آر او نہیں ملے گا۔

مزید پڑھیں: سابقہ ادوار میں پاکستان کی معیشت کو تباہ کیا گیا: حماد اظہر

وزیر مملکت نے کہا کہ ن لیگ کے آخری 7 ماہ میں روپے کی قدر 17 فیصد کم ہوئی، اسٹاک مارکیٹ میں کمی کا رجحان گزشتہ دور حکومت سے شروع ہوا، پی ٹی آئی کے دور میں زرمبادلہ کے ذخائر میں اضافہ ہوا۔

حماد اظہر نے کہا کہ میاں صاحب راتوں رات نظریاتی ہوگئے ہیں، مولانا فضل الرحمان اور آصف زرداری بھی مل رہے ہیں، ن لیگ، پی پی، مولانا صاحب کی ملاقاتیں دراصل مفادات کے لیے ہیں۔

انہوں نے کہا کہ معیشت کے تین فیز ہیں، پہلا فیز دیوالیہ سے بچانا تھا جس میں کامیاب ہوئے، معیشت کے استحکام کا فیز ڈیڑھ سال تک چلے گا۔

کوہاٹ: وزیر مملکت برائے داخلہ شہریار آفریدی نے کہا ہے کہ بھارت کو واضح پیغام دینا چاہتے ہیں کہ ہماری امن کی خواہش کو کمزوری نہ سمجھا جائے۔

تفصیلات کے مطابق وزیر مملکت برائے داخلہ شہریار آفریدی نے کوہاٹ میں تقریب سے خطاب کرتے ہوئے کہا کہ کسی سے ڈکٹیشن نہیں لیں گے، بھارت ہماری امن کی خواہش کو کمزوری نہ سمجھے، بھارت سمیت ہمسایہ ممالک سے برابری کی سطح پر تعلقات چاہتے ہیں۔

شہریار آفریدی نے کہا کہ ہمارے دروازے دنیا بھر کی مہمان نوازی کے لیے کھلے ہیں، دنیا کو باور کرائیں گے پاکستان میں امن بحال ہوچکا ہے، پاکستان ایک امن پسند ملک ہے۔

وزیر مملکت برائے داخلہ نے کہا کہ قبائلی عوام کے مسائل حل کریں گے، موجودہ حکومت قبائلی عوام کو گلے لگا رہی ہے۔

مزید پڑھیں: کالعدم تنظیموں کے خلاف ایکشن میں تمام اداروں، اپوزیشن کو آن بورڈ لیا: شہریار آفریدی

شہریار آفریدی کا کہنا تھا کہ دہشت گردی اور شدت پسندی کا کوئی مذہب نہیں ہوتا، فرقہ واریت پھیلانے والے ملک دشمن ہے، پاکستان کے تمام ادارے اور پورا ملک ایک پیچ پر ہیں۔

واضح رہے کہ چند روز قبل شہریار آفریدی کا کہنا تھا کہ کوئی دشمن ہمیں ڈکٹیٹ نہیں کرسکتا، ایف اے ٹی ایف ایکشن کسی ڈکٹیشن پر نہیں، اپنی آئندہ نسلوں کے لیے کررہے ہیں۔

ان کا کہنا تھا کہ نیشنل ایکشن پلان قومی سیکورٹی کے لیے ایک قدم ہے، اس میں موجود کمیٹیوں میں علمائے کرام بھی شامل ہیں، امن کے بغیر ہم کبھی بھی اپنا مقصد حاصل نہیں کر سکتے۔

کراچی: پی ٹی آئی کراچی کے صدر خرم شیر زمان نے کہا ہے کہ سندھ حکومت کے بدعنوان رہنما احتساب کے لیے تیار رہیں، وقت آچکا ہے جس نے کرپشن کی وہ جیل جائے گا۔

تفصیلات کے مطابق تحریک انصاف کے رہنما اور رکن سندھ اسمبلی خرم شیر زمان نے کہا ہے کہ جھوٹ کے پاؤں نہیں پھر بھی مرتضیٰ وہاب باز نہیں آتے ہیں، این ایف سی میں سندھ کے حصے کی مکمل ادائیگی ہوچکی ہے، سندھ حکومت این ایف سی کی مد میں مکمل رقم کا حساب دے۔

خرم شیر زمان نے کہا کہ سندھ میں میرٹ کا شفاف سسٹم لانے کی ضرورت ہے، نوکریاں میرٹ کے اعتبار سے مستحق افراد کو ملنی چاہئیں، لوٹ مار کا بازار نہیں چلنے دیں گے۔

انہوں نے کہا کہ سندھ حکومت میٹرک کے امتحانات ٹھیک سے نہیں کراسکتی ہے، میٹرک امتحانات میں نقل عروج پر ہے۔

مزید پڑھیں: خرم شیر زمان نے سندھ حکومت کو ملک کی سب سے بڑی مافیا قرار دے دیا

پی ٹی آئی رہنما نے کہا کہ دھمکی دینے والے احتساب سے ڈر رہے ہیں، کیس نمبر 420 کی تیاریاں کریں، زرداری کی سیٹ خالی ہونے جارہی ہے۔

واضح رہے کہ گزشتہ ماہ خرم شیر زمان کا کہنا تھا کہ پیپلز پارٹی نے حلف اٹھایا ہے کراچی کو کچھ نہیں دینا، جب تک پیپلز پارٹی سے چھٹکارا نہیں ملے گا سندھ کا کچھ نہیں ہوسکتا۔

ان کا کہنا تھا کہ کراچی میں تمام غیر قانونی سرگرمیوں کی نگراں سندھ حکومت ہے، پیپلز پارٹی نے شہرِ قائد کو لوٹنے کی قسم کھا رکھی ہے۔

اسلام آباد: وزیراعظم کے مشیر برائے سیاسی امور نعیم الحق نے کہا ہے کہ سب چوروں نے ملک کو بے دردی سے لوٹا ہے اس کی مثال نہیں ملتی، حمزہ شہباز نے دو دن تک مزاحمت کی، نیب ٹیم قانون کے مطابق وہاں گئی تھی۔

تفصیلات کے مطابق وزیراعظم کے مشیر برائے سیاسی امور نعیم الحق نے میڈیا سے گفتگو کرتے ہوئے کہا کہ وزیراعظم کی طرف سے نیب کو کسی بھی قسم کے احکامات نہیں دئیے جارہے ہیں، لاہور میں دو دن سے جو تماشا ہورہا تھا وہ حمزہ شہباز کے گھر کے اندر تھا۔

نعیم الحق نے کہا کہ بلاول ابھی ناسمجھ ہیں ان کا انگریزی بولنے کا اسٹائل ہے، بلاول کا پاکستان کے عوام سے تعلق ہو ہی نہیں سکتا ہے، زرداری کا لاہور میں پاکستان کا دوسرا بڑا گھر ہے، معلوم ہونا چاہئے یہ اثاثے کہاں سے بنائے۔

مزید پڑھیں: مسلم لیگ ن گمراہ کن پروپیگنڈہ کررہی ہے، نعیم الحق

انہوں نے کہا کہ پنجاب ایک بہت بڑا صوبہ ہے، تمام لوگوں کی شکایات سننا آسان کام نہیں ہے، پنجاب میں اسی سال بلدیاتی انتخابات ہوجائیں گے، بلدیاتی نمائندے اپنے لوگوں کے مسائل حل کریں گے۔

نعیم الحق کہا کہ انصاف اسپورٹس، کلچر فیڈریشن کے تحت کرکٹ ٹورنامنٹ کا فائنل ہے، یہ وہی گراؤنڈ ہے جہاں 3 سال قبل وزیراعظم عمران خان نے نئے بولرز کا انتخاب کیا تھا۔

انہوں نے کہا کہ وزیراعظم کھیلوں کے بارے میں بہت غور کررہے ہیں، عمران خان تمام کھیلوں میں کام کرنے پر زور دے رہے ہیں، اولمپکس میں جانے والے ہمارے کھلاڑیوں کے پاس سہولتیں نہیں ہوتی ہیں، ناصرف کرکٹ بلکہ مختلف کھیلوں میں ٹیلنٹ سامنے لانا ہے۔

پشاور: خیبر پختون خوا کے وزیرِ اطلاعات شوکت یوسف زئی نے کہا ہے کہ بی آر ٹی روٹس پر چلنے والی بسوں کے حوالے سے سوشل میڈیا پر غلط پروپیگنڈا ہو رہا ہے۔

تفصیلات کے مطابق کے پی حکومت کے وزیر اطلاعات و تعلقات عامہ نے بس ریپڈ ٹرانزٹ منصوبے کی روٹس پر چلنے والی بسوں کے حوالے سے سوشل میڈیا پر غلط پروپیگنڈے کی تردید کر دی ہے۔

شوکت علی یوسف زئی نے اس حوالے سے کہا کہ زو بسیں (12 میٹر لمبی) ہر لحاظ سے جدید ترین بسیں ہیں، ان بسوں میں دونوں اطراف پر دروازے بنائے گئے ہیں۔

انھوں نے کہا کہ سوشل میڈیا پر بسوں کے حوالے سے غلط اور بے بنیاد خبریں گردش کر رہی ہیں، زو بسیں بی آر ٹی روٹ کے ساتھ ساتھ باڑہ روڈ، کوہاٹ روڈ اور چارسدہ روڈ وغیرہ کے فیڈر روٹس پر چلائی جائیں گی۔

یہ بھی پڑھیں:  بی آر ٹی منصوبہ، جس نے غلطی کی اس کے خلاف ایکشن ہونا چاہیے: پرویز خٹک

وزیر اطلاعات نے کہا کہ فیڈر روٹس پر زیادہ رش ہونے کی وجہ سے بسوں کی بائیں اطراف کے دروازے استعمال ہوں گے کیوں کہ ٹریفک بائیں جانب چلتی ہے۔

صوبائی وزیر کا کہنا تھا کہ بی آر ٹی روٹ پر اسٹیشن پلیٹ فارمز دائیں جانب ہونے کی وجہ سے دائیں جانب کی دروازے استعمال ہوں گے۔

دریں اثنا، آج پشاور فیز تھری چوک کے قریب بی آر ٹی بس کی ٹکر سے ایک خاتون زخمی ہوئیں جنھیں حیات آباد میڈیکل کمپلیکس منتقل کیا گیا، جہاں ترجمان ایچ ایم ایچ کے مطابق خاتون زخموں کی تاب نہ لاتے ہوئے چل بسی۔ ادھر پولیس کا کہنا ہے کہ خاتون کی شناخت تا حال نہیں ہو سکی ہے۔