پاکستان تحریک انصاف کے سینیٹر حامد خان نے کہا ہے کہ 26ویں آئینی ترمیم کیخلاف تحریک چلا رہے ہیں، 26ویں ترمیم کیخلاف 4 کنونشن کرچکے ہیں۔
اے آر وائی کے پروگرام الیونتھ آور میں گفتگو کرتے ہوئے پی ٹی آئی کے رہنما حامد خان کا کہنا تھا کہ26ویں ترمیم آئین کے بنیادی ڈھانچے کیخلاف ہے، 26ویں ترمیم کا مقصدعدلیہ کو مفلوج بنانا اور آزادی سلب کرنا ہے، پی ٹی آئی 26ویں ترمیم کے خلاف ہے۔
حامد خان نے کہا کہ 26ویں ترمیم اسی لیے لائی گئی کہ پی ٹی آئی کو انصاف نہ ملے، مخصوص نشستوں کے فیصلے پر عمل روکنے کیلئے 26ویں ترمیم لائی گئی۔
واضح ثبوت ہے مخصوص نشستوں کے فیصلے پر اب تک عمل نہیں کیا گیا، مولانا فضل الرحمان نے 26ویں ترمیم میں کچھ چیزیں روکی ہیں، ریٹائرمنٹ کے معاملے پر فضل الرحمان نے اعتراض اٹھایا۔
رہنما تحریک انصاف نے کہا کہ آئینی عدالت کے قیام کے معاملے پر بھی مولانا فضل الرحمان نے مخالفت کی، عدالتوں میں تقسیم رہتی ہے تو عدالتوں سے زیادہ نقصان عوام کا ہوگا
حامد خان نے کہا کہ ہارے ہوئے لوگوں کو جتوا کر حکومت بنادی گئی ہے، اس حکومت کے پاس مینڈیٹ ہی نہیں کیا مذاکرات کرسکتے ہیں، ان لوگوں کوبھی معلوم ہے یہ ہارے ہوئے ہیں، حکومت کیا مذاکرات کرے گی ان کے پاس مینڈیٹ ہی نہیں۔
