"جرم” ایک سماجی اصطلاح ہے اور اس کی عام تعریف یہ ہوسکتی ہے کہ کسی شخص کا وہ فعل جو قانون کی خلاف ورزی ہو اور ریاست میں اس کی کوئی سزا مقرر ہو۔
جرم کئی طرح کا ہوتا ہے یا یہ کہہ لیں کہ اس کی مختلف اقسام ہیں۔ پولیس کسی واقعے کے ملزم تک پہنچنے کے لیے مختلف سائنسی طریقے اور جدید آلات استعمال کرسکتی ہے۔
کئی جرائم ایسے ہوتے ہیں جن کا کوئی عینی شاہد اور گواہ نہیں ہوتا اور جائے وقوع سے بہت کم ٹھوس شواہد مل پاتے ہیں جس سے مجرم تک پہنچنا مشکل ہوجاتا ہے۔ موجودہ دور میں اس صورت میں تحقیقات کے لیے جدید آلات اور طریقہ اپنایا جاتا ہے جس میں موبائل فون کے ریکارڈ سے مدد لینا بھی شامل ہے۔
اگر ہم ایسے قتل کی بات کریں جس کا کوئی گواہ نہ ہو اور شواہد بھی کم ہوں تو قاتل تک پہنچنے کے لیے پولیس جیو فینسنگ کا سہارا لیتی ہے۔
مقتول کے موبائل فون پر کالوں کا ریکارڈ اور دوسرے ڈیٹا کے ساتھ مشتبہ شخص یا قاتل کی موجودگی کا پتا چلانے کی کوشش اسی طریقے سے کی جاتی ہے۔
پولیس کسی خاص نمبر کے لیے موبائل فون کمپنیوں کی مدد بھی لیتی ہے جب کہ کسی موبائل فون کی لوکیشن معلوم کرنے والے آلات سے یہ جاننے کی کوشش کی جاتی ہے کہ فلاں شخص کس وقت کس جگہ موجود تھا۔ اس کے ماہر کسی شخص کی مختلف اوقات میں موجودگی کا کھوج لگا کر اس تک پہنچتے ہیں جس کے بعد ابتدائی پوچھ گچھ اور تفتیش شروع کی جاتی ہے۔
