کراچی: معصوم بچے کے قاتل شفقت حسین کو سینٹرل جیل میں صبح سویرے پھانسی دیدی گئی۔
قومی ایکشن پلان کے تحت سزائے موت پر عملدرآمد جاری ہے، سینٹرل جیل کراچی میں علی الصبح مجرم شفقت حسین کو تختہ دارپر لٹکا دیا گیا، مجرم نے دوہزار ایک میں سات سالہ بچے کو اغوا کے بعد قتل کیا تھا، انسدادِ دہشتگردی کی عدالت نے شفقت حسین کو سزائے موت سنائی تھی، جس کے بعد مجرم کے پانچ بار ڈیٹھ وارنٹ جاری کیے گئے لیکن چار بار اس کی پھانسی پرعملدرآمد روک دیا گیا۔
پھانسی سے قبل شفقت حسین کی آخری ملاقات اس کے اہل خانہ سے کرادی گئی تھی۔
دوسری جانب گجرات میں طالب علم کے قاتل غلام حسین اور سیالکوٹ میں قتل کے مجرم لیزر مسیح کو پھانسی دیدی گئی، گجرات ڈسٹرکٹ جیل میں قتل کا مجرم غلام رسول اپنے منطقی انجام کو پہنچا، مجرم نے معمولی تنازعے پر طالب علم کو قتل کیا تھا۔
ساہیوال ڈسٹرکٹ جیل میں سزائے موت کے قیدی مقصود کی پھانسی آخری لمحوں میں مقتول کے بیٹے اور بھائی سے صلح کے بعد مؤخر کردی گئی، مجرم نے دوہزار ایک میں امیر نامی شخص کو زمینی تنازعے پر قتل کیا تھا۔
