واشنگٹن : امریکی محکمہ خارجہ کی ترجمان میری ہارف نے کہا ہے کہ امریکا نے پاکستان کو نو سو باون ملین ڈالر کے ہتھیار فروخت کرنے کے معاہدے کی منظوری دیدی ہے، یمن فوج بھیجنے کا معاملہ پاکستان طے کریگا امریکا نہیں ۔
امریکی دفتر خارجہ میں بریفنگ کے دوران یمن جنگ میں پاکستان کی شمولیت سے متعلق سوال پر میری ہارف کا کہنا تھا کہ جنگ میں فوج بھیجنے یا نہ بھیجنے کا فیصلہ پاکستان کو کرنا ہے، امریکا کا اس سے کوئی تعلق نہیں ۔
میری ہاف نے میڈیا کو بتایا کہ امریکا پاکستان کو نو سو باون ملین ڈالر کا عسکری سامان فروخت کر رہا ہے، جو پاک فوج کیلئے مدد گار ثابت ہوگا۔ تاہم ہتھیاروں کی فروخت کانگریس کی منظوری سےمشروط ہوگی۔
انکا مزید کہنا تھا کہ یہ جنگی ساز وسامان کسی ملک کیخلاف نہیں بلکہ دہشت گردی کیخلاف جنگ میں استعمال کیا جائے گا۔
ایک سوال کے جواب میں میری ہاف نے بتایا پاکستان کے قبائلی علاقوں میں موجود القاعدہ باقیات اب بھی مغرب کیلئے خطرہ ہیں، جن سے نہ صرف پاکستان بلکہ افغانستان کو بھی شدید خطرات لاحق ہیں۔
