اسلام آباد: تحریک انصاف کے رہنما نعیم الحق نے کہا ہے کہ حکومت نے پی آئی ڈی کو ذاتی ملکیت بنا رکھا ہے اور اس ادارے کو محض اپنے ذاتی مفاد کے لیے استعمال کیا جارہا ہے۔
ترجمان تحریک انصاف نعیم الحق پاکستان انفارمیشن ڈپارٹمنٹ میں پریس کانفرنس کی اجازت نہ ملنے پر میڈیا کے سامنے ردعمل دے رہے تھے انہوں نے کہا کہ پی آئی ڈی میں دیگر اپوزیشن جماعتوں کو پریس کانفرنس کرنے کی اجازت پرویز رشید دی تھی لیکن اب حکومت کی منطق سمجھ سے بالا تر ہے۔
حکومتی موقف پڑھیں : پی آئی ڈی میں صرف سرکاری حکام اور وزراء پریس کانفرنس کر سکتے ہیں، مریم اورنگزیب
نعیم الحق نے بتایا کہ حکومتی ارکان پی آئی ڈی میں پریس کانفرنس کرنے کے بعد پچھلے دروازے سے نکل گئے جس کے بعد پی آئی ڈی کو تالے لگا کر چاروں طرف پولیس کو تعینات کردیا گیا ہے جس کے باعث کئی صحافی بھی اندر قید ہوگئے حالانکہ کہ وہاں پریس کانفرنس کرنے کی اجازت ہمیں پرویزرشید نے دی تھی۔
انہوں نے کہا کہ ڈان لیکس کی رپورٹ کو نواز شریف نے اس لئے چھپا دیا ہے کیوں کہ ذمہ داروں میں مریم نواز کا بھی نام ہے جس پر مریم نواز نے مجھے 10 ارب کا لیگل نوٹس بھیجا تھا۔
نعیم الحق نے مطالبہ کیا کہ ڈان لیکس کی رپورٹ کو شائع کیا جائے اور ساتھ ساتھ ماڈل ٹاؤن رپورٹ کو بھی شائع کیا جائے اسے اس لیے چھپایا جا رہا ہے تاکہ شہباز شریف کو بچایا جا سکے۔
واضح رہے آج تحریک انصاف کے رہنماؤں کو پی آئی ڈی میں پریس کانفرنس کرنی تھی تاہم انتظامیہ کی جانب سے اجازت نہیں دی گئی اور دروازوں کو تالے لگا دیئے گئے جس کی وجہ سے صحافیوں کی بڑی تعداد اندر ہی قید ہو گئی۔
