واشنگٹن : ترجمان وائٹ ہاؤس کیرولین لیویٹ کا کہنا ہے کہ صدر ٹرمپ چاہتے ہیں کہ پاک بھارت کشیدگی مزید نہ بڑھے اور جلد ختم ہو۔
تفصیلات کے مطابق ترجمان وائٹ ہاؤس کیرولین لیویٹ نے نیوز بریفنگ میں کہا کہ امریکی وزیرخارجہ مارکوروبیوپاک بھارت کشیدگی پر متحرک ہیں، امریکی وزیر خارجہ نے دونوں ممالک کے رہنماؤں سے بات کی ہے ، مارکو رووبیو نے دونوں ممالک سے تنازع کے خاتمے پر بات کی۔
،ترجمان وائٹ ہاؤس کا کہنا تھا کہ صدر ٹرمپ بھی پاک بھارت معاملے پر بات کرچکے ہیں، صدر ٹرمپ چاہتے ہیں کشیدگی نہ بڑھے اور یہ معاملہ جلد ختم ہو۔
کیرولین لیویٹ نے کہا کہ صدر ٹرمپ کے دونوں ممالک کے رہنماؤں سے اچھے تعلقات ہیں لیکن پاکستان اور بھارت کاتنازع کئی دہائیوں سے چل رہا ہے۔
پاک بھارت کشیدگی سے متعلق تمام خبریں
یاد رہے امریکی وزیرخارجہ مارکوروبیو نے پاکستانی ہم منصب اسحاق ڈار سے رابطہ کیا تھا، اسحاق ڈار نے مارکو روبیو سے کہا تھا گیند اب بھارت کے کورٹ میں ہے، بھارت نے صورتحال کو مزید بڑھایا تو پاکستان نہیں رکے گا۔ بھارت اب حملہ کرے گا تو زیادہ سخت جواب دیا جائے گا۔
بعد ازاں امریکی محکمہ خارجہ نے بتایا تھا کہ روبیو نے کہا دونوں فریق ہر صورت کشیدگی کم کرنے کے طریقے تلاش کریں۔ براہِ راست رابطے بحال کریں۔
