اسلام آباد: ترجمان اسلام آباد پولیس نے سابق وفاقی وزیر شیریں مزاری کی بیٹی ایمان مزاری سے متعلق گردش کرنے والی افواہوں کی تردید کردی۔
تفصیلات کے مطابق ترجمان اسلام آباد پولیس نے کہا کہ ایمان مزاری کے حوالے سے جھوٹی افواہیں پھیلائی جارہی ہیں، ملزمان کے ریمانڈ اور حوالات کے دوران تفتیش کا عمل مکمل کیا جاتا ہے۔
اسلام آباد پولیس نے علی وزیر اور ایمان مزاری کو گرفتار کرنے کی وجہ بتادی
اسلام آباد پولیس کا کہنا تھا کہ ملزمان کو طبی سہولیات مہیا کی جاتی ہیں، سرکاری ڈاکٹر معائنہ کرتے ہیں، ساتھ ہی خوراک اور دیگر اشیا سرکاری طریقہ کار کے مطابق مہیا کی جاتی ہیں۔
اسلام آباد پولیس کا مزید کہنا تھا کہ دوران حراست اور ریمانڈ ملزمہ کو من پسند سہولیات مہیا نہیں کی جا سکتیں۔
واضح رہے کہ سابق وفاقی وزیر شیریں مزاری نے کہا تھا کہ میری بیٹی کو دھوپ میں بٹھائے رکھا تھانے پہنچی تو بے ہوش ہوگئی، میری بیٹی کو بے ہوش ہونے پر سیل میں بغیر طبی امداد بند کر دیا گیا۔
شیریں مزاری نے مزید کہا تھا کہ نہ کھانا استعمال کے قابل ہے اور نہ واش روم کی کوئی حالت، میری بیٹی کو صحت کے مسائل ہیں جس پر اس نے کھانے سے منع کر دیا، میری بیٹی کی جان کو خطرہ ہے۔
شیریں مزاری کی صاحب زادی ایمان مزاری گھر سے گرفتار
گزشتہ روز اسلام آباد پولیس نے علی وزیر اور ایمان مزاری کو گرفتار کیا تھا، دونوں ملزمان ہفتے کے روز جلسے میں این او سی کی خلاف ورزی کرنے پر اسلام آباد پولیس کو تفتیش کے لیے مطلوب تھے۔
