لاہور: اسپیکر پنجاب اسمبلی چوہدری پرویز الہیٰ کا کہنا ہے کہ ق لیگ نےسرکاری اسکولوں میں تعلیم فری کی، ایسے منصوبے بنانا چاہتے ہیں جس سے عوام فائدہ اٹھائیں۔
تفصیلات کے مطابق اسپیکر پنجاب اسمبلی چوہدری پرویز الہیٰ نے تقریب سے خطاب کرتے ہوئے کہا کہ ق لیگ نےسرکاری اسکولوں میں تعلیم فری کی، مشکلات میں گھرے افراد کے لیے 1122 سروس شروع کی۔
انہوں نے کہا کہ آئی ٹی کا محکمہ ہی نہیں تھا، پنجاب میں ہم نے شروع کرایا، نمبرپلیٹ کمپیوٹرائزڈ نہیں تھی وہ کام بھی ہمارے دورمیں شروع ہوا۔
چوہدری پرویز الہیٰ نے کہا کہ 10 سالہ سروے کرایا جس سے پتہ چلا امراض قلب میں اضافہ ہوگا، ہم نے وزیرآباد میں دل کا بڑا اسپتال بنوایا، ہم نے میٹرک تک مفت تعلیم عام کی۔
اسپیکر پنجاب اسمبلی نے کہا کہ ہمارے دورمیں گرین رکشے کا پروگرام شروع ہوا، اس پروگرام میں ہم نے بینک آف پنجاب کو بھی شامل کیا، بے شمار چیزیں ہیں جو ہمارے دورمیں شروع ہوئی تھیں۔ انہوں نے کہا کہ گوجرانوالہ، رحیم یارخان، سیالکوٹ ودیگرمیں انوائرمنٹ لیب بنائی۔
یاد رہے کہ رواں ماہ 11 دسمبر کو اسپیکر پنجاب اسمبلی پرویز الہیٰ کا کہنا تھا کہ وزیراعظم عمران خان اور اتحادی جماعتیں مل کر پاکستان کو سیاسی اور معاشی طور پر مستحکم کرنے کے مشن پر عمل پیرا ہیں۔
چوہدری پرویز الہیٰ کا کہنا تھا کہ پاکستان میں جمہوری نظام مضبوط ہو رہا ہے، حکومتی پالیسیوں کی بدولت انشا اللہ جلد ہی پاکستان کا مثبت امیج سامنے آئے گا۔
