اسلام آباد : ترکیہ کی معروف کمپنی البئراک گروپ کے صدر نے وزیراعظم شہباز شریف سے ملاقات میں پاکستان میں دیگر شعبوں میں بھی سرمایہ کاری کے لئے دلچسپی کا اظہار کردیا۔
تفصیلات کے مطابق وزیراعظم شہباز شریف سے ترکیہ کی معروف کمپنی البئراک گروپ کے صدر کی وفد کے ہمراہ ملاقات ہوئی۔
ملاقات میں شہباز شریف نے کہا کہ البئراک نے لاہور میں سالڈ ویسٹ مینجمنٹ اور پبلک ٹرانسپورٹ میں خدمات انجام دیں اور اپنے گزشتہ دور میں ہم نے لاہور کے رہائشیوں کو عالمی معیار کی سہولتیں فراہم کیں۔
وزیراعظم کا کہنا تھا کہ عالمی سرمایہ کاری سے جدید سفری سہولتیں، سالڈ ویسٹ مینجمنٹ اور روزگار کے مواقع پیدا کئے، گزشتہ حکومت کے 4 سالہ تاریک دور میں لاہور سے دانستہ طور پر بدلہ لیا گیا۔
شہباز شریف نے کہا کہ بین الاقوامی کمپنیوں کو بے جا ہراساں کیا گیا، کمپنیوں کو تباہ کرکے سیاسی بھرتیوں سے اداروں کو تباہ کیا گیا، ملکی ترقی کے سفرکو روکنے والوں کو قوم کبھی معاف نہیں کرے گی۔
اس موقع پر البئراک گروپ کے وفد نے پاکستان میں دیگر شعبوں میں بھی سرمایہ کاری میں دلچسپی کا اظہار کیا۔
