Tag: ترکی

اسلام آباد: وزیر خارجہ شاہ محمود قریشی ترکی کے 2 روزہ سرکاری دورے پر روانہ ہو گئے۔

تفصیلات کے مطابق وزیر خارجہ شاہ محمود دو روزہ سرکاری دورے پر ترکی روانہ ہو گئے ہیں، وزیر خارجہ استنبول میں نویں ہارٹ آف ایشیا کانفرنس میں شرکت کریں گے۔

دورے کے دوران وزیر خارجہ شاہ محمود افغان امن عمل کے حوالے سے شرکا کو آگاہ کریں گے، خطے میں اٹھائے گئے اقدامات سے بھی کانفرنس کے شرکا کو آگاہی فراہم کریں گے۔

شاہ محمود قریشی ترکی میں مقامی اور بین الاقوامی نمایندوں سے ملاقاتیں کریں گے اور مختلف علاقائی اور بین الاقوامی امور پر پاکستانی مؤقف سامنے رکھیں گے۔

یہ بھی پڑھیں:  وزیر خارجہ ایک روزہ سرکاری دورے پر قطر پہنچ گئے

اس سے قبل وزیر خارجہ شاہ محمود نے سری لنکا اور قطر کے بھی سرکاری دورے کیے تھے، یکم دسمبر کو سری لنکا پہنچنے کے بعد انھوں نے کولمبو ایئر پورٹ پر میڈیا سے گفتگو کرتے ہوئے کہا تھا کہ میں وزیر اعظم عمران خان اور صدر ڈاکٹر عارف علوی کا خصوصی پیغام لے کر سری لنکا آیا ہوں، سری لنکا کے نو منتخب صدر اور وزیر اعظم سے ہماری گہری شناسائی ہے، اور وہ پاکستان کے دوست ہیں۔

بعد ازاں، شاہ محمود 3 دسمبر کو قطر کے ایک روزہ دورے پر دوحہ پہنچے تھے جہاں انھوں نے دوسرے کوالالمپور سمٹ وزارتی اجلاس میں شرکت کی۔

اسلام آباد: ترکی سے پاکستانیوں کی بے دخلی کا سلسلہ تیزی سے جاری ہے، ترک حکام نے مزید 24 پاکستانیوں کو ڈی پورٹ کر دیا ہے جو ترکی میں غیر قانونی طور پر مقیم تھے۔

تفصیلات کے مطابق ترکی نے غیر قانونی مقیم 24 پاکستانیوں کو ڈی پورٹ کر دیا ہے، بے دخل افراد پرواز ٹی کے 711 سے اسلام آباد ایئر پورٹ پہنچ گئے، جہاں ایف آئی اے نے ان کو انسانی اسمگلنگ سیل منتقل کر دیا۔

گزشتہ روز بھی ترکی سے غیر قانونی طور پر مقیم 40 پاکستانیوں کو ڈی پورٹ کیا گیا تھا، اس سے قبل 23 نومبر کو 42 پاکستانیوں کو ترک حکام نے پکڑ کر ملک بدر کر دیا تھا جو وہاں غیر قانونی طور پر مقیم تھے۔

بتایا گیا تھا کہ ملک بدر کیے جانے والے پاکستانی ملازمتوں کی تلاش میں غیر قانونی طور پر ترکی گئے تھے، پکڑ میں آنے کے بعد انھیں اسلام آباد پہنچا کر انسانی اسمگلنگ سیل منتقل کیا گیا۔

یہ بھی پڑھیں:  ترکی سے غیر قانونی طور پر مقیم مزید 40 پاکستانی ڈی پورٹ

واضح رہے کہ رواں برس فروری میں ترک حکومت نے پاکستان سے مطالبہ کیا تھا کہ ترکی میں غیر قانونی طور پر مقیم 50 ہزار پاکستانیوں کی واپسی کے لیے فوری اقدامات کیے جائیں، اس سلسلے میں پاکستانی سیکریٹری خارجہ نے وزارت خارجہ کو خط بھی لکھا تھا۔

رواں ماہ سعودی عرب میں بھی غیر قانونی طور پر مقیم افراد کو ریلیف دینے کا فیصلہ کیا گیا ہے، پاکستانی سفارت خانے نے بھی ہم وطنوں کو رابطہ کرنے کی ہدایت کی تھی تاکہ انھیں وطن واپس لایا جا سکے۔

اسلام آباد: ترکی میں غیر قانونی طور پر مقیم 42 پاکستانیوں کو ترک حکام نے پکڑ کر ملک بدر کر دیا ہے۔

اے آر وائی نیوز کے مطابق ترکی میں غیر قانونی طور پر مقیم 42 پاکستانی ملک بدر کر دیے گئے ہیں، پاکستانیوں کو ترک ایئر لائن ٹی کے 710 سے اسلام آباد پہنچا دیا گیا ہے۔

ذرایع کا کہنا ہے کہ ملک بدر کیے جانے والے پاکستانی ملازمتوں کی تلاش میں غیر قانونی طور پر ترکی گئے تھے، پکڑ میں آنے کے بعد انھیں اسلام آباد پہنچا کر سیل منتقل کر دیا گیا ہے۔

واضح رہے کہ رواں برس فروری میں ترک حکومت نے پاکستان سے مطالبہ کیا تھا کہ ترکی میں غیر قانونی طور پر مقیم 50 ہزار پاکستانیوں کی واپسی کے لیے فوری اقدامات کیے جائیں، اس سلسلے میں پاکستانی سیکریٹری خارجہ نے وزارت خارجہ کو خط بھی لکھا تھا۔

یہ بھی پڑھیں:  سعودی عرب کا غیر قانونی مقیم پاکستانیوں کیلئے بڑا فیصلہ

خیال رہے کہ گزشتہ چند برسوں سے پاکستان ترکی میں غیر قانونی تارکین کا سب سے بڑا مرکز بن چکا ہے، ترک اداروں کے مطابق ترکی میں پچاس ہزار سے زائد پاکستانی شہری غیر قانونی طور پر موجود ہیں۔

واضح رہے کہ رواں ماہ سعودی عرب میں غیر قانونی طور پر مقیم افراد کو ریلیف دینے کا فیصلہ کیا گیا ہے، پاکستانی سفارت خانے نے بھی ہم وطنوں کو رابطہ کرنے کی ہدایت کی تھی تاکہ انھیں وطن واپس لایا جا سکے۔

ویلفئیر اتاشی محمود لطیف نے کہا تھا کہ اسکیم کے تحت وطن جانے والے افراد پھر سعودی عرب نہیں جا سکیں گے۔