ARYNews.tv | Urdu – Har Lamha Bakhabar

Tag: ترکی

  • ترک صدر کا مرکزی بینک کے گورنر کو برطرف کرنے کا بعد اصلاحات کا فیصلہ

    ترک صدر کا مرکزی بینک کے گورنر کو برطرف کرنے کا بعد اصلاحات کا فیصلہ

    انقرہ: ترک صدر رجب طیب اردوگان نے مزکری بینک کے گورنر مرات سیتینکایا کو برطرف کرنے کے بعد بینک کے نظام میں اصلاحات کا فیصلہ کیا ہے۔

    تفصیلات کے مطابق ترک صدر رجب طیب اردوگان نے فیصلہ کیا کہ مرکزی بینک کو نئے خطوط پر استوار کیا جائے گا جس کے لیے بڑے پیمانے پر اصلاحات کی جائیں گی۔

    غیر ملکی خبر رساں ادارے کے مطابق ترک صدر نے اپنے ایک بیان میں کہا ہے کہ اگر مرکزی بینک کے نظام میں اصلاحات نہیں کی گئیں تو مستقبل میں مزید مسائل کا سامنا کرنا پڑ سکتا ہے۔

    اردوگان نے حال ہی میں مرکزی بینک کے صدر کو برطرف کیا ہے، مرات سیتینکایا کو 2016 میں چار برس کے لیے مرکزی بینک کا گورنر مقرر کیا گیا تھا اور ان کی مدت 2020 تھی۔

    ترک صدر کے دفتر سے جاری بیان کے مطابق مرکزی بینک کے گورنر مرات سی تینکایا کی جگہ ان کے نائب مرات یوسال نے عہدے کا چارج سنبھال لیا ہے۔

    خیال رہے کہ ترکی میں رواں برس کے اوائل میں معاشی بحران شدت اختیار کرگیا تھا اور لیرا کی قدر میں ریکارڈ کمی آئی تھی اور شرح میں بھی اضافہ ہوا تھا جبکہ معاشی صورت حال کو بہتر کرنے کے لیے صدر اردوگان کا موقف تھا کہ شرح سود میں کمی لائی جائے۔

    ترکی معاشی بحران کا شکار، مرکزی بینک کا گورنز برطرف

    رائٹرز کو ترک حکومتی عہدیدار نے شناخت ظاہر نہ کرنے کی شرط پر بتایا کہ ‘صدر طیب اردوگان شرح سود کے حوالے سے ناخوش تھے اور اس پر اپنے اختلافات کا اظہار کیا تھا جبکہ بینک نے جون میں شرح سود کو برقرار رکھنے کا فیصلہ کیا تھا جس کے بعد بینک کے گورنر سے ان کے اختلافات پیدا ہوئے تھے۔

  • ترکی میں 200 فوجی اہلکاروں کے وارنٹ گرفتاری جاری

    ترکی میں 200 فوجی اہلکاروں کے وارنٹ گرفتاری جاری

    انقرہ: ترکی میں 200 حاضر سروس فوجی اہلکاروں اور کئی سویلین افراد کے وارنٹ گرفتاری جاری کردئیے گئے۔

    ترکی کی سرکاری نیوز ایجنسی انادولو کے مطابق استنبول کے پراسیکیوٹر آفس نے بری، بحری اور فضائی افواج کے 176 اہلکاروں کے وارنٹ جاری کردئیے ہیں، ان میں ایک کرنل، دو لیفٹیننٹ کرنل، 5 میجر، 7 کیپٹن اور 100 لیفٹیننٹ شامل ہیں۔

    ازمیر کے پراسیکیوٹر آفس نے بھی 20 حاضر سروس اور 5 سابق فوجی اہلکاروں جبکہ 10 سویلین افراد کے وارنٹ گرفتاری جاری کرنے کی تصدیق کی ہے۔

    رپورٹ کے مطابق جن اہلکاروں کے وارنٹ گرفتاری جاری کیے گئے ہیں ان پر دہشت گرد تنظیم فتح اللہ گولن (فیٹو) سے روابط کا الزام ہے۔

    مزید پڑھیں: استنبول : فتح اللہ گولن تعلق کا الزام، تین سو ترک فوجیوں کی گرفتاریوں کے وارنٹ جاری

    ازمیر میں مشتبہ افراد پر فون کے ذریعے فیٹو کے اماموں کے ساتھ رابطوں کا الزام عائد کیا گیا ہے جبکہ 10 شہریوں کو فیٹو کی انکرپٹڈ میسیجنگ ایپلی کیشن استعمال کرنے کا ملزم ٹھہرایا گیا ہے۔

    یاد رہے کہ 15 جولائی 2016 کی ناکام فوجی بغاوت کے بعد لاکھوں افراد کو گرفتار کرکے جیلوں میں ڈال دیا گیا تھا جبکہ سول سرونٹس، ملٹری اہلکار اور دیگر افراد کو ان کے عہدوں سے برخاست کردیا گیا تھا۔

    انسانی حقوق کے گروہ اور ترکی کے مغربی اتحادی کریک ڈاؤن کے اس قدر وسیع دائرے پر تنقید کرتے رہے ہیں، ان کا کہنا ہے کہ طیب اردوان نے فوجی بغاوت کے پہلے سیاسی اختلافات کو دبایا ہے۔

    ترک حکومت کا کہنا ہے کہ ملک کو لاحق خطرات کے باعث ایسے اقدامات ناگزیر ہیں، طیب اردوان کئی مرتبہ فتح اللہ گولن کی تنظیم کا اثرو رسوخ ختم کرنے کا عہد دہرا چکے ہیں۔

  • سعودی سیاحوں نے ترکی سے رخ موڑ لیا

    سعودی سیاحوں نے ترکی سے رخ موڑ لیا

    انقرہ : رپورٹ میں پیش کیے گئے اعداد و شمار میں بتایا گیا ہےکہ ترکی میں گذشتہ برس کے پہلے چھ ماہ کے دوران سعودی عرب کے ایک لاکھ 82 ہزار 689 سیاح ترکی آئے تھے۔

    تفصیلات کے مطابق ترکی میں ہوٹلوں کے حوالے سے قائم کردہ ایک ویب سائٹ کی رپورٹ میں بتایا گیا ہے کہ گذشتہ چھ ماہ کے دوران سعودی سیاحوں کی آمد میں قابل ذکر کمی آئی ہے۔رپورٹ کے اعداد وشمار کے مطابق ترکی میں سعودی سیاحوں کی آمد میں 33 اعشاریہ 2 فی صد کمی ریکارڈ کی گئی ہے۔

    غیر ملکی خبر رساں ادارے کا کہنا تھا کہ گذشتہ برس کے پہلے چھ ماہ کے دوران سعودی عرب کے ایک لاکھ 82 ہزار 689 سیاح ترکی آئے جب کہ رواں سال اسی عرصے میں ترکی آنے والے سعودی سیاحوں کی تعداد ایک لاکھ 22 ہزار 115 بتائی گئی ہے۔

    رپورٹ کے مطابق ترکی میں سعودی سیاح چوتھے نمبر سے کم ہوکر 10 ویں نمبر پر آ گئے ہیں۔ترکی کے سرکاری اعداد وشمار کے مطابق عرب ممالک اور دوسرے ملکوں کی جانب سے ترکی کی سیاحت میں غیرمعمولی کمی آئی ہے۔

    سرکاری اعداد وشمار کے مطابق رواں سال کے پہلے تین ماہ کے دوران ترکی میں غیر ملکی سیاحوں کی آمد میں 8 اعشاریہ 5 فی صد اضافہ ہوا مگر ان میں ہر پانچواں سیاح خود ترکی سے تعلق رکھتا ہے جو بیرون ملک سے سے اپنے وطن واپس آیا مگر ترکی میں اسے بھی سیاحوں میں شامل کیا ہے۔

    ترکی کے سیاحتی امور سے متعلق معلومات جمع کرنے والے انسٹیٹیوٹ ٹی آئی یو کےکے مطابق سال 2019ء کی پہلی سہ ماہی میں ترکی کی سیاحت کے لیے آنے والے غیر ملکیوں میں 17 اعشاریہ 8 فی خود ترک باشندے ہیں جو اپنے خاندانوں سے ملاقات کی غرض سے وطن لوٹے مگر انہیں بھی ترکی میں سیاحوں کے طور پر پیش کرکے عالمی سیاحوں کی توجہ حاصل کرنے کی کوشش کی گئی۔

  • ترکی معاشی بحران کا شکار، مرکزی بینک کا گورنز برطرف

    ترکی معاشی بحران کا شکار، مرکزی بینک کا گورنز برطرف

    انقرہ : ترک صدر رجب طیب اردوان نے رواں برس اوائل میں پیش آنے والے بدترین معاشی بحران کے بعد اس سے نمٹنے کے لیے شرح سود پر شدید اختلافات پر مرکزی بینک کے گورنر مرات سی تینکایا کو برطرف کردیا۔

    تفصیلات کے مطابق ترک صدر کے دفتر سے جاری بیان میں کہا گیا ہے کہ مرکزی بینک کے گورنر مرات سی تینکایا کی جگہ ان کے نائب مرات یوسال عہدے کا چارج سنبھال لیں گے۔مرات سی تینکایا کو 2016 میں چار برس کے لیے مرکزی بینک کا گورنر مقرر کیا گیاتھا اور ان کی مدت 2020 تھی۔

    صدر دفتر کی جانب سے جاری بیان میں مرکزی بینک کے گورنر کی برطرفی کے حوالے سے وجوہات نہیں بتائی گئی ہیں تاہم سرکام ذرائع نے بتایا کہ صدر اردوان کو بینک کی جانب سے ملکی کرنسی لیرا کی قدر کو بڑھانے کے لیے گزشتہ برس ستمبر میں مقرر ہونے والی 24 فیصد شرح سود میں کمی نہ لانے کے فیصلے پر اعتراض تھا۔

    خیال رہے کہ ترکی میں رواں برس کے اوائل میں معاشی بحران شدت اختیار کرگیا تھا اور لیرا کی قدر میں ریکارڈ کمی آئی تھی اور شرح میں بھی اضافہ ہوا تھا جبکہ معاشی صورت حال کو بہتر کرنے کے لیے صدر اردوان کا موقف تھا کہ شرح سود میں کمی لائی جائے۔

    رائٹرز کو ترک حکومتی عہدیدار نے شناخت ظاہر نہ کرنے کی شرط پر بتایا کہ ‘صدر طیب اردوان شرح سود کے حوالے سے ناخوش تھے اور اس پر اپنے اختلافات کا اظہار کیا تھا جبکہ بینک نے جون میں شرح سود کو برقرار رکھنے کا فیصلہ کیا تھا جس کے بعد بینک کے گورنر سے ان کے اختلافات پیدا ہوئے تھے۔

    ان کا کہنا تھا کہ اردوان ملکی معیشت کو بہتر بنانے کے لیے پرعزم ہیں جس کے لیے انہوں نے مرات سی تینکایا کو ہٹانے کا فیصلہ کیا۔

    دوسری جانب ماہرین کا خیال ہے کہ مرکزی بینک 25 جولائی کو ہونے والے اجلاس میں زری پالیسی میں آسانیاں پیدا کرنے کا فیصلہ کرسکتا ہے۔

    یاد رہے کہ صدر طیب اردوان نے مرکزی بینک کے گورنر کو ہٹانے فیصلہ ایک ایسے موقع پر کیا ہے کہ جب روس سے دفاعی نظام کی خریداری کا معاہدہ متوقع ہے جس پر امریکا نے دباؤ بڑھانے کے لیے پابندیاں لگانے کا بھی عندیہ دیا تھا۔

  • روسی میزائل کی خریداری کا معاملہ: امریکا کا لڑاکا جیٹ نہ دینا ڈکیتی کے مترادف ہے، ترک صدر

    روسی میزائل کی خریداری کا معاملہ: امریکا کا لڑاکا جیٹ نہ دینا ڈکیتی کے مترادف ہے، ترک صدر

    بیجنگ: ترک صدر رجب طیب اردوگان نے کہا ہے کہ اگر امریکا طے شدہ سودے کے تحت ایف 35 لڑاکا طیارے ترکی کو مہیا نہیں کرتا ہے تو یہ ایک ڈکیتی ہوگی۔

    تفصیلات کے مطابق امریکا اور ترکی کے درمیان روس سے ایس-400 میزائل دفاعی نظام کی خریداری کے معاملے پر تندوتیز بیانات کا سلسلہ جاری ہے۔

    صدر اردوگان نے چین کے دورے کے موقع پر صحافیوں سے گفتگو کرتے ہوئے کہا کہ اگر آپ کا کوئی گاہک ہے اور وہ آپ کو مشینی کام کی طرح رقم ادا کردیتا ہے تو آپ اس کو اشیاء دینے سے کیسے انکار کرسکتے ہیں، اگر اس گاہک کے ساتھ ایسا کیا جاتا ہے تو اس کو ڈکیتی ہی کا نام دیا جاسکتا ہے۔

    انہوں نے بتایا کہ ترکی نے اب تک ایف 35 لڑاکا جیٹ خریدنے کے لیے امریکا کو ایک ارب چالیس کروڑ ڈالر ادا کیے ہیں، ان میں سے چار لڑاکا طیارے ترکی کے حوالے بھی کیے جاچکے ہیں، ترک ہواباز یہ طیارے اڑانے کی تربیت حاصل کرنے کے لیے امریکا جانے والے تھے۔

    روسی میزائل کی خریداری، امریکا کا ترکی پر نئی پابندیاں لگانے پر غور

    انہوں نے مزید کہا کہ ہم نے 116 ایف 35 لڑاکا جیٹ خرید کرنے کے لیے سمجھوتا کیا تھا، ہم صرف ایک مارکیٹ ہی نہیں بلکہ اس طیارے کے مشترکہ تیار کنندہ بھی ہیں، ہم ترکی میں اس کے بعض آلات تیار کرتے ہیں۔

    خیال رہے کہ ترک صدر نے جاپان کے شہر اوساکا میں گذشتہ ہفتے منعقدہ جی 20 سربراہ اجلاس کے موقع پر اپنے امریکی ہم منصب ڈونلڈ ٹرمپ سے ملاقات کی تھی۔اس کے بعد انھوں نے کہا تھا کہ جب روس سے ایس-400 میزائل دفاعی نظام کی ترکی میں آمد شروع ہوجائے گی تو اس کے بعد وہ امریکا کی ضرررساں پابندیوں سے محفوظ رہے گا۔

  • ایس 400 میزائل سسٹم ترکی اور امریکا کو تصادم کی جانب لےجارہا ہے، رپورٹ

    ایس 400 میزائل سسٹم ترکی اور امریکا کو تصادم کی جانب لےجارہا ہے، رپورٹ

    واشنگٹن :امریکی ذرائع ابلاغ نےجاری رپورٹ میں انکشاف کیا ہے کہ روسی ساختہ ایس 400دفاعی نظام نیٹو اتحادی امریکا اور ترکی کو دھیرے دھیرے تصادم کی طرف لے جا رہا ہے۔

    تفصیلات کے مطابق امریکی اخبار نے دعویٰ کیا ہے کہ امریکی صدر ڈونلڈ ٹرمپ روس سے ایس400 دفاعی نظام کی خریداری کی صورت میں ترکی کے خلاف امریکی دشمنوں کے لیے وضع کردہ قانون کا استعمال کر سکتے ہیں۔

    امریکی اخبارنے اپنی رپورٹ میں بتایاکہ جاپان کے شہر اوساکا میں جی 20اجلاس کے موقع پر امریکی صدر نے دیگرعالمی رہ نماﺅں کے ساتھ ترک ہم منصب رجب طیب ایردوآن سے بھی ملاقات کی جس میں روسی ساختہ ایس 400 دفاعی نظام کی خریداری روکنے کے لیے ترک صدر پر دباؤ ڈالا گیا۔

    طیب اردوان نے ملاقات کے بعد میڈیا سے گفتگو کرتے ہوئے بتایا کہ صدر ڈونلڈ ٹرمپ نے عندیہ دیا کہ ترکی کے مبہم منصوبوں یعنی روسی دفاعی نظام ایس 400کی خریداری پر امریکا ترکی پر پابندیاں نہیں لگائے گا۔

    اخبار کے مطابق اوساکا کانفرنس میں ٹرمپ نے ترکی کے حوالے سے نرم اور دوستانہ لہجہ اپنایا مگر حقیقت یہ ہے کہ روسی ساختہ ایس 400دفاعی نظام دونوں ملکوں کو دھیرے دھیرے تصادم کی طرف لے جا رہا ہے، لگتا ہے کہ دونوں ملک دفاعی نظام کی وجہ سے ایک دوسرے کے ساتھ متصادم ہو سکتے ہیں۔

  • ترکی: گولن سے تعلق کی بنیاد پر سو سے زائد افراد کی گرفتاری کے احکامات

    ترکی: گولن سے تعلق کی بنیاد پر سو سے زائد افراد کی گرفتاری کے احکامات

    انقرہ: ترکی میں‌ فتح اللہ گولن سے تعلق کی بنیاد پر سو سے زائد افراد کی گرفتاری کے احکامات جاری کر دیے گئے.

    تفصیلات کے مطابق ترک حکومت نے 122مشتبہ افراد کو گرفتار کرنے کا حکم جاری کیا ہے.

    استنبول، ازمیر اور قونیا سے جاری ہونے والے اعلامیوں کے مطابق ان افراد کا تعلق فتح‌ اللہ گولن سے تھا اور یہ افراد 2016 کی ناکام فوجی بغاوت میں ملوث تھے۔

    ترک سرکاری خبر رساں ادارے کے مطابق سیکیورٹی اداروں نے ان افراد کی گرفتاری کے لیے ازمیر سمیت 17 دیگر صوبوں میں چھاپے مارے ہیں۔

    اعلامیہ کے مطابق ان 122 افراد میں چالیس حاضر سروس فوجی بھی شامل ہیں، جب کہ کچھ افراد کو ماضی میں فوج سے برطرف کیا گیا تھا.

    خیال رہے کہ ترکی میں ناکام فوجی بغاوت کو تقریباً تین سال گزر چکے ہیں. یہ واقعہ جولائی 2016 میں‌ پیش آیا تھا.

    اس بغاوت کے الزام میں اب تک 77 ہزار سے زائد افراد کو گرفتار کرکے میں جیل بھیجا جا چکا ہے۔

    ترکی میں باغی گروہ کی اقتدار پر قبضے کی کوشش ناکام بنانے میں عوام نے کلیدی کردار ادا کیا. عوام سڑکوں پر نکل کر ٹینکوں کے سامنے ڈٹ گئے تھے.

  • امید ہے، امریکا روسی میزائل ڈیل کے باعث ترکی پر پابندی عائد نہیں‌ کرے گا: اردوان

    امید ہے، امریکا روسی میزائل ڈیل کے باعث ترکی پر پابندی عائد نہیں‌ کرے گا: اردوان

    انقرہ: ترک صدر رجب طیب اردوان نے امید ظاہر کی ہے کہ امریکا ترکی پر پابندیاں عائد نہیں کرے گا.

    تفصیلات کے مطابق اپنے حالیہ بیان میں ترک صدر نے کہا ہے کہ امریکا روس کے ساتھ میزائل نظام کی ڈیل کی بنیاد پر ترکی کے خلاف کارروائی نہیں کرے گا، وہ پرامید ہیں کہ اقتصادی پابندیاں عائد نہیں کی جائیں گی. 

    خیال رہے کہ جاپانی شہر اوساکا میں جی ٹوئنٹی سمٹ کے موقع پر رجب طیب اردوان کی امریکی صدر ڈونلڈ ٹرمپ سے ملاقات ہوئی تھی.

    اس ملاقات کے بعد ترک صدر نے کہا کہ مغربی دفاعی اتحاد کے رکن اور اتحادی ممالک کے مابین ایسی پابندیاں بعید ازا قیاس ہیں.

    مزید پڑھیں: ترکی کی روس کے ساتھ دفائی نظام ڈیل پر امریکا کو پریشانی لاحق

    یاد رہے کہ ترکی روس سے دفاعی میزائل نظام خرید رہا ہے، جس پر امریکا کو شدید تحفظات ہیں.  امریکا کا خیال ہے کہ اس سے خطے میں‌ طاقت کا توازن بگڑ جائے گا. اس ڈیل پر امریکی صدر کی جانب سے متعدد بار ترکی کی دھمکیاں‌دی گئیں.

    ترکی روس سے ایس 400 ائیر ڈیفینس سسٹم خریدنے کا خواہش مند ہے۔ میزائلوں کی پہلی کھیپ اور اس سے منسلک ریڈار جولائی میں ترکی کے حوالے کیے جا سکتے ہیں۔

  • روسی میزائل خریداری کے منفی اثرات نہیں ہوں گے، رجب طیب اردوگان

    روسی میزائل خریداری کے منفی اثرات نہیں ہوں گے، رجب طیب اردوگان

    اوساکا: ترک صدر رجب طیب اردوگان نے کہا ہے کہ روس سے میزائل نظام کی خریداری کے کوئی منفی اثرات نہیں ہوں گے۔

    تفصیلات کے مطابق جاپان کے شہر اوساکا میں جی 20 اجلاس کے موقع پر ترک صدر رجب طیب اردوگان کا روسی صدر پیوٹن سے ملاقات سے قبل کہنا تھا کہ روس سے ایس 400 میزائل نظام کی خریداری کے کوئی منفی نتائج نہیں ہوں گے۔

    رجب طیب اردوگان کا کہنا تھا کہ وہ ایس 400 میزائل نظام کے حوالگی کے عمل پر توجہ مرکوز کیے ہوئے ہیں۔

    امریکا نے ترکی کو انتباہ جاری کیا ہے کہ روس سے میزائل نظام خریداری پر پابندیاں عائد کی جاسکتی ہیں جبکہ نیٹو سے تعلقات بھی کشیدہ ہوسکتے ہیں۔

    روسی میزائل سسٹم کے حوالے سے امریکا کی ترکی کو آخری وارننگ

    امریکا نے تشویش کا اظہار کیا ہے کہ جدید ترین ایس 400 میزائلوں سے نیٹو کے دفاعی نظام سمیت امریکا کے جدید ترین ایف 35 لڑاکا طیاروں کو خطرات لاحق ہیں۔

    یاد رہے کہ امریکی خبر رساں ادارے کا کہنا تھا کہ سال 2017 میں بعض رپورٹوں سے یہ بات سامنے آئی تھی کہ انقرہ نے ایف 400 میزائل نظام کے حصول کے لیے کرملن کے ساتھ 2.5 ارب ڈالر مالیت کی ڈیل طے کی تھی۔

    ترکی کو ایس 400 نظام کی خریداری سے روکنے پر قائل کرنے کے لیے امریکی وزارت خارجہ نے 2013 اور 2017 میں پیٹریاٹ میزائل نظام فروخت کرنے کی پیش کش کی تھی۔

  • ترکی، نوجوان نے دوسری منزل سے گرنے والی 2 سالہ بچی کو بچالیا، ویڈیو وائرل

    ترکی، نوجوان نے دوسری منزل سے گرنے والی 2 سالہ بچی کو بچالیا، ویڈیو وائرل

    استنبول: ترکی کے شہر استنبول میں نوجوان نے دوسری منزل کی بالکونی سے گرنے والی 2 سالہ بچی کو بچالیا جس کی ویڈیو سوشل میڈیا پر وائرل ہوگئی۔

    غیرملکی خبررساں ادارے کے مطابق ترکی کے شہر استنبول کے فلیٹ کی بالکونی میں 2 سالہ بچی کھیلتے ہوئے اچانک گر گئی وہاں سے گزرتے ہوئے نوجوان نے جب یہ دیکھا تو فوراً دوڑ کر معصوم بچی کو تھام کر اس کی زندگی بچالی، جس کی ویڈیو سوشل میڈیا پر وائرل ہوگئی۔

    رپورٹ کے مطابق مذکورہ واقعہ گزشتہ جمعرات کو استنبول کے ضلع فتح میں پیش آیا، 17 سالہ فیوضی زبات نے دو سالہ بچی کو کیچ کیا جس کے سبب بچی کے جسم پر کوئی چوٹ نہیں آئی اور اس کی زندگی بچ گئی۔

    سوشل میڈیا پر مذکورہ ویڈیو وائرل ہونے کے بعد فیوضی زبات کو ہیرو کے طور پر پیش کیا جارہا ہے اور لوگوں کی جانب سے نوجوان کے اقدام کو سراہا جارہا ہے۔

    زبات الجیرین تارکین وطن ہیں اور کام کے غرض سے استنبول کے مقیم ہیں ان کی مذکورہ سڑک پر ایک ورکشاپ ہے۔

    بچی کی والدہ کا کہنا ہے کہ وہ کچن میں کھانا بنا رہی تھیں تب انہیں پتا ہی نہیں چلا کہ بچی کب فلیٹ کی بالکونی میں چلی گئی ہے.

    بچی کے اہل خانہ کی جانب سے زبات کو اپنی خوشی سے 200 ترکش لیراز بطور تحفہ پیش کیے۔

    یو ٹیوب پر ایک شہری کا کہنا تھا کہ ذرا سوچیں اگر نوجوان کی نظر اوپر نہیں پڑتی تو ایک افسوسناک خبر ہمارے سامنے ہوتی، نوجوان ترکی کا ہیرو ہے۔