Tag: ترکی

انقرہ: ترکی نے روس سے حاصل کردہ ’ایس 400‘ فضائی دفاعی نظام کے تحت ایک دیسی ساختہ میزائل کا کامیاب تجربہ کر لیا، جس کے بعد ترکی کا دفاعی نظام اور مستحکم ہو گیا ہے۔

غیر ملکی میڈیا کے مطابق جمعے کے روز ترک وزارتِ دفاع نے بحر اسود کی فضا میں ایک میزائل تجربہ کیا جو کامیاب رہا، یہ میزائل روس کے ’ایس 400‘ دفاعی نظام کے تجربے کا حصہ ہونے کی وجہ سے امریکا نے اس پر تشویش کا اظہار کر دیا ہے۔

اس سلسلے میں وائٹ ہاؤس سے ایک بیان جاری کیا گیا ہے جس میں کہا گیا کہ ترک اعلیٰ قیادت نے میزائل سسٹم کو آپریشنل نہ کرنے کا وعدہ کیا تھا، اس کی خلاف ورزی پر سنگین نتائج برآمد ہو سکتے ہیں۔

واضح رہے کہ روس سے حاصل کردہ ایس 400 دفاعی نظام پر ترکی اور امریکا کے درمیان سخت کشیدگی رہی ہے، اس سلسلے میں امریکا کی جانب سے یہ مؤقف پیش کیا گیا ہے کہ نیٹو کے کسی رکن ملک کا روس سے جدید ترین اسلحہ خریدنا نیٹو ممالک کے لیے خطرہ ہے۔

ترک صدر کا آذربائیجان کی مدد کے حوالے سے دو ٹوک اعلان

روس سے اس میزائل سسٹم کی خریداری کے سبب امریکا نے ایف 35 جنگی طیارے تیار کرنے کے ایک مشترکہ منصوبے کے لیے ترکی کے ساتھ ڈیل بھی منسوخ کر دی تھی۔

امریکی صدر ڈونلڈ ٹرمپ نے رجب طیب اردوان کو روس سے دفاعی نظام خریدنے پر پابندیاں لگانے کی دھمکی بھی دی تھی۔

بیجنگ: سنو ویک ڈیولپر کے سی ای او بین ویئی دونگ کا کہنا ہے کہ چینی ویکسین پہلے پانے والے ممالک میں برازیل، انڈونیشیا اور ترکی ہوگا۔

تفصیلات کے مطابق کرونا وائرس کی چین میں تیار ویکسین کو پہلے حاصل کرنے والے ممالک میں برازیل، انڈونیشیا اور ترکی شامل ہیں جہاں اس ویکسین کے تیسرے مرحلے کے کلینکل تجربے جاری ہیں۔

سنو ویک ڈیولپر کے سی ای او بین ویئی دونگ نے صحافیوں سے گفتگو کرتے ہوئے کہا کہ چینی ویکسین پہلے پانے والے ممالک میں برازیل، انڈونیشیا اور ترکی ہوگا۔

انہوں نےکہا کہ ہم نے برازیل میں 21 جولائی، انڈونیشیا میں یکم اگست کو اور ترکی میں 16 ستمبر کو کلینیکل تجربے کا تیسرا مرحلہ شروع کیا ہے، ہمیں بنگلہ دیش میں بھی اس کی منظوری مل گئی ہے۔بین ویئی دونگ کا کہنا تھا کہ ترجیحی بنیاد پر ویکسین کا پہلا لاٹ چین کے ساتھ ہی برازیل، انڈونیشیا اور ترکی میں تقسیم کیا جائے گا۔

سنو ویک ڈیولپر کے سی ای او نے کہا کہ کمپنی پہلے سی ہی ویکسین کی تیاری کی صلاحیت میں اضافہ کرنے کے لیے ایک پروڈکشن پلانٹ تیار کر رہی ہے۔

بین ویئی دونگ نے ویکسین کے تخمینہ لاگت کے بارے میں معلومات دینے سے انکار کرتے ہوئے کہا کہ اس کی قیمت بہت سے عوامل پر منحصر ہے انہوں نے سنوویک ویکسین کے سال کے آخر تک بازار میں آنے کی امید ظاہر کی ہے۔

واضح رہے کہ امریکا، برطانیہ سمیت متعدد ممالک کی طرح چین میں بھی کرونا ویکسین تیار کی گئی ہے اور اس کے کلینکل ٹرائل کا تیسرا مرحلہ جاری ہے، اگر ٹرائل کا تیسرا مرحلہ کامیاب رہا تو چین اس ویکسین کو کس کو برآمد کرے گا اس کی ترجیحات واضح ہوگئی ہیں۔

انقرہ: ترک صدر رجب طیب اردگان کا کہنا ہے کہ ترکی بیرون دھمکیوں کے آگے سر جھکانے والا ملک نہیں ہے۔

تفصیلات کے مطابق ترک صدر رجب طیب اردگان نے کنونشن سینٹر میں منعقد تقریب سے خطاب کے دوران کہا کہ مشرقی بحیرہ روم میں دھمکیوں کی زبان وقعت کھو چکی ہے اور مخالف قوتوں کو پتہ چل گیا ہے کہ ترکی کسی کے آگے سر نہیں جھکائے گا۔

رجب طیب اردگان کا کہنا تھا کہ ترکی مشرقی بحیرہ روم کے طویل ترین ساحلی علاقے کا حامل ہے جسے بیرونی طاقتوں کے ذریعے محدود کرنے کی اجازت نہیں ملے گی۔

انہوں نے کہا کہ ہم نے ہمیشہ بچکانہ حرکات کے سامنے اپنے حقوق کا جائز دفاع کرتے ہوئے ایک مدبر ریاست کا منظر بخوبی پیش کیا ہے۔

ترک صدر کا کہنا تھا کہ قومی اتحاد اور یکجہتی کو نشانہ بنانے والوں کو اب خون کے ہر قطرے کا حساب دینا پڑ رہا ہے، جس طرح ہم نے پیاڑوں میں چھپے دہشتگردوں کے جتھوں کو ختم کرنے کا سلسلہ جاری رکھا ہوا ہے اسی طرح ہمارے شہروں میں روپوش ان کے ساتھیوں کو بھی کیفر دار تک پہنچا جائے گا۔

یاد رہے کہ گزشتہ ماہ ترک صدر رجب طیب اردوان نے بحیرہ اسود میں تاریخ کی سب سے بڑی گیس دریافت کا اعلان کرتے ہوئے کہا تھا کہ بحیرہ اسود سے 320 بلین مکعب میٹر قدرتی گیس دریافت ہوئی ہے، 2023 میں قدرتی گیس کے ان ذخائر سے قوم کو فراہمی شروع کریں گے۔

لندن: برطانوی شہر لندن سے ترکی جانے والی ایک پرواز میں نسلی تعصب پر مبنی جملے ادا کرنے سے منع کرنے پر برطانوی نے افریقی عورت پر مکے برسا دیے۔

غیر ملکی میڈیا کے مطابق لندن سے ترکی جانے والی ایک پرواز میں اس وقت چونکا دینے والے لمحے پیش آئے جب ایک برطانوی نے افریقی عورت پر مکوں سے حملہ کر دیا، خاتون نے اسے افریقیوں سے متعلق نسلی تعصب پر مبنی جملے بولنے سے منع کیا تھا۔

ویڈیو فوٹیج میں دیکھا جا سکتا ہے کہ لوگ چیخ چلا رہے ہیں اور برطانوی کو منع کر رہے ہیں، یہاں تک کہ طیارے کے عملے نے مداخلت کی، ایک عینی شاہد کا کہنا تھا کہ یہ جھگڑا اس وقت شروع ہوا جب برطانوی نے ایک اور مسافر کو نسلی تعصب کا نشانہ بنایا۔

ایک خاتون نے کہا کہ میں افریقی ہوں، میرے لوگوں کے بارے میں ایسی باتیں مت کرو، یہ سن کر برطانوی غیض و غضب میں آکر ان پر حملہ آور ہو گیا، سیٹ پر آگے کی طرف جھک کر ان پر مکے برسانے لگا، تاہم اس بات کی تصدیق نہیں ہو سکی ہے کہ مکے افریقی خاتون پر لگے تھے یا نہیں۔

طیارے کے عملے نے اس ناخوش گوار واقعے کی اطلاع ترکی پولیس کو دے دی تھی، طیارہ اترتے ہی ترکی پولیس مذکورہ برطانوی مسافر کو لے گئی، ویڈیو میں دیکھا جا سکتا ہے کہ جیسے ہی پولیس مسافر کو لے گئی، طیارے کے دیگر مسافروں نے تالیاں بجائیں اور خوشی کا اظہار کیا۔

عینی شاہد کا کہنا تھا کہ یہ اس برطانوی کا پرواز کے دوران دوسرا جھگڑا تھا، یہ پرواز بدھ کو گیٹ وک سے انطالیہ جا رہی تھی، ایک مسافر نے اپنے بیٹے کا کاغذ سے بنایا ہوا جہاز اڑایا تو اس برطانوی نے اسے غصے سےلات مار دی تھی۔

اس واقعے کی ویڈیو بنانے والے مسافر کا کہنا تھا کہ دو گھنٹے کی اس پرواز کے دوران طیارے کی پچھلی سیٹوں پر زیادہ تر وقت ہنگامہ مچا رہا، دو افراد مسلسل نامناسب گفتگو کرتے رہے، جس پر عملے نے کارروائی کرتے ہوئے ان میں سے ایک کو آگے بٹھا دیا تھا، تاہم وہ درمیان میں پھر پیچھے جا کر جھگڑا کرنے لگا۔