Tag: ترک صدر

انقرہ: ترک صدر رجب طیب اردوان نے اعلان کیا ہے کہ ترکی خود اپنا بحری جنگی بیڑا تیار کرنے میں خود کفیل ہو گیا۔

تفصیلات کے مطابق ترکی ان 10 ممالک میں شامل ہو گیا ہے جو جنگی بحری جہاز کی ڈیزائننگ، ان کو تیار کرنے اور ان کی مینٹی ننس کی صلاحیت رکھتے ہیں۔

صدر اردوان نے استنبول میں ایک ورکشاپ میں خطاب کے دوران کہا کہ اب ترکی کو اپنی بحری فوج کے لیے کسی دوسرے ملک کے ہتھیاروں یا جنگی بحری بیڑے پر انحصار نہیں کرنا پڑے گا۔

اس موقع پر انھوں نے استنبول F-515 اور پاکستان کے لیے تیار کیے جانے والے تیسرے ملجیم کورویٹ جنگی بحری جہاز کی ویلڈنگ کی افتتاحی تقریب میں شرکت کی۔

انھوں نے کہا کہ ترکی اپنی بحری فوج کے ہتھیاروں کی تیاری میں نہ صرف خود کفیل ہو گیا ہے بلکہ اپنے دوست اور برادر ملکوں کی بحری افواج کو بھی جنگی بحری جہاز فراہم کرنے کی پوزیشن میں ہے۔

ترک صدر نے کہا اب ترکی کو کوئی بھی ملک پابندیوں سے نہیں ڈرا سکتا کیوں کہ ترکی نے اپنی دفاعی صنعت کو اس قابل بنا لیا ہے کہ وہ مقامی ضروریات کو پورا کرنے کے ساتھ ساتھ اس کو برآمد بھی کر سکتا ہے۔

اردوان کا کہنا تھا کہ استنبول فریگیٹ کی ترک بحریہ میں شمولیت سے اس کی طاقت مزید بڑھ گئی ہے اور اب بحریہ کو اپنے سمندروں کی حفاظت کے لیے کسی دوسرے ملک پر انحصار نہیں کرنا پڑے گا۔

انقرہ: ترک صدر رجب طیب اردوان نے قوم کو خوش خبری سناتے ہوئے کہا ہے کہ کرونا ویکسین ملک پہنچ گئی ہے۔

تفصیلات کے مطابق صدر اردوان نے جمعے کو ایک بیان میں کہا کہ کرونا ویکسین کی 3 ملین خوراکیں ترکی پہنچ چکی ہیں، مزید خوراکوں کے لیے دیگر ممالک کے ساتھ بھی رابطہ جاری ہے۔

صدر اردوان نے قوم کو یہ خوش خبری استنبول کی آیا صوفیہ الکبیر مسجد آمد کے موقع پر سنائی، انھوں نے کہا کرونا وائرس کے خلاف اقدامات کے تحت چین سے 3 ملین خوراکیں ترکی پہنچ گئی ہیں اور یہ سلسلہ مستقبل میں بھی جاری رہے گا۔

انھوں نے کہا ہماری بات چیت کے نتیجے میں چین سے 30 لاکھ ویکسین خوراکیں آ چکی ہیں، لیکن ہمارا ہدف 50 ملین ہے، جرمنی سے بھی زیادہ سے زیادہ ویکسین لینے کے لیے بات چیت کر رہے ہیں، اس بات چیت کے دوران ویکسین کی مشترکہ تیاری پر بھی غور کیا جا رہا ہے۔

اردوان نے بتایا کہ روس کے ساتھ بھی ویکسین کے سلسلے میں مذاکرات کا سلسلہ جاری ہے، سائنسی و تیکنیکی ریسرچ کونسل اس سلسلے میں کام کر رہا ہے۔

انھوں نے کہا 2020 کا سال پوری انسانیت کے لیے سخت اور تکلیف دہ سال تھا، لیکن امید ہے کہ 2021 کا سال کرونا وائرس کے خاتمے اور کمی کا سال ثابت ہوگا۔

واضح رہے کہ امریکی کمپنی فائزر اور بائیو این ٹیک سے تیار کی جانے والی ویکسین میں ایک ترک ڈاکٹر جوڑے نے بھی خدمات انجام دیں، ڈاکٹر اعور شاہین ترکی کو ویکسین کی فراہمی یقینی بنانے کے حوالے سے کافی سرگرم تھے جس میں انھیں کامیابی ملی اور فریقین میں ویکسین کی فراہمی کے لیے ایک معاہدے پر دستخط ہو چکے ہیں۔