اسلام آباد: ترکی کے مسلح افواج کے کمانڈر جنرل یاسر گلر پاکستان کے دورے پر ہیں، یہاں انہوں نے پاک فضائیہ اور پاک بحریہ کے ہیڈ کوارٹرز کا دورہ کیا اور سربراہان سے ملاقاتیں کیں۔
تفصیلات کے مطابق ترک مسلح افواج کے کمانڈر جنرل یاسر گلر نے نیول ہیڈ کوارٹرز کا دورہ کیا۔ ترجمان پاک بحریہ کے مطابق قائم مقام نیول چیف وائس ایڈمرل فیاض جیلانی نے ترک کمانڈر کا استقبال کیا۔
ترک مسلح افواج کے کمانڈر کی آمد پر انہیں روایتی گارڈ آف آنر پیش کیا گیا، معزز مہمان نے نیول ہیڈ کوارٹرز میں یادگار شہدا پر پھول چڑھائے۔ معزز مہمان کا پرنسپل اسٹاف آفیسرز سے بھی تعارف کروایا گیا۔
ترجمان کے مطابق ترک کمانڈر نے وائس ایڈمرل فیاض جیلانی سے خصوصی ملاقات کی۔ ملاقات میں باہمی دلچسپی اور دفاعی امور پر بات چیت کی گئی۔ ترک کمانڈر کو کشمیر پر پاکستان کے اصولی مؤقف سے بھی آگاہ کیا گیا۔
بعد ازاں ترک کمانڈر ایئر ہیڈ کوارٹرز اسلام آباد پہنچے۔ پاک فضائیہ کے چاق و چوبند دستے نے معزز مہمان کو سلامی پیش کی۔
ترجمان فضائیہ کے مطابق ایئر چیف مارشل مجاہد انور سے ترک کمانڈر کی ملاقات ہوئی۔ ملاقات میں جنرل یاسر گلر نے پاک فضائیہ کے افراد کی پیشہ وارانہ مہارت کی تعریف کی۔
ایئر چیف نے پاکستان اور ترکی میں موجودہ تعاون کو مزید وسعت دینے کے عزم کا بھی اعادہ کیا۔
