ARYNews.tv | Urdu – Har Lamha Bakhabar

Tag: تشدد

  • مبینہ موبائل چور پر تشدد، خاتون کیخلاف مقدمہ درج، واقعے کا ڈراپ سین

    مبینہ موبائل چور پر تشدد، خاتون کیخلاف مقدمہ درج، واقعے کا ڈراپ سین

    لاہور : (18 اگست 2025) خاتون کی جانب سے گزشتہ روز مبینہ موبائل چور پر تشدد کی ویڈیو سوشل میڈیا پر وائرل کرنے کے واقعہ کی اصل کہانی سامنے آگئی۔

    لاہور کی رہائشی خاتون نے گھر سے موبائل چوری کے الزام میں حامد نامی شخص کو ڈنڈوں سے مارا اور تشدد کی ویڈیو سوشل میڈیا پر وائرل کر دی۔

    پولیس نے ویڈیو کی حقیقت سامنے آنے پر متاثرہ شخص کی مدعیت میں مذکورہ خاتون کیخلاف مقدمہ درج کرلیا۔

    پولیس حکام کے مطابق متاثرہ شخص کا کہنا ہے کہ حمیرہ بی بی سے کچھ عرصہ قبل 8 ہزار 500 روپے ادھار لئے تھے۔

    مقدمہ کے متن میں کہا گیا ہے کہ ادھار کی رقم واپس دے کر ان کے گھر سے واپس آیا تو مجھ پر موبائل چوری کا الزام لگا دیا۔

    بعد ازاں حمیرہ بی بی اپنے ساتھیوں کے ہمراہ آئی جو مجھے اغوا کرکے مانگا منڈی اپنے گھر  لے گئے، خاتون  نے اپنے دیگر دو ساتھیوں کے ساتھ مل کر مجھ پر بہیمانہ تشدد کیا۔

    متاثرہ شخص نے پولیس کو بتایا کہ کچھ دیر بعد حمیرہ بی بی اور اس کے ساتھی گھر سے باہر گئے تو میں نے بھاگ کر جان بچائی۔

    مزید پڑھیں : شوہر کے تشدد سے حاملہ بیوی جاں بحق

    راولپنڈی کی ثمر زار کالونی اڈیالہ روڈ میں شوہر کے تشدد سے حاملہ بیوی جاں بحق ہوگئی۔ پولیس کے مطابق کاشف نامی نوجوان نے تھانہ صدر بیرونی پولیس کو بیان میں بتایا کہ میری پھوپھو سکینہ کو اس کے شوہر طارق نے تشدد کا نشانہ بنایا، وہ حاملہ تھیں تشدد سے بچہ پیٹ میں ہی دم توڑ گیا۔

  • واپڈا اہلکاروں پر تشدد کرنے والوں کو لینے کے دینے پڑگئے

    واپڈا اہلکاروں پر تشدد کرنے والوں کو لینے کے دینے پڑگئے

    اسلام آباد : پولیس نے واپڈا اہلکاروں پر بہیمانہ تشدد کرنے والے ملزمان کے خلاف مقدمہ درج کرلیا، سوسائٹی مالکان نے عدالت سے اسٹے لے رکھا تھا جسے خارج کردیا گیا تھا۔

    اے آر وائی نیوز کی رپورٹ کے مطابق اسلام آباد پولیس نے آئیسکو ملازمین پر تشدد کرنے والے نجی سوسائٹی کے مالکان کیخلاف مقدمہ درج کرلیا۔

    رپورٹ کے مطابق مذکورہ مقدمہ ایس ڈی او روات محمد ریاض کی مدعیت میں درج کیا گیا ہے جس میں
    سوسائٹی کے صدر، جنرل سیکرٹری اور سائٹ انچارج سردار الطاف اور امجد خان کو نامزد کیا گیا ہے۔

    اس کے علاوہ واپڈا اہلکاروں پر تشدد کے مقدمے میں مزید 30 سے 40 نامعلوم ملزمان کو بھی نامزد کیا گیا ہے، ،مزید تفتیش جاری ہے

    مقدمے کے متن میں کہا گیا ہے کہ ملزمان آئیسکو کے 82.5 ملین روپے کے نادہندہ ہیں عدالت سے اسٹے آرڈر  لے رکھا تھا۔

    متن کے مطابق عدالت نے 8 جولائی کو اسٹے آرڈر خارج کردیا تھا، جس کے بعد کارروائی کی غرض سے آئیسکو ملازمین سوسائٹی پہنچے۔

    بجلی منقطع کرنے کیلیے سوسائٹی پہنچنے پر وہاں موجود سوسائٹی مالکان اور ان کے ساتھیوں نے واپڈا اہلکاروں پر تشدد کیا، ملزمان نے واپڈا کالونی پردھاوا بولا اور سرکاری گاڑیوں کو بھی نقصان پہنچایا۔

  • پی آئی اے کی پرواز میں سگریٹ نوشی سے منع کرنے پر مسافر آپے سے باہر، فضائی میزبان پر تشدد

    پی آئی اے کی پرواز میں سگریٹ نوشی سے منع کرنے پر مسافر آپے سے باہر، فضائی میزبان پر تشدد

    پاکستان انٹرنیشنل ایئر لائن (پی آئی اے) کی پرواز میں ایک مسافر سگریٹ نوشی سے منع کرنے پر آپے سے باہر ہوگیا اور فضائی میزبان پر تشدد کیا۔

    اے آر وائی نیوز کے مطابق یہ واقعہ گزشتہ روز اسلام آباد سے پیرس جانے والی پی آئی اے کی پرواز پی کے 749 میں پیش آیا۔ سفیر نامی ایک مسافر دوران پرواز خلاف قانون تمباکو نوشی کر رہا تھا۔

    خاتون فضائی عملے کی جانبسے منع کرنے کے باوجود مسافر نے تمباکو نوشی بند نہ کی اور بدتمیزی پر اترتے ہوئے آپے سے باہر ہو گیا اور فضائی میزبان پر تشدد شروع کر دیا۔

    عملے اور کپتان کی جانب سے سگریٹ نوشی سے روکنے پر مسافر نے خاتون فضائی میزبان کا بازور پکڑ کر مروڑا اور کمر پر مکہ مارا جس سے وہ زخمی ہوگئی۔

    مسافر نے فلائیٹ اسٹورٹ اور کپتان پر بھی حملہ کیا مگر انہوں نے محوظ رہ کر مسافر سے سگریٹ چھین لی۔

    واقعہ کے بعد پیرس ایئرپورٹ پر لینڈنگ سے قبل کپتان نے ایئر ٹریفک کنٹرولر سے رابطہ کر کے سیکیورٹی طلب کی اور طیارے کے لینڈ کرتے ہی سیکیورٹی اہلکاروں نے جہاز میں پہنچ کر ملزم مسافر کو گرفتار کر لیا۔

    سیکیورٹی فورس نے تشدد کا شکار فضائی میزبانوں کے بیانات ریکارڈ کر کے اور ان کا میڈیکل کروا کر پولیس رپورٹ درج کر لی ہے۔

    ترجمان پی آئی اے نے واقعہ کی تصدیق کرتے ہوئے کہا ہےکہ مذکورہ مسافر کو پی آئی اے پر بلیک لسٹ کر دیا گیا ہے اور اب وہ دوبارہ قومی ایئر لائن پر سفر نہیں کر سکے گا۔

    ترجمان کا کہنا تھا پی ائی اے کے عملے نے اپنے فرائض منصبی کی ادائیگی میں پروفیشنلزم سے کام لیا اور اب قانون اپنا کام کرے گا۔ فرانسیسی قوانین اس معاملے میں بہت سخت ہیں اور امید ہے کہ مسافر سے کسی قسم کی رعایت نہیں برتی جائے گی۔

  • راولپنڈی : تشدد سے کمسن گھریلو ملازمہ کی موت کا مقدمہ درج

    راولپنڈی : تشدد سے کمسن گھریلو ملازمہ کی موت کا مقدمہ درج

    راولپنڈی : اصغرمال میں تشدد سے کمسن گھریلو ملازمہ کی موت کا مقدمہ درج کرلیا گیا، والد نے بتایا کہ مالک اور ثنا نے میری بیٹی پر قتل کی نیت سے تشدد کیا۔

    تفصیلات کے مطابق راولپنڈی کے علاقے اصغرمال میں گھریلو ملازمہ پر تشدد کا معاملے پر والد کی مدعیت میں تھانہ بنی میں مقدمہ درج کرلیا گیا، مقدمے میں دفعہ 302، چلڈرن ایکٹ 2004 سمیت 7 دفعات شامل کی گئیں۔

    پولیس نے بتایا کہ ابتدائی تفتیش میں ملزمان نے جھوٹ بولا بچی کا والد نہیں ہے تاہم، پولیس نے تفتیش کرکے والد کو تلاش کرلیا۔

    مقتولہ کے والد نے بتایا کہ میرے 5 بچے ہیں، جن میں 3 بیٹیاں اور 2 بیٹے شامل ہیں، 3 ماہ قبل بیٹی سے مل کر آیا تھا،ایک سال سے 8 ہزار پر گھریلو ملازمہ تھی۔

    مدعی مقدمے کا کہنا تھا کہ بیٹی نے12 روزقبل فون پراطلاع دی مالک راشداورثناباجی مجھ پرتشددکرتے ہیں، مالک راشد شفیق اور ثنا نے میری بیٹی پرقتل کی نیت سے تشددکیا ، ملزمان سخت سے سخت قانونی کارروائی عمل لائی جائے۔

    خیال رہے مالکان کے تشدد سے شدید زخمی تیرہ سالہ ملازمہ سالہ اقرااسپتال میں دوران علاج دم توڑ گئی ہے۔

    اقراکوتشویشناک حالت میں ہولی فیملی اسپتال منتقل کیاگیاتھا،گھریلوملازمہ پر اصغر مال کے رہائشی ملزم راشدشفیق اور اہلیہ ثنا نے تشدد کیا تھا تاہم پولیس ملزم راشدشفیق اوراہلیہ ثنا کو گرفتار کرلیا ہے۔

  • پولیس کے مبینہ تشدد سے ایک اور شہری جاں بحق

    پولیس کے مبینہ تشدد سے ایک اور شہری جاں بحق

    کراچی کے بعد بہاولنگر میں پولیس گردی کا ایک واقعہ سامنے آیا ہے جہاں پولیس اہلکاروں کے مبینہ تشدد سے شہری جان سے گیا۔

    اے آر وائی نیوز کے مطابق بہاولنگر کے چک باہو ساڑھو میں ایک شہری اشتیاق کو درخواست پر پولیس اہلکار اسے تھانے پیش ہونے کا کہنے گئے۔ شہری کے پیش ہونے سے انکار پر جھگڑا ہوا اور اہلکاروں نے اس پر بندوق کے بٹ مارے۔

    پولیس اہلکاروں نے تشدد کے بعد مبینہ طور پر فائرنگ بھی کی جب کہ تشدد کے بعد گولی لگنے سے اشتیاق وہیں دم توڑ گیا جب کہ پولیس اہلکار وہاں سے فرار ہوگئے۔

    دریں اثنا ڈی پی او بہاولنگر نے واقعہ کا نوٹس لیتے ہوئے سب انسپکٹر زمان، اے ایس آئی سلیم مہار، کانسٹیبل عظیم سمیت دیگر 6 افراد کے خلاف مقدمہ درج ک لیا ہے اور مفرور ملزمان کی گرفتار کے لیے پولیس کے چھاپے جاری ہیں۔

    واضح رہے کہ گزشتہ روز کراچی کے پریڈی تھانہ پولیس نے نوجوان موٹر سائیکل سوار پر سڑک پر تشدد کیا تھا جس کے نتیجے میں وہ جاں بحق ہو گیا تھا۔

    https://urdu.arynews.tv/preedy-police-torture-waqas-karachi/

  • تشدد سے 3 بچے قبل از پیدائش فوت ہوئے، ٹک ٹاکر اسد کی اہلیہ کا دل دہلا دینے والا ویڈیو بیان

    تشدد سے 3 بچے قبل از پیدائش فوت ہوئے، ٹک ٹاکر اسد کی اہلیہ کا دل دہلا دینے والا ویڈیو بیان

    کراچی: زیورات لے کر بھاگنے والی ٹک ٹاکر اسد کی اہلیہ حنا کا دل دہلا دینے والا ویڈیو بیان سامنے آ گیا ہے۔

    تفصیلات کے مطابق کراچی میں ٹک ٹاکر اسد علی کی بیوی اپنے ہی گھر سے طلائی زیورات اور نقدی چوری کر کے بھاگ گئی تھی، جس پر اسد علی نے کورنگی تھانے میں مقدمہ درج کروا دیا ہے۔

    تاہم اب اسد علی کی بیوی حنا کا ایک ویڈیو بیان سامنے آیا ہے جس میں اس نے شوہر پر تشدد کا الزام لگا دیا ہے، حنا کا کہنا ہے کہ وہ شوہر کے تشدد کے باعث گھر چھوڑ کر گئی ہے۔

    حنا نے کہا ’’شادی کے بعد سے اسد مسلسل تشدد کرتا رہا، میرے 3 بچے بھی تشدد کی وجہ سے قبل از پیدائش فوت ہوئے۔‘‘

    دوسری طرف اسد علی نے مقدمہ میں کہا ہے کہ جب وہ گھر آیا تو بیوی گھر پر موجود نہیں تھی، الماری کو چیک کیا تو طلائی زیورات اور 35 ہزار روپے بھی موجود نہیں تھے۔‘‘

    ایف آئی آر کے متن کے مطابق طلائی زیورات میں کان کی بالیاں، ایک انگوٹھی، ڈیڑھ تولہ سونے کا گلے کا ہار غائب تھا، اسد نے کہا مجھے شبہ ہے کہ میری بیوی حنا کو پڑوسی ظفر نے اغوا کیا ہے۔

  • بیوی کے تشدد سے تنگ آکر شوہر نے خودکشی کر لی

    بیوی کے تشدد سے تنگ آکر شوہر نے خودکشی کر لی

    دنیا میں اکثریتی خواتین مردوں کے تشدد کا شکار ہوتی ہیں مگر ایک شخص نے بیوی کے تشدد سے تنگ آ کر زندگی کا خاتمہ کر لیا۔

    کسی بھی گھر میں میاں اور بیوی کے درمیان جھگڑا کوئی انہونی بات نہیں لیکن ایک شوہر نے اپنی بیوی کے تشدد سے تنگ آ کر خودکشی کر لی۔ یہ انوکھا واقعہ بھارت کی ریاست کرناٹک میں پیش آیا جہاں آئے روز بیوی کی مار پیٹ سے تنگ شریف النفس شوہر نے ایسے جینے سے مرنے کو ترجیح دی۔

    بھارتی میڈیا کے مطابق کرناٹک میں پیٹر نامی ایک شخص کی لاش ملی اور اس کی لاش کے ساتھ ہی ایک خط بھی ملا جس میں اس نے اپنی زندگی کے خاتمے کی وجہ بیوی کا تشدد قرار دیا ہے۔

    رپورٹ کے مطابق پیٹر نامی متوفی شخص نے اپنے والد کے نام خط میں لکھا کہ ’’ڈیڈی، مجھے معاف کر دیجیے گا۔ میری بیوی مجھے مارتی ہے اور وہ میری موت چاہتی، میں اسی کے تشدد سے تنگ آ کر اپنی زندگی ختم کر رہا ہوں۔

    متوفی کے بھائی جوئیل نے میڈیا کو بتایا کہ پیٹر کے گزشتہ تین ماہ سے اپنی بیوی کے ساتھ اختلافات چل رہے تھے۔ ہم گھر والے جب اتوار کو چرچ سے واپس آئے تو گھر میں پیٹر کی لاش ملی۔

    پیٹر کے والد نے دعویٰ کیا کہ ان کا بیٹا اپنی بیوی کے رویے اور اس کے خاندان کے مطالبات کی وجہ سے ذہنی دباؤ کا شکار تھا۔ وہ اکثر گھر چھوڑ کر اپنی ماں کے پاس رہنے چلی جاتی تھی اور میرے بیٹے سے کہتی تھی کہ اگر تم مر بھی جاؤ تو بھی میں واپس نہیں آؤں گی۔

    نوجوان کے والد نے یہ الزام بھی عائد کیا کہ اس کے بھائی نے طلاق کے کیس میں 20 لاکھ روپے معاوضے کا مطالبہ کیا تھا۔ اسی جھگڑے کے باعث وہ اپنی نوکری بھی گنوا بیٹھا تھا۔

    پولیس نے وہ خط اپنے قبضے میں لے کر تحقیقات شروع کر دی ہیں۔

  • شہری کی غیر قانونی حراست اور تشدد سے موت میں ملوث 3 پولیس اہلکار گرفتار

    شہری کی غیر قانونی حراست اور تشدد سے موت میں ملوث 3 پولیس اہلکار گرفتار

    سوات: ایف آئی اے نے شہری کو غیر قانونی حراست میں رکھنے اور تشدد کے بعد  موت ککے گھاٹ اتارنے والے 3 پولیس اہلکار کو گرفتار کرلیا۔

    تفصیلات کے مطابق ایف آئی اے اینٹی کرپشن سرکل پشاور نے سوات میں کارروائی کرتے ہوئے شہری کی غیر قانونی حراست اور تشدد سے موت میں ملوث 3 پولیس اہلکار کو گرفتار کرلیا۔

    ایف آئی اے ترجمان کا کہنا ہے کہ اہلکاروں نے شہری کی موت ہونے کے بعد مقدمہ درج کر کےگرفتاری ظاہر کی تھی، ٹارچر اینڈ کسٹوڈیل ڈیتھ ایکٹ کے تحت اینٹی کرپشن سرکل پشاور میں اہلکاروں کے خلاف پہلا مقدمہ درج کرلیا گیا۔

    ترجمان کا کہنا ہے کہ گرفتار اےایس آئی فہیم خان اور دیگر اہلکار چوکی ابوہا سوات میں تعینات تھے، دوسری جانب محمد سلیمان نامی شہری کی پوسٹ مارٹم رپورٹ حاصل کر لی گئی۔

    ایف آئی اے ترجمان کا مزید کہنا ہے کہ ملزمان کا جسمانی ریمانڈ حاصل کرنے کے بعد تفتیش کا آغاز کر دیا گیا ہے۔

  • میکسیکو : مسلح افراد کی اندھا دھند فائرنگ 6 ہلاک

    میکسیکو : مسلح افراد کی اندھا دھند فائرنگ 6 ہلاک

    سان جوان : میکسیکو کے ایک بار پر مسلح افراد نے اندھا دھند فائرنگ کردی جس کے نتیجے میں 6 افراد ہلاک اور پانچ زخمی ہوگئے۔

    مقامی میڈیا رپورٹس کے مطابق فائرنگ کا واقعہ گزشتہ صبح میکسیکو کے ساحلی صوبے تاباسکو کے ایک بار میں پیش آیا جو ان دنوں بڑھتے ہوئے تشدد کی لپیٹ میں ہے۔

    ریاستی اٹارنی جنرل کے دفتر کے ڈپٹی پراسیکیوٹر گلبرٹو میلکیڈیس مرانڈا نے نامہ نگاروں کو بتایا کہ پانچ افراد جائے وقوعہ پر مردہ حالت میں ملے جب کہ ایک زخمی اسپتال میں دوران علاج دم توڑ گیا۔

    ڈپٹی پراسیکیوٹر نے کہا کہ ابتدائی رپورٹس سے ظاہر ہوتا ہے کہ مسلح افراد کا گروپ ایک شخص کی تلاش میں نائٹ کلب میں داخل ہوا اور وہاں موجود لوگوں پر فائرنگ کردی۔

    ایک حکومتی عہدیدار نے ایکس (سابقہ ٹوئٹر) پر بتایا کہ یہ حملہ ولاہرموسا میں ہوا۔ انہوں نے یہ بھی کہا کہ وفاقی حکام مقامی انتظامیہ کے ساتھ مل کر اس جرم کی تفتیش اور اس سے نمٹنے کے لیے کام کر رہے ہیں۔

    رپورٹ کے مطابق تاحال کوئی گرفتاری عمل میں نہیں آئی ہے اور فائرنگ کے محرکات بھی واضح نہیں ہو سکے ہیں۔

    سوشل میڈیا پر گردش کرنے والی ویڈیوز میں لوگوں کو بار سے بھاگتے ہوئے اور کچھ کو زخمیوں کی مدد کرتے ہوئے دیکھا جاسکتا ہے۔

    واضح رہے کہ اسی ماہ کے آغاز میں مرکزی میکسیکو کے بار میں فائرنگ کا ایک اور واقعہ پیش آیا تھا، جس میں 10 افراد ہلاک اور 13 زخمی ہو گئے تھے۔ یہ حملہ تاریخی شہر کریٹارو کے مرکز میں ہوا جو حالیہ دنوں تک ہمسایہ ریاستوں میں بڑھتے ہوئے تشدد سے محفوظ سمجھا جاتا تھا۔

  • پاکستان کے پر تشدد معاشرے سے متعلق ماہر نفسیات کیا کہتے ہیں؟ ویڈیو رپورٹ

    پاکستان کے پر تشدد معاشرے سے متعلق ماہر نفسیات کیا کہتے ہیں؟ ویڈیو رپورٹ

    پاکستانی معاشرے میں گزشتہ کئی سالوں سے عدم برداشت اور تشدد کے رجحان میں خوف ناک اضافہ دیکھنے میں آیا ہے۔

    گزشتہ تین سالوں کے دوران صرف خواتین پر تشدد کے 63 ہزار سے زائد واقعات رونما ہوئے ہیں، جن میں گھریلو تشدد، جنسی زیادتی اور قتل کے واقعات شامل ہیں۔

    پاکستان کے پرتشدد معاشرے سے متعلق ماہر نفسیات ڈاکٹر اقبال آفریدی کہتے ہیں ’’پاکستان میں عدم برداشت اور تشدد نے معاشرے کو درندہ صفت بنا دیا ہے، جس کی وجہ سے خونی رشتے بھی محفوظ نہیں رہے ہیں۔‘‘

    کراچی میں رواں برس جولائی میں تنخواہ نہ ملنے پر ملازم نے سافٹ ویئر کمپنی کے سی ای او کو قتل کر دیا تھا، دو مختلف جگہوں پر سیکیورٹی گارڈز نے دو نوجوانوں کو معمولی بات پر گولی مار کر قتل کیا، اسی طرح ملک بھر میں معمولی تنازع پر لاتعداد لوگ قتل ہو رہے ہیں۔

    تعلیم انسان کو باشعور بناتی ہے مگر ہم دیکھتے ہیں کہ پاکستانی معاشرے میں تعلیم یافتہ اور ان پڑھ دونوں عدم برداشت کا شکار ہیں۔ رواداری ختم ہونے کے اس بڑھتے ہوئے خوف ناک رجحان کی وجہ سے ہمارے معاشرے میں تشدد اور قتل کے ایسے ایسے لرزہ خیز واقعات پیش آ رہے ہیں جن سے انسانیت کا سر شرم سے جھک جاتا ہے۔

    تنخواہ کی عدم ادائیگی پر سافٹ ویئر انجینئر نے کمپنی کے سی ای او کو قتل کردیا

    ماہرین نفسیات کے خیال میں عدم برداشت معاشرے میں افراد کے اندر چھپی ہوئی مایوسی سے جنم لیتا ہے۔ ڈاکٹر اقبال آفریدی نے کہا ’’ملک میں امن و امان کی صورت حال ٹھیک نہیں ہے، جس کی لاٹھی اس کی بھینس والا معامل ہے، لوگ کوشش کرتے ہیں کہ ہر چیز کو تشدد، دھونس اور غصے سے حل کریں۔‘‘

    ایک شہری کا اس سلسلے میں دینی حوالہ دے کر کہنا تھا کہ ایک انسان کا قتل پوری انسانیت کا قتل ہے، کتنا بھی غصہ کیوں نہ ہو خود کو کنٹرول کرنا چاہیے، آدمی کی جان نہیں جانی چاہیے۔ ایک اور شہری کا کہنا تھا ’’میری پریشانی میری ہے، اس کا غصہ میں ماں باپ یا بیوی بچوں پر اتاروں تو یہ غلط ہے۔‘‘