لندن : برطانیہ کے دارالحکومت لندن کی گلیوں میں کھلے آسمان تلے سونے والے افراد کی تعداد میں اضافہ ہو رہا ہے، شہر کے مرکزی علاقے میں لوگوں نے خیمے لگالیے۔
اے آر وائی نیوز کی رپورٹ کے مطابق برطانیہ میں انسانی بحران تیزی سے جنم لے رہا ہے جس کے نتیجے میں بے گھر افراد کی تعداد بڑھتی چلی جا رہی ہے۔
ملک میں بڑھتی مہگائی اور گھروں کے کرایوں میں ہوشربا اضافے کے سبب وسطی لندن کے علاقے ایک پارک میں بے شمار بے گھر افراد کے خیمے نصب ہیں۔
اس ساری صورتحال میں سماجی تنظیمیں برطانوی حکومت سے مطالبہ کر رہی ہیں کہ مسئلے کا حل تلاش کیا جائے۔
اس حوالے سے لندن کے بلدیاتی ادارے اس بحران پر قابو پانے کیلیے ہر ممکن کوششیں کررہے ہیں تاہم ان کا کہنا ہے کہ فنڈنگ اور وسائل کی کمی کے باعث مشکلات درپیش ہیں۔
دوسری جانب فلاحی اداروں کا کہنا ہے کہ حکومت کو چاہیے کہ مسئلے کی جڑ کو تلاش کرے، کسی کو اپنی زندگی سڑکوں پر نہیں گزارنی چاہیے۔
ان کا کہنا ہے کہ جس طرح ملک میں زندگی بسر کرنے اخراجات میں اضافہ ہو رہا ہے اگر ایکشن نہ لیا گیا تو آنے والے مہینوں میں بے گھر افراد کی تعداد میں مزید اضافہ ہو سکتا ہے۔
مزید پڑھیں : شام میں چند دنوں میں 50 ہزار افراد بے گھر ہو گئے، اقوام متحدہ
فلاحی اداروں کے مطابق ایمرجنسی رہائش گاہوں میں بھی جگہ کا فقدان ہے اور حکومتی امداد بھی ناکافی ہے، جس کی وجہ سے حالات پر قابو پانا مشکل ہوتا جارہا ہے۔
