ARYNews.tv | Urdu – Har Lamha Bakhabar

Tag: تعلیمی ادارے

  • ملک میں تعلیمی سرگرمیاں بحال کرنے سے متعلق اہم فیصلہ

    ملک میں تعلیمی سرگرمیاں بحال کرنے سے متعلق اہم فیصلہ

    اسلام آباد: وفاقی وزارت تعلیم نے ٹرائل بنیاد پر اسکول کھولنے سے متعلق صوبوں سے تجاویز طلب کرنے کا فیصلہ کرلیا۔

    تفصیلات کے مطابق وفاقی وزارت تعلیم نے 2 جولائی کو بین الصوبائی وزرائے تعلیم کانفرنس طلب کرلی ہے، کانفرنس میں اسکولز کھولنے یا مزید بند رکھنے سے متعلق معاملہ زیر بحث لایا جائے گا۔

    وزارت تعلیم کا کہنا ہے کہ صوبے تعلیمی ادارے کھولنے سے متعلق پلان23جون تک بھجوائیں۔ طلبا اور اساتذہ کو وبا سے محفوظ رکھنے کے اقدامات کو پلان کا حصہ بنایا جائے۔

    اس حکمت عملی سے تعلق ایچ ای سی اور وفاقی نظامت تعلیمات سمیت متعلقہ حکام سے تجاویز طلب کی گئی ہیں۔ بین الصوبائی وزرائے تعلیم کانفرنس کے بعد قومی رابطہ کمیٹی کو سفارشات بھجوائی جائیں گی۔

    ذرایع کے مطابق قومی رابطہ کمیٹی تعلیمی اداروں کو کھولنے یامزید بند رکھنے کاحتمی فیصلہ کرے گی۔

    ملک بھر میں تعلیمی ادارے کھولنے کی درخواست مسترد

    یاد رہے کہ 15 جون کو اسلام آباد ہائی کورٹ نے ملک بھر میں تعلیمی ادارے کھولنے کی درخواست مسترد کردی تھی۔ چیف جسٹس اسلام آباد ہائی کورٹ جسٹس اطہر من اللہ نے ملک بھر کے تعلیمی ادارے کھولنے سے متعلق درخواست پر سماعت کی تھی اور دوران سماعت درخواست مسترد کی گئی۔

    عدالت میں سماعت کے دوران درخواست گزار کے وکیل نے موقف اختیار کیا تھا کہ پرائیوٹ اسکولوں سے منسلک لوگوں کی نوکریاں ختم ہو رہی ہیں، جس پر چیف جسٹس اسلام آباد ہائی کورٹ نے سماعت کے دوران استفسار کیا کہ کیا باقی ممالک میں اسکول کھولے گئے؟ ترقی یافتہ ممالک میں بھی اسکول نہیں کھلے۔

  • ملک بھر میں تعلیمی ادارے کھولنے کی درخواست مسترد

    ملک بھر میں تعلیمی ادارے کھولنے کی درخواست مسترد

    اسلام آباد: اسلام آباد ہائی کورٹ نے ملک بھر میں تعلیمی ادارے کھولنے کی درخواست مسترد کر دی۔

    تفصیلات کے مطابق چیف جسٹس اسلام آباد ہائی کورٹ جسٹس اطہر من اللہ نے ملک بھر کے تعلیمی ادارے کھولنے سے متعلق درخواست پر سماعت کی۔

    عدالت میں سماعت کے دوران درخواست گزار کے وکیل نے موقف اختیار کیا کہ پرائیوٹ اسکولوں سے منسلک لوگوں کی نوکریاں ختم ہو رہی ہیں۔

    چیف جسٹس اسلام آباد ہائی کورٹ نے سماعت کے دوران استفسار کیا کہ کیا باقی ممالک میں اسکول کھولے گئے؟ ترقی یافتہ ممالک میں بھی اسکول نہیں کھلے۔

    چیف جسٹس اطہر من اللہ نے ریمارکس دیے کہ کرونا وبا کے ساتھ کیسے نمٹنا ہے یہ حکومت کا کام ہے، ہم نے تو عدالتیں بھی حکومتی پالیسی کو مدنظر رکھ کر کھولی ہیں، عدالت اس حوالے سے مداخلت نہیں کرے گی، یہ ایگزیکٹو کا کام ہے اور وہی اس کو دیکھے۔

    چیف جسٹس اسلام آباد ہائی کورٹ نے تعلیمی ادارے کھولنے کی درخواست مسترد کرتے کر دی۔

  • حکومت نے تعلیمی ادارے پیر سے کھولنے کا اعلان کردیا

    حکومت نے تعلیمی ادارے پیر سے کھولنے کا اعلان کردیا

    کراچی: صوبائی حکومت نے سندھ بھر میں تعلیمی ادارے پیر سے کھونے کا اعلان کردیا۔

    اے آر وائی نیوز کے مطابق وزیرتعلیم سندھ سعید غنی نے صوبے بھر میں تمام تعلیمی ادارے پیر سے کھلولنے کا اعلان کیا۔ یہ فیصلہ وزیرتعلیم ومحنت سعید غنی کی سربراہی میں ہونے والے اجلاس میں کیا گیا۔

    اجلاس میں سیکریٹری تعلیم، ایڈیشنل سیکریٹریز اور تعلیمی افسران شامل تھے۔ اجلاس میں تمام تعلیمی اداروں میں احتیاطی تدابیر کے بینر آویزاں کرنے کا فیصلہ کیا گیا، جبکہ اسکول کے بچوں کو ہاتھ دھونے اور صفائی سے متعلق آگاہی دی جائے گی، تمام ہیڈماسٹرز اور پرنسپل ضلعی ہیلتھ افسران سے رابطے میں رہیں گے۔

    کروناوائرس: تعلیمی ادارے بند رکھنے کا اعلان

    اجلاس میں فیصلہ کیا گیا ہے کہ کسی بھی شکایت پر فوری طور پر ضلعی ہیلتھ انتظامیہ کو آگاہ کیا جائے، طالب علم کو نزلہ اور زکام کی شکایت پر اسے رخصت دیکر علاج کرایا جائے گا۔

    اسکول اور کالجز میں صبح اسمبلی میں کروناروک تھام کی احتیاطی تدابیر کی آگاہی دی جائے گی۔

    سعید غنی کا اجلاس میں کہنا تھا کہ محکمہ تعلیم ومحنت سے 10لاکھ افراد وابستہ ہیں، اس لیے اجلاس طلب کیا، صحت ہی ہماری اولین ترجیح ہے۔

  • منشیات کے خاتمےکے لیے گورنر سندھ کے اقدامات قابل ستائش ہیں، عارف علوی

    منشیات کے خاتمےکے لیے گورنر سندھ کے اقدامات قابل ستائش ہیں، عارف علوی

    کراچی: صدر مملکت ڈاکٹر عارف علوی نے کہا کہ منشیات کے خاتمےکے لیے گورنر سندھ عمران اسماعیل کے اقدامات قابل ستائش ہیں۔

    تفصیلات کے مطابق کراچی میں صدرِ پاکستان ڈاکٹر عارف علوی سے گورنر سندھ عمران اسماعیل نے ملاقات کی۔ ملاقات میں انسداد منشیات پر آگاہی مہم، تعلیمی اداروں سے خاتمے کے لیے اقدامات پر تبادلہ خیال کیا گیا۔

    ملاقات میں نوجوان نسل کو منشیات سے محفوظ رکھنے کے لیے کیے گئے اقدامات پر گفتگو کے ساتھ انسداد منشیات کے لیے ہر ممکن وسائل بروئے کار لانے کے عزم کا اظہار بھی کیا گیا۔

    گورنر سندھ عمران اسماعیل نے صدر مملکت ڈاکٹر عارف علوی کو سی پی ایل سی میں انسداد منشیات سیل سے آگاہ کیا انہوں نے بتایا کہ اے این ایف، پولیس، سی پی ایل سی کے تعاون سے آگاہی مہم جاری ہے۔

    اس موقع پر صدرِ پاکستان نے کہا کہ منشیات کے خاتمےکے لیے گورنرسندھ کے اقدامات قابل ستائش ہیں۔ انہوں نےکہا کہ تعلیمی اداروں میں منشیات کا خاتمہ ہر صورت یقینی بنایا جائے، ملوث عناصر کے خلاف بھرپور ایکشن لینا وقت کا تقاضہ ہے۔

    ڈاکٹر عارف علوی نے کہا کہ نوجوان نسل کو موذی لعنت سے محفوظ رکھنے کے لیے تسلسل سے آگاہی مہم چلانا ہوگی، والدین بچوں کو منشیات سے محفوظ رکھنے میں کلیدی کردار ادا کرسکتے ہیں۔

  • سندھ کے تعلیمی اداروں میں موسم سرما کی تعطیلات کا اعلان

    سندھ کے تعلیمی اداروں میں موسم سرما کی تعطیلات کا اعلان

    کراچی: صوبہ سندھ کے تعلیمی اداروں کے لیے موسم سرما کی تعطیلات کا اعلان کر دیا گیا، حکومت کی جانب سے تعطیلات کا نوٹیفکیشن بھی جاری کر دیا گیا۔

    تفصیلات کے مطابق حکومت سندھ نے سرکاری ونجی تعلیمی اداروں کے لیے موسم سرما کی تعطیلات کا نوٹیفکیشن جاری کر دیا۔ سندھ کے سرکاری اور نجی سرکاری تعلیمی اداروں میں 20 دسمبرسے 31 دسمبر تک موسم سرما کی تعطیلات ہوں گی۔

    سندھ حکومت کی جانب سے جاری نوٹیفکیشن کے مطابق تمام اسکول یکم جنوری سے دوبارہ کھلیں گے۔

    اس سے قبل حکومت پنجاب نے سرکاری اور نجی سرکاری تعلیمی اداروں میں 20 دسمبرسے 5 جنوری تک موسم سرما کی تعطیلات کا اعلان کیا تھا۔ پنجاب حکومت کے مطابق تمام اسکول 6 جنوری سے دوبارہ کھلیں گے۔

    یاد رہے کہ گزشتہ سال سندھ بھر کے سرکاری ونجی تعلیمی اداروں میں 22 دسمبر سے 31 دسمبر تک موسم سرما کی تعطیلات کی گئی تھیں۔

    واضح رہے کہ ملک بھر میں موسم سرد ہوگیا ہے جبکہ کئی شہروں میں بارش کا سلسلہ بھی جاری ہے جبکہ مری اور دیگر مقامات پر برفباری بھی شروع ہو چکی ہے۔

  • پنجاب میں سموگ کے باعث پھر تعطیل کا اعلان

    پنجاب میں سموگ کے باعث پھر تعطیل کا اعلان

    لاہور: صوبہ پنجاب میں شدید سموگ کے باعث کل تمام سرکاری و نجی تعلیمی ادارے بند رکھنے کا اعلان کیا گیا ہے۔

    تفصیلات کے مطابق صوبہ پنجاب میں سموگ کی صورتحال شدت اختیار کر گئی جس کے باعث پنجاب حکومت نے صوبے میں کل تمام سرکاری اور نجی تعلیمی ادارے بند رکھنے کا اعلان کیا ہے۔

    اس سے قبل گزشتہ ہفتے بھی سموگ کے باعث صوبے میں 2 دن کی تعطیل کی گئی تھی۔ زہریلی سموگ کے نتیجے میں لاہور کے شہریوں میں گلے اور آنکھوں کے امراض میں اضافہ ہوگیا ہے اور بچے زیادہ متاثر ہو رہے ہیں۔

    خیال رہے کہ دھند اور دھوئیں کی آمیزش سموگ کا مسئلہ گزشتہ دو برس سے صوبہ پنجاب میں سامنے آرہا ہے، بھارتی پنجاب کے شہروں میں فصلوں کے جلائے جانے سے نہ صرف بھارتی پنجاب بلکہ سرحد کے پار پاکستانی پنجاب میں بھی سردیوں میں زہریلی دھند معمول بنتی جارہی ہے۔

    سموگ سے شہری مختلف بیماریوں میں مبتلا ہو رہے ہیں جبکہ کھلی فضا میں سانس لینا بھی محال ہے۔

    رواں برس سموگ پر قابو پانے کے لیے فصلوں کی باقیات، کچرا، ٹائر اور پولی تھین جلانے پر دفعہ 144 نافذ کی گئی جبکہ اینٹوں کے بھٹوں کو بھی چند ماہ کے لیے بند کیا گیا جو سموگ کی اہم وجہ ہیں۔

    آج لاہور ہائیکورٹ نے بھی اسموگ سے نمٹنے کے لیے پنجاب حکومت کو ٹھوس اقدامات کرنے کا حکم دے دیا ہے۔

    عدالت کا کہنا ہے کہ زگ زیگ ٹیکنالوجی استعمال نہ کرنے والے بھٹوں اور آلودگی کا باعث بننے والے صنعتی یونٹس کے خلاف کارروائی کی جائے۔

  • اسلام آباد کی یونیورسٹیاں کل معمول کے مطابق کھلی رہیں گی: ڈپٹی کمشنر

    اسلام آباد کی یونیورسٹیاں کل معمول کے مطابق کھلی رہیں گی: ڈپٹی کمشنر

    اسلام آباد: ڈپٹی کمشنر نے کہا ہے کہ کل وفاقی دارالحکومت کی تمام یونی ورسٹیاں معمول کے مطابق کھلی رہیں گی، سیاسی احتجاج اور دھرنوں کے باعث بچوں کا مستقبل داؤ پر نہیں لگا سکتے۔

    تفصیلات کے مطابق ڈپٹی کمشنر اسلام آباد محمد حمزہ شفقات نے کل یونی ورسٹیاں معمول کے مطابق کھلی رکھنے کا اعلان کر دیا ہے، انھوں نے کہا کہ احتجاج اور دھرنوں کے باعث تعلیمی ادارے بند کرنا غلط روایت ہے۔

    ڈپٹی کمشنر نے مزید کہا کہ میٹرو بس سروس بھی کل معمول کے مطابق چلے گی، میٹرو کے اطراف اہل کار ڈیوٹی انجام دیں گے، اسلام آباد کے شہری کل میٹرو بس سروس استعمال کر سکتے ہیں۔

    یہ بھی پڑھیں:  اسلام آباد کے پرائیویٹ اسکولز کل بند رکھنے کا اعلان

    دریں اثنا، پرائیویٹ اسکولز نیٹ ورک (پی ایس این) نے بھی کل اسلام آباد کے تمام ممبر پرائیویٹ اسکولز کھلے رکھنے کا فیصلہ کر لیا ہے، پی ایس این کے صدر نے کہا کہ ہم وزارت تعلیم، وزارت داخلہ اور ضلعی انتظامیہ کے احکامات تسلیم کریں گے۔

    انھوں نے کہا کل کے بعد بھی اسکول کھلے رکھنے کا فیصلہ انتظامیہ کے احکامات کی روشنی میں کیا جائے گا، تعلیمی اداروں میں وسط مدتی امتحانات ہو رہے ہیں، بچوں کا نقصان نہ کیا جائے۔

    واضح رہے کہ پرائیویٹ اسکولز ایسوسی ایشن نے آزادی مارچ کے پیش نظر کل وفاقی دارالحکومت اسلام آباد کے تمام نجی اسکولز بند رکھنے کا اعلان کیا ہے۔

    خیال رہے کہ آزادی مارچ کے باعث اسلام آباد کی مختلف جامعات میں پیپرز منسوخ کیے گئے ہیں، نمل یونی ورسٹی میں یکم نومبر کا پیپر 8 نومبر تک ملتوی کیا گیا ہے، نمل یونی ورسٹی کل سے 7 نومبر تک بند رہے گی۔

  • سندھ کے تعلیمی اداروں میں منشیات کی سپلائی، آئی جی سندھ سپریم کورٹ میں طلب

    سندھ کے تعلیمی اداروں میں منشیات کی سپلائی، آئی جی سندھ سپریم کورٹ میں طلب

    کراچی: سپریم کورٹ نے منشیات کے استعمال سے متعلق سندھ حکومت کی رپورٹ مسترد کرتے ہوئے انسپکٹر جنرل (آئی جی) سندھ کو عدالت میں طلب کر لیا۔

    تفصیلات کے مطابق سندھ کے تعلیمی اداروں میں منشیات سپلائی سے متعلق از خود نوٹس پر سپریم کورٹ نے آئندہ سماعت پر آئی جی سندھ کو طلب کر لیا۔ سپریم کورٹ نے سندھ میں منشیات سے متعلق رپورٹ مسترد کر دی۔

    جسٹس عمر عطا بندیال نے کہا کہ سندھ حکومت کی اس رپورٹ سے اتفاق نہیں کرتے، کراچی منشیات فروخت اور استعمال میں دنیا میں دسویں نمبر پر ہے، کیا آئی جی سندھ نے ان حقائق کو چیک کیا ہے۔

    سپریم کورٹ نے سماعت غیر معینہ مدت تک ملتوی کر کے رپورٹ طلب کرلی۔

    خیال رہے کہ چند روز قبل جاری کی گئی ایک رپورٹ کے مطابق کراچی دنیا میں سب سے زیادہ چرس استعمال کرنے والے شہروں کی فہرست میں دوسرے نمبر پر ہے۔

    تحقیق کے مطابق کراچی میں سالانہ 42 ٹن چرس پی جاتی ہے۔ فہرست میں امریکی شہر نیویارک پہلے اور بھارتی دارالحکومت نئی دہلی تیسرے نمبر پر ہے۔

  • تمام مدارس کو رجسٹرڈ کیا جائے گا، رجسٹرڈ ہوئے بغیر کام نہیں کر سکیں گے: شفقت محمود

    تمام مدارس کو رجسٹرڈ کیا جائے گا، رجسٹرڈ ہوئے بغیر کام نہیں کر سکیں گے: شفقت محمود

    اسلام آباد: وفاقی وزیر تعلیم شفقت محمود نے کہا ہے کہ تمام مدارس کو رجسٹرڈ کیا جائے گا، جو مدارس رجسٹرڈ نہیں ہوں گے وہ کام نہیں کر سکیں گے۔

    تفصیلات کے مطابق آج ایک پریس کانفرنس میں وزیر تعلیم نے مدارس کی رجسٹریشن کے حوالے سے خصوصی گفتگو کی، کہا ملک بھر میں تمام مدارس کو رجسٹرڈ کیا جا رہا ہے۔

    ان کا کہنا تھا کہ مدارس کی رجسٹریشن چند شرایط کے مطابق ہوگی، رجسٹریشن کے لیے ریجنل آفسز مدارس انتظامیہ کی مدد کریں گے۔

    وزیر تعلیم نے واضح طور پر عندیہ دیا کہ جو مدارس رجسٹرڈ نہیں ہوں گے وہ کام ہی نہیں کر سکیں گے، رجسٹرڈ ہونے والے مدارس کی مالی مدد کی جائے گی۔

    شفقت محمود کا کہنا تھا کہ مدارس اب وفاقی وزارتِ تعلیم سے منسلک ہوں گے، ہم مدرسوں کی بڑی قدر کرتے ہیں، مدارس کے نصابِ تعلیم کو از سرنو ترتیب دینے کے لیے اقدامات کر رہے ہیں۔

    یہ بھی پڑھیں: ملک بھر کے مدارس کی جیو ٹیگنگ اور رجسٹریشن پر رپورٹ مرتب

    انھوں نے مزید کہا کہ مدارس کو ٹریننگ بھی دی جائے گی، یہ 6 مئی کو طے ہوا تھا، جو مضامین میٹرک کے لیے لازمی ہیں وہ مدارس میں بھی لازمی ہوں گے، لازمی مضامین کا امتحان فیڈرل بورڈ لے گا۔

    وزیر تعلیم شفقت محمود کا یہ بھی کہنا تھا کہ دینی مدارس کو بینک کی سہولت بھی دی جائے گی۔

    واضح رہے کہ اپریل میں کہا گیا تھا کہ ملک بھر کے دینی مدارس کو وزارت تعلیم کے ماتحت لانے کے لیے جیوٹیگنگ اور رجسٹریشن جاری ہے، نیکٹا نے پہلی رپورٹ بھی تیار کر لی ہے، پنجاب میں 90 فیصد رجسٹریشن مکمل کرلی گئی ہے۔

  • منشیات کے 80 فی صد خریدار طالب علم ہیں: ایڈیشنل آئی جی کراچی

    منشیات کے 80 فی صد خریدار طالب علم ہیں: ایڈیشنل آئی جی کراچی

    کراچی: ایڈیشنل آئی جی کراچی ڈاکٹر امیر شیخ نے کہا ہے کہ پولیس جب کسی منشیات فروش کو پکڑتی ہے تو تفتیش میں معلوم ہوتا ہے کہ 80 فی صد خریدار طالب علم ہیں۔

    تفصیلات کے مطابق جامعہ کراچی کے سِوک اینڈ سوشل ریسپانسیبلیٹی سوسائٹی کے زیرِ اہتمام منعقدہ سیمینار میں اے آئی جی نے طلبہ میں منشیات کے استعمال کے بڑھتے رجحان پر تشویش کا اظہار کیا۔

    [bs-quote quote=”لیٹ نائٹ پارٹیز کا ٹرینڈ بڑھ گیا ہے، جن میں تعلیمی اداروں کے نوجوان اور ہاسٹل کی لڑکیاں شریک ہوتی ہیں۔” style=”style-8″ align=”left” author_name=”ڈاکٹر امیر شیخ”][/bs-quote]

    ڈاکٹر امیر شیخ نے اپنے خطاب میں افسوس کا اظہار کرتے ہوئے کہا کہ منشیات فروش پکڑا جائے تو پتا چلتا ہے کہ منشیات کے 80 فی صد خریدار طالب علم ہیں۔

    ایڈیشنل آئی جی کراچی کا کہنا تھا کہ کراچی میں نوجوان طلبہ بھی ڈرگ سپلائی کرتے ہوئے پکڑے جا رہے ہیں، جس پر جتنی زیادہ تشویش کی جائے کم ہے۔

    کراچی پولیس چیف نے بتایا کہ آج کل لیٹ نائٹ پارٹیز کا ٹرینڈ بڑھ گیا ہے، رات گئے تک جاری رہنے والی ان پارٹیوں میں تعلیمی اداروں کے نوجوان اور ہاسٹل کی لڑکیاں شریک ہوتی ہیں۔

    ایڈیشنل آئی جی نے مزید بتایا کہ بچے گھر سے نکلتے ہوئے یہ بتا کر جاتے ہیں کہ ہوٹل جا رہے ہیں، لیکن وہ لیٹ نائٹ پارٹیوں میں جا کر منشیات کے عادی ہو چکے ہیں۔

    یہ بھی پڑھیں:  آئی جی سندھ کا وومن پولیس فورس کےمسائل ترجیحی بنیادوں پرحل کرنے کا حکم

    ڈاکٹر امیر شیخ نے طلبہ کی گم راہی کی ذمہ داری والدین پر بھی ڈالتے ہوئے کہا کہ گھر والوں کو بھی دیکھنا چاہیے کہ ان کے بچے کہاں جا رہے ہیں۔

    آج آئی جی سندھ ڈاکٹر سید کلیم امام نے خواتین پولیس افسران و اہل کاروں پر مشتمل دربار سے خطاب میں کہا ہے کہ ماں کی گود سے بچے کی تعلیم و تربیت کے عمل کا آغاز ہوتا ہے۔عزت، وقار، رتبے اور تعظیم کی لڑیوں سے پروئی گئی عورت کا ہر روپ معاشرے میں قابل احترام اور لائق ستائش ہے۔