Tag: تعلیم

اسلام آباد: وزیراعظم عمران خان نے کہا ہے کہ نوجوانوں کے لیے ضروری ہے تعلیم کے حصول میں آسانیاں فراہم کی جائیں۔

تفصیلات کے مطابق وزیراعظم کی زیرصدارت ملک میں ٹیلی کام شعبے سے متعلقہ ایشوز سے متعلق اجلاس ہوا جس میں ملک میں انٹرنیٹ کی وسیع اور بہتر کوریج کو یقینی بنانےسے متعلق تبادلہ خیال کیا گیا۔

اجلاس میں وفاقی وزرا شفقت محمود، حماد اظہر، امین الحق، اسد عمر، عبدالحفیظ شیخ، معاون خصوصی تانیہ ایدرس، سیکریٹری انفارمیش ٹیکنالوجی ڈویژن، چیئرمین پی ٹی اے ، سی ای او یونیورسل سروس فنڈ و دیگر حکام نے شرکت کی۔

وزیراعظم کے زیر صدارت اجلاس میں ٹیلی کام سیکٹر سے متعلق ایشوز کے حل اور یونیورسل سروس فنڈ یو ایس ایف کے مختلف منصوبوں پر بھی تبادلہ خیال کیا گیا۔

اس موقع پر وزیراعظم عمران خان نے تعلیم کے فروغ کے لیے ٹیلی اسکولنگ کی فراہمی کے اقدامات کو سراہتے ہوئے کہا کہ نوجوانوں کے لیے ضروری ہے تعلیم کے حصول میں آسانیاں فراہم کی جائیں۔

وزیراعظم پاکستان نے ہدایت کی کہ تعلیم کو یو ایس ایف کے دائرے میں شامل کرنے کے لیے اقدامات کو تیز کیا جائے۔

اسلام آباد: میٹرک کے نتائج سے متعلق پالیسی میں ایک بار پھر تبدیلی کر دی گئی ہے، میٹرک میں 40 فی صد مضامین میں فیل طلبہ کو پاس کر دیا جائے گا۔

تفصیلات کے مطابق میٹرک میں چالیس فی صد مضامین میں فیل ہونے والے طلبہ کو پاس کرنے کا فیصلہ کر لیا گیا ہے، فیڈرل بورڈ آف انٹرمیڈیٹ نے امتحانی پالیسی میں تبدیلی کا نوٹیفکیشن جاری کر دیا۔

بورڈ حکام کا کہنا ہے کہ سابق یا پرائیویٹ امیدوار اس پالیسی سے مستفید ہو سکیں گے، سابق یا پرائیویٹ امیدوار جو 40 فی صد مضامین میں فیل تھے انھیں پاس کر دیا جائے گا، ایسے امیدواروں کے نتائج کا اعلان جلد کر دیا جائے گا۔

واضح رہے کہ اس سے قبل سابق اور پرائیویٹ امیدواروں کو سالانہ نتائج میں پاس نہیں کیا گیا تھا۔

وفاقی وزارت تعلیم کا کار نامہ، میٹرک کے ہزاروں طلبا کا مستقبل داؤ پر لگ گیا

وفاقی وزارت تعلیم کی جانب سے میٹرک کے ہزاروں طلبہ کا مستقبل اس وقت داؤ پر لگایا گیا تھا جب فیڈرل بورڈ نے میٹرک نتائج میں سپلی والے طلبہ کو پاس ہی نہیں کیا، جس کے باعث طالب علم شدید ذہنی اذیت کا شکار ہوئے، سیکڑوں بچوں نے امتیازی تعلیمی پالیسی کے خلاف بورڈ میں درخواستیں بھی دائر کر دی تھیں۔

اس سے قبل وفاقی وزیر تعلیم شفقت محمود نے پریس کانفرنس میں اعلان کیا تھا کہ کرونا کے باعث تعلیمی امتحان بورڈ کوئی امتحان نہیں لے گا، فیڈرل بورڈ کے لیے نئی امتحانی پالیسی کا نوٹی فکیشن بھی جاری کیا گیا، جس کے مطابق میٹرک امتحانات میں امیدواروں کو بغیر امتحان پاس کیا جانا تھا، جن کی سپلی تھی ان کے لیے فیصلہ کیا گیا کہ وہ نئے سرے سے امتحان دیں گے۔

لاہور: ترجمان پنجاب حکومت مسرت جمشید کا کہنا ہے کہ تعلیم اور صحت بزدار حکومت کی اولین ترجیحات ہیں۔

تفصیلات کے مطابق لاہور میں ترجمان پنجاب حکومت مسرت جمشید سے فرسٹ سیکریٹری برٹش ہائی کمیشن نے ملاقات کی جس میں پنجاب کی تعمیر و ترقی، باہمی دلچسپی کے امور پر تبادلہ خیال کیا گیا۔

اس موقع پر مسر جمشید کا کہنا تھا کہ پنجاب حکومت نے تمام وسائل کا رخ عوام کی جانب موڑا ہے، تعلیم اور صحت بزدار حکومت کی اولین ترجیحات ہیں۔

ترجمان پنجاب حکومت نے کہا کہ برطانیہ کے تعاون سےعوامی فلاح کے کئی منصوبوں پر کام جاری ہے۔

دوسری جانب فرسٹ سیکریٹری برٹش ہائی کمیشن ٹام ڈی فانبلینکی کا کہنا تھا کہ تمام طبقات کو حقوق،اختیارات دیے جانا قابل ستائش ہے، پاکستان اور پنجاب کی عوام کی مدد اور پارٹنرشپ کے لیے ہمہ وقت تیار ہیں۔

فرسٹ سیکریٹری برٹش ہائی کمیشن نے پنجاب اسمبلی کا دورہ بھی کیا، اسپیکر پرویزالٰہی سےملاقات کی۔ وزیر قانون راجہ بشارت نے انہیں بریفنگ کے دوران بتایا کہ تحریک انصاف کی حکومت میں پنجاب اسمبلی نےمختصر مدت میں 49 قوانین پاس کروائے۔

فرسٹ سیکریٹری ٹام ڈی فانبلینکی نے وزٹرزگیلری سے پنجاب اسمبلی اجلاس کی کارروائی بھی دیکھی۔

کراچی: وزیراعلیٰ سندھ مراد علی شاہ کا کہنا ہے کہ ہم تعلیم کے شعبے میں بہتری لانے کے لیے کوشاں ہیں۔

تفصیلات کے مطابق کراچی میں وزیراعلیٰ سندھ مراد علی شاہ سے وفاقی وزیر تعلیم شفقت محمود نے ملاقات کی۔صوبائی وزیر تعلیم سعید غنی اور وزیراعلیٰ سندھ کے پرنسپل سیکریٹری ساجدجمال بھی ملاقات میں شریک تھے۔

ملاقات میں کروناوائرس کے خطرات سے متعلق بات چیت کی گئی۔ وفاقی وزیر تعلیم نے سندھ حکومت کی جانب سے کیے جانے والے اقدامات کو بھی سراہا۔

شفقت محمود کا کہنا تھا کہ یکساں تعلیمی نظام پورے ملک کے لیے تشکیل دیا ہے، یہ سرکاری، غیرسرکاری،انگلش میڈیم اسکولوں میں پڑھایا جائے گا، مدارس کی رجسٹریشن کے ساتھ ڈویژنل کمیٹیز قائم کر رہے ہیں۔

اس موقع پر وزیراعلیٰ سندھ مراد علی شاہ کا کہنا تھا کہ سندھ حکومت وزارت تعلیم سے تعلیم کی بہتری کے لیے تعاون کرےگی، ہم تعلیم کے شعبے میں بہتری لانے کے لیے کوشاں ہیں۔

یاد رہے کہ گزشتہ ہفتے تفریب سے خطاب کرتے ہوئے وفاقی وزیر تعلیم شفقت محمود کا کہنا تھا کہ وزیراعظم ہنرمند پروگرام نوجوانوں کو اپنے پاؤں پر کھڑا ہونے اور معیشت مضبوط کرنے میں مددگار ثابت ہوگا۔

کراچی: وزیر تعلیم سندھ سعید غنی نے کراچی سمیت سندھ بھر کے کالجز میں صبح کی اسمبلی لازمی قرار دے دی۔

تفصیلات کے مطابق وزیر تعلیم کا قلمدان سنبھالتے ہی سعید غنی کالجز میں تعلیمی ماحول بہتر بنانے کے لیے متحرک ہوگئے اس سلسلے میں وزیر تعلیم نے اہم اقدام اٹھایا ہے۔

وزیر تعلیم نے صوبے کے تمام کالجز میں صبح کی اسمبلی لازمی قرار دینے کے احکامات جاری کردیے ہیں جس کے بعد نوٹیفکیشن جاری کردیا گیا ہے۔

نوٹیفکیشن کے مطابق کراچی سمیت سندھ بھر کے کالجز میں صبح ساڑھے 8 بجے اسمبلی لازمی ہوگی اور اس ضمن میں کالج انتظامیہ اور عملے کو ہدایات پر سختی سے عمل کرانے کا پابند کیا گیا ہے۔

دوسری جانب محکمہ تعلیم سندھ نے نئےتعلیمی سیشن کا آغاز یکم جولائی سے کرنے کا اعلان کیا ہے ، تعلیمی سیشن اسٹیئرنگ کمیٹی کی سفارشات کے مطابق شروع ہوگا۔

پرائیویٹ اسکول ایسوسی ایشن تعلیمی سیشن یکم اپریل سےشروع کرنےکامطالبہ کرتے ہوئے کہا ہے کہ سیشن ختم ہونے سے پہلےسیشن کو 16ماہ کا کر دیا گیا۔