کراچی: ایل پی جی کی قیمت میں 5 روپے فی کلو اضافہ ہو گیا ہے۔
تفصیلات کے مطابق چیئرمین ایل پی جی انڈسٹریز نے کہا ہے کہ ایل پی جی کا گھریلو سلنڈر 60 روپے، کمرشل سلنڈر 230 روپے مہنگا ہو گیا۔
ملک بھر میں ایل پی جی 100 روپے سے بڑھ کر 105 روپے فی کلو ہو گئی، چیئرمین انڈسٹریز کا کہنا ہے کہ ایل پی جی کی قیمتوں میں اضافہ تفتان بارڈر بندش کے باعث ہوا۔
ملک بھر میں روزانہ 1200 میٹرک ٹن ایل پی جی کی قلت ہے جب کہ ایل پی جی کی قیمت مزید بڑھنے کا بھی خدشہ ہے۔
تفتان بارڈر پر ایل پی جی کو پاکستانی بوزرز (ٹینکر) میں منتقل کرنے والے 14 ایل پی جی پلانٹ اسسٹنٹ کمشنر تفتان نے ہفتے کی شام سیل کر دیے، جس سے حکومتِ پاکستان کو ٹیکس کی مد میں روزانہ ڈیڑھ کروڑ روپے کے نقصان کا سامنا ہے۔
ایل پی پلانٹس کی بندش سے تقریباً 1500 افراد بھی بے روزگار ہو گئے ہیں، تفتان بارڈر سے ملک بھر میں تقریباً 2500 میٹرک ٹن ایل پی جی پر کسٹم ڈیوٹی ادا کرنے کے باوجود تقریباً 60 ایرانی گاڑیاں پاکستان میں پھنس گئی ہیں۔
اوگرا نے ایل پی جی کی قیمت میں اضافہ کردیا
ایل پی جی انڈسٹریز ایسوسی ایشن پاکستان کے چیئرمین عرفان کھوکھر نے وزیر اعظم پاکستان اور حکومت بلوچستان سے اپیل کی ہے کہ تفتان بارڈر کے قریب ایل پی جی پلانٹس کے لیے زمین الاٹ کی جائے اور ایل پی جی پلانٹس منتقل کرنے کے لیے 6 ماہ کی مہلت دی جائے۔
انھوں نے کہا ہم تمام قانونی تقاضے پورے کرنے کے لیے تیار ہیں، بلوچستان کے تمام ایل پی جی پلانٹس کو جلد بحال کیا جائے تاکہ ایل پی جی صارفین کو سستی ایل پی جی میسر رہے۔
