اسلام آباد: قومی احتساب بیورو (نیب) نے آغا سراج درانی کے گھر پر چھاپے کے معاملے پر سندھ حکومت کی جانب سے لگائے گئے تمام الزامات مسترد کر دیے۔
تفصیلات کے مطابق نیب نے آغا سراج درانی کے معاملے پر اعلامیہ جاری کرتے ہوئے کہا ہے کہ سندھ حکومت کے الزامات بے بنیاد اور جارحانہ پروپیگنڈے کا حصہ ہیں۔
[bs-quote quote=”سندھ حکومت کی طرف سے نیب پر دہشت گردی کا الزام لگانا افسوس ناک ہے۔” style=”style-8″ align=”left” color=”#dd3333″ author_name=”نیب”][/bs-quote]
اعلامیے میں کہا گیا ہے کہ نیب کسی قسم کی بد سلوکی، چادر اور چار دیواری کا تقدس پامال کرنے کا سوچ بھی نہیں سکتا۔
نیب ہر شہری کی عزتِ نفس پر مکمل یقین رکھتا ہے، آغا سراج درانی کے اہلِ خانہ کے ساتھ کسی قسم کی بد سلوکی نہیں کی گئی۔
نیب اعلامیے کے مطابق اہل کاروں نے قانون کے مطابق عدالت سے سرچ وارنٹ حاصل کیے، چھاپے کے دوران نیب اہل کاروں کے ہم راہ لیڈیز پولیس بھی موجود تھی۔
قومی احتساب بیورو نے واضح کیا ہے کہ نیب نے تمام کارروائی قانون کے مطابق کی، سندھ حکومت کی طرف سے نیب پر دہشت گردی کا الزام لگانا افسوس ناک ہے۔
تفصیل پڑھیں: قانون چادر اور چار دیواری کا تقدس پامال کرنےکی اجازت نہیں دیتا: وزیرِ اعلیٰ سندھ
خیال رہے کہ وزیرِ اعلیٰ سندھ سید مراد علی شاہ نے آغا سراج درانی کے خلاف نیب کی کارروائی پر کہا ہے کہ نیب اہل کاروں نے آغا سراج کی فیملی سے بد تمیزی کی، گھر پر دھاوا بولا گیا، گیٹ توڑ کر دیواریں پھلانگ کر گھر میں داخل ہوئے، فیملی کو گھر سے نکال کر لان میں کھڑا کیا گیا۔
مراد علی شاہ نے کا کہنا تھا کہ وہ صوبے کا وزیرِ اعلیٰ ہوتے ہوئے بھی اسپیکر کو نیب کی دہشت گردی سے نہ بچا سکے، ان کی فیملی کو تحفظ نہ دے سکے۔
