چیف الیکشن کمشنر سلطان سکندر راجا کی مدت 27 جنوری کو مکمل ہو رہی ہے پی ٹی آئی نے نئے چیف کی تقرری سے متعلق خط لکھ دیا ہے۔
اے آر وائی نیوز کے مطابق چیف الیکشن کمشنر سلطان سکندر راجا اور 2 ممبران کی مدت 26 جنوری کو ختم ہو رہی ہے۔ نئے چیف الیکشن کمشنر اور ممبر سندھ اور بلوچستان کی تقرری کے لیے پی ٹی آئی کی جانب سے پارلیمانی کمیٹی تشکیل دینے کا مطالبہ کر دیا گیا ہے۔
اس سلسلے میں پی ٹی آئی رہنما اور ایوان بالا میں قائد حزب اختلاف سینیٹر سید شبلی فراز نے چیئرمین سینیٹ یوسف رضا گیلانی کو خط لکھ دیا ہے جس میں چیف الیکشن کمشنر کی تقرری کے لیے پارلیمانی کمیٹی تشکیل دینے کا مطالبہ کیا گیا ہے۔
خط میں کہا گیا ہے کہ آرٹیکل 215 کے تحت چیف الیکشن کمشنر سلطان سکندر راجا کی مدت 26 جنوری کو ختم ہو رہی ہے۔ آئین کے آرٹیکل 213 کے تحت آئینی تقاضا پورا کرنے کیلیے پارلیمانی کمیٹی تشکیل دی جائے۔
چیف الیکشن کمشنر سکندر سلطان راجا اور دونوں ممبران نے 27 جنوری 2020 کو اپنے عہدوں کا حلف اٹھایا تھا۔
واضح رہے کہ آئین کے آرٹیکل 215 کے تحت چیف الیکشن کمشنر اور ممبران الیکشن کمیشن کی مدت 5 سال مقرر کی گئی اور آرٹیکل 213 کے تحت چیف الیکشن کمشنر اور ممبران الیکشن کمیشن کی تقرری کا طریقہ کار واضح ہے۔
وزیراعظم اور قائد حزب اختلاف چیف الیکشن کمشنر اور ممبران الیکشن کمیشن کے لیے تین نام اتفاق رائے سے صدر کو بھجواتے ہیں۔ تاہم ناموں پر اتفاق نہ ہونے کی صورت میں وزیراعظم اور قائد حزب اختلاف اپنے اپنے تجویز کردہ نام پارلیمانی کمیٹی کو بھیجتے ہیں۔
https://urdu.arynews.tv/chief-election-commissioner-sultan-sikander-raja-term-ends-on-january-26/
