Tag: تلنگانہ

تلنگانہ: بھارتی ریاست تنلنگانہ میں پولیس نے ایک سیریل کلر کو گرفتار کیا ہے جس پر الزام ہے کہ اس نے خزانے کا پتا بتانے کے بہانے لوگوں کو لوٹ کر قتل کیا۔

بھارتی میڈیا رپورٹس کے مطابق تلنگانہ کے ضلع نگرکرنول میں پولیس نے منگل کو ایک سیریل کلر کو گرفتار کیا ہے، 47 سالہ رماتی ستیہ نارائن پر مبینہ طور پر 11 افراد کا بے دردی سے قتل کا الزام ہے۔

پولیس حکام نے شبہ ظاہر کیا ہے کہ رماتی نارائن نے تلنگانہ، آندھرا پردیش اور کرناٹک میں گیارہ افراد کو وحشیانہ طور پر قتل کیا، اور اس کا طریقہ کار یہ تھا کہ وہ لوگوں کو خفیہ خزانہ ظاہر کرنے کا دعویٰ کر کے ٹھگ لیتا تھا۔

پولیس رپورٹ کے مطابق ملزم لوگوں کو یقین دلا دیتا تھا کہ وہ اپنے خاص عمل کے ذریعے چھپا خزانہ ظاہر کر سکتا ہے، اس کے عوض وہ لوگوں سے رقم لیتا تھا یا زمین اپنے نام کروالیتا تھا، اور پھر سنسان جگہ پر لے جا کر متاثرہ شخص کو تیزاب یا ایک نامعلوم زہر پلا دیتا تھا، جس سے وہ نڈھال ہو کر گر جاتا تھا، اس کے بعد وہ بھارتی پتھر سے اس کا سر کچل دیتا تھا۔

ملزم 2020 سے اس قسم کی وارداتوں میں ملوث ہے اور ایک بار پولیس کے جال سے فرار ہونے میں کامیاب بھی ہوا، پولیس رپورٹ کے مطابق اب تک ملزم نے گیارہ افراد کو قتل کیا ہے، جن میں خواتین بھی شامل ہیں۔

26 نومبر کو ایک خاتون کی شکایت کے بعد پولیس نے تفتیش شروع کی تھی، خاتون نے کہا تھا کہ ان کا شوہر وینکٹیش نگرکرنول میں ستیہ نارائن نامی شخص سے ملنے گھر سے نکلا تھا لیکن پانچ دن گزرنے کے بعد بھی وہ گھر واپس نہیں آیا۔ پولیس نے تفتیش شروع کی تو ملزم رماتی ستیہ نارائن کے رویے کو مشکوک پایا۔ پولیس نے بتایا کہ ملزم ناگرکرنول میں رئیل اسٹیٹ کا کاروبار کرتا تھا اور جڑی بوٹیوں کی دوائی بھی کرتا تھا، اور وہ خزانے کی تلاش کا عادی تھا۔

اس نے اپنے رئیل اسٹیٹ دوستوں کو بھی چھپے ہوئے خزانے تلاش کرنے کی صلاحیت سے آگاہ کیا تھا، پولیس حکام کے مطابق جب ملزم نے خاتون کے شوہر وینکٹیش سے کہا کہ وہ تین حاملہ خواتین کو قربان کرے، تو اس نے گھبرا کر اپنی رقم واپس مانگ لی، جس پر ملزم نے اسے مقدس پانی کی آڑ میں زہریلی جڑی بوٹیوں کا عرق پلایا اور پہاڑی پر لے جا کر بے ہوشی کی حالت میں اس پر تیزاب ڈال کر اسے بے دردی سے قتل کر دیا۔

پولیس کا کہنا تھا کہ ملزم رماتی ستیہ نارائن نے مزید 10 افراد کے ناقابل یقین اور سنسنی خیز قتل کا اعتراف کر لیا ہے۔