اسلام آباد: پاکستانی نژاد امریکی کاروباری شخصیت عبدالحفیظ خان کے لیے تمغہ امتیاز کا اعلان کر دیا گیا۔
تفصیلات کے مطابق واشنگٹن میں موجود پاکستانی سفارت خانے کی عمارت سب سے زیادہ بولی دے کر خریدنے والی کاروباری شخصیت عبدالحفیظ خان کو ان کی سماجی خدمات کے اعتراف میں تمغہ امتیاز دینے کا اعلان کیا گیا ہے۔
امریکا کے شہر ڈلاس میں مقیم پاکستان کے شہر ملتان سے تعلق رکھنے والے عبد الحفیظ خان نے حالیہ سیلاب میں متاثرین کے لیے بڑھ چڑھ کر امداد کی اور انھیں رہنے کے لیے گھر تعمیر کر کے دیے، وہ اوورسیز کمیونٹی کی مدد میں بھی پیش پیش رہے ہیں، اور حال ہی میں انھوں نے پاکستانی سفارت خانے کی عمارت سب سے زیادہ بولی دے کر خریدی تاکہ ملکی اثاثہ کسی اور کے پاس جانے کی بجائے ایک پاکستانی کے پاس رہے۔
ان کی خدمات میں امریکی کانگریس میں بھی انھیں خراج تحسین پیش کیا گیا تھا۔
واضح رہے کہ یوم آزادی پر ملک و قوم کے لیے نمایاں خدمات کے اعتراف میں حکومت نے 304 شخصیات کے لیے اعزازات کا اعلان کیا ہے، جن کا تعلق تعلیم، سائنس، ٹیکنالوجی،آرٹس، کلچر، صحافت اور پبلک سروس سمیت مختلف شعبوں سے ہے۔
سعودی عرب کے وزیر دفاع خالد بن سلمان آل سعود اور چینی نائب وزیر اعظم ہی لیفنگ کو ہلال پاکستان سے نوازا جائے گا، صحافت میں گراں قدر خدمات پر حیدر نقوی کو تمغہ امتیاز سے نوازا جائے گا، ہلال امتیاز کے لیے نامزد ہونے والوں میں مرحوم مفتی عبدالشکور، پروفیسر ڈاکٹر محمد عمر، پروفیسر ڈاکٹر مختار احمد اور امجد ثاقب کے نام شامل ہیں۔
سابق ہاکی اولمپیئن اصلاح الدین صدیقی، ڈاکٹر شمشاد اختر اور معروف شاعر افتخار عارف کونشان امتیاز کے لیے نامزد کیا گیا ہے، معروف موسیقار اور گلوکار راحت فتح علی خان، آرٹس کونسل کے صدر احمد شاہ، صحافی زاہد ملک کو بھی ہلال امتیاز سے نوازا جائے گا۔
ستارہ امتیاز کے لیے نامزد ہونے والوں میں مفتی منیب الرحمان، کوہ پیما نائلہ کیانی، گلوکار فاخر محمود، اداکار سرمد کھوسٹ، فلم ڈائریکٹر بلال لاشاری کے نام بھی نمایاں ہیں، صدارتی ایوارڈ برائے حسن کارکردگی کے لیے اداکار عدنان صدیقی، شیما کرمانی کو نامزد کیا گیا ہے، اداکارہ سجل علی کو تمغہ امتیاز سے نواز جائے گا۔
