آمدنی اٹھنی خرچہ روپیہ آج کل سب کا یہی مسئلہ ہے اگر آپ بھی نجی ادارے میں ملازم ہیں اور تنخواہ نہیں بڑھ رہی تو یہ طریقے آزمائیں۔

دنیا بھر میں مہنگائی آسمان سے باتیں کر رہی ہے اور تنخواہ دار طبقے کا اس مہنگائی میں گزر بسر کرنا مشکل تر ہوتا جا رہا ہے۔ نجی اداروں کے ملازمین کی اکثریت کا مسئلہ کم تنخواہ یا پھر اس میں اضافہ نہ ہونا ہے جو ان کی پریشانی بڑھا دیتا ہے۔

نجی اداروں میں ملازمین کی تنخواہوں میں اضافے کا انحصار جہاں باسز کی اپروول پر منحصر ہوتا ہے۔ وہیں ملازم کی ذاتی کارکردگی بھی اس پر اثر انداز ہوتی ہے۔

کم تنخواہ یا انکریمنٹ نہ لگنے سے پریشان اکثر ملازمین مایوسی میں ملازمت چھوڑنے کا سوچنے لگتے ہیں۔ تاہم آج کل ملازمت ملنا بھی آسان نہیں ہے۔ اگر آپ کو بھی ایسا ہی مسئلہ درپیش ہے، تو ملازمت چھوڑنے سے قبل یہ طریقے آزمائیں تو غالب امکان ہے کہ آپ کی تنخواہ بڑھ جائے گی۔

تنخواہ بڑھوانے کا پہلا موثر طریقہ؟

اگر آپ سمجھتے ہیں کہ آپ کی تنخواہ کم ہے یا قابلیت کے مطابق آپ کو معاوضہ نہیں مل رہا تو اس کا گلہ اپنے دفتری ساتھیوں سے کرنے کے بجائے باس سے براہ راست کھل کر بات کریں۔

کیونکہ ساتھیوں کے ساتھ تنخواہ کم کی بات کرنے سے مسئلہ حل نہیں ہوگا۔ آپ اپنے باس اس بارے کھل کر بات کریں اور انہیں ادارے کے لیے اپنی خدمات بتائیں اور تمام حقائق سامنے رکھتے ہوئے انہیں قائل کرنے کی کوشش کریں کہ آپ کی تنخواہ یا انکریمنٹ آپ کی محنت کے مقابلے میں کم ہے۔

آپ کی بات کا باس پر کیا اثر ہوتا ہے، یہ آپ اپنا مدعا کتنے پیشہ ورانہ اور پرسکون انداز میں ان کے سامنے پیش کرتے ہیں۔ اگر آپ کو لگے کہ باس اس معاملے میں دلچسپی نہیں لے رہے تو باس سے پوچھ سکتے ہیں کہ وہ اس بارے میں دوبارہ کب بات کر سکتے ہیں۔

تنخواہ بڑھوانے کا دوسرا موثر طریقہ؟

اگر آپ کی تنخواہ نہیں بڑھ رہی یا انکریمنٹ نہیں مل رہا تو دیکھیں کہیں آپ سے کوتاہی تو نہیں ہو رہی ہے۔ اس کے لیے آپ اپنی صلاحیتوں میں اضافہ کریں۔ ضروری نہیں کہ آپ کو ذمہ داری سونپی جائے تب ہی آپ کام کریں، ادارے کی پالیسی میں رہتے ہوئے کام میں جدت اور مہارت لا کر بھی اپنی کارکردگی کو بہتر اور ادارے میں اپنی ساکھ کو بہتر بنایا جا سکتا ہے۔

آپ کے ایسا کرنے سے ادارہ کبھی یہ نہیں چاہے گا کہ آپ ان کا ادارہ چھوڑ کر جائیں۔

اگر آپ برسوں سے کسی کمپنی میں کام کر رہے ہیں۔ اور اتنی کوششوں کے باوجود اگر آپ کی تنخواہ نہیں بڑھ رہی تو اس صورتحال میں نئی ملازمت تلاش کریں۔ نئے ادارے میں آپ کو اچھے پیکیج کے ساتھ ملازمت کا نیا کردار آپ کی صلاحیتوں کو مزید نکھار سکتا ہے۔

تاہم ملازمت چھوڑتے وقت جلد بازی سے کام لینے کے بجائے اپنے کام، تجربے، قابلیت اور مارکیٹ ویلیو سے متعلق ضرور معلومات حاصل کریں تاکہ نئی جگہ آپ کو آسانی ہو۔

تنخواہ نہیں بڑھتی، دوسری ملازمت بھی نہیں تو پھر کیا کریں؟

اگر آپ کی تنخواہ بھی نہیں بڑھ رہی اور مطلوبہ اچھی نوکری بھی نہیں مل رہی تو پھر اضافی آمدنی کے لیے سوچیں۔ اس کے لیے آپ فری لانسنگ اور پارٹ ٹائم پراجیکٹس کے ذریعہ معقول آمدنی کما سکتے ہیں۔ آن لائن بزنس کر سکتے ہیں۔ تاہم یہ کام کرنے سے قبل اپنے ادارے کی پالیسی جان لیں کہ کہیں آپ کا کوئی پارٹ ٹائم کام کمپنی پالیسی کے خلاف تو نہیں۔