ARYNews.tv | Urdu – Har Lamha Bakhabar

Tag: تنزانیہ

  • خطرناک وائرس کا پھیلاؤ، 8 افراد جان سے گئے

    خطرناک وائرس کا پھیلاؤ، 8 افراد جان سے گئے

    افریقی ملک تنزانیہ میں مشتبہ ماربرگ وائرس نے ہلچل مچادی ہے، جس کے نتیجے میں اب 8 افراد لقمہ اجل بن چکے ہیں۔

    بین الاقوامی خبر رساں ادارے کی رپورٹ کے مطابق عالمی ادارہ صحت کا اس حوالے سے کہنا ہے کہ ماربرگ وبا کے پھیلاؤ سے ممبر ممالک کو آگاہ کردیا گیا ہے۔

    عالمی ادارہ صحت کے چیف ٹیڈروس ایڈہانوم کا کہنا ہے کہ تنزانیہ میں ماربرگ وائرس کے 9 کیس سامنے آچکے ہیں جس سے 8 افراد ہلاک ہوچکے ہیں۔

    عالمی ادارہ صحت نے متاثرہ کمیونیٹیز کو مدد کی پیش کش کی ہے۔ خدشہ ظاہر کیا ہے کہ آئندہ دنوں میں اس وائرس کے مزید کیسز سامنے آئیں گے۔

    غیر ملکی میڈیا کے مطابق ماربرگ ایک انتہائی متعدی ہیمرج بخار کا سبب بنتا ہے، یہ مرض پھل کھانے والے چمگادڑوں سے انسانوں میں پھیل جاتا ہے۔

    دوسری جانب ایچ ایم پی وی وائرس کا بھارت میں پہلا کیس سامنے آیا ہے، بنگلورو میں 8 ماہ کی بچی وائرس سے متاثر ہوئی ہے۔

    رپورٹس کے مطابق کووڈ-19 وبا کے بعد اب اچ ایم پی وی نام کے وائرس نے چین میں دہشت پھیلا رکھی ہے۔ تاہم اب بھارت میں بھی اس کا کیس سامنے آنے کے بعد حکام میں تشویش کی لہر دوڑ گئی ہے۔

    رپورٹس کے مطابق اس وائرس کا پہلا کیس بنگلورو میں رپورٹ ہوا ہے۔ بنگلورو کے ایک اسپتال میں 8 مہینے کی بچی میں ایچ ایم پی وی وائرس کی تصدیق ہوئی ہے۔

    محکمہ صحت کے مطابق ہم نے ہماری لیب میں اس کا ٹیسٹ نہیں کیا ہے۔ ایک پرائیویٹ اسپتال میں اس کے معاملے کی رپورٹ آئی ہے۔ پرائیویٹ اسپتال کی اس رپورٹ پر شبہ کرنے کی کوئی وجہ نظر نہیں آتی۔

    بھارتی میڈیا کی رپورٹس کے مطابق بنگلورو کے ایک اسپتال میں 8 مہینے کی بچی میں ایچ ایم پی وی وائرس کی تصدیق ہوئی ہے۔ بچی کو بخار کی وجہ سے اسپتال لایا گیا تھا، بھارت کی حکومت نے اس حوالے سے ایڈوائزری بھی جاری کردی ہے۔

    ایچ ایم پی وی وائرس کی دیگر ممالک میں بھی انٹری

    رپورٹس کے مطابق ایچ ایم پی وی وائرس عام طور پر بچوں میں ہی ڈٹیکٹ ہوتا ہے۔ سبھی فلو سیمپل میں سے 0,7 فیصد ایچ ایم پی وی کے ہوتے ہیں۔ اس وائرس کا اسٹرین نیا ہے۔ اس کا ابھی پتہ نہیں چل پایا ہے۔

  • جعلی دستاویزات پر تنزانیہ جانے کی کوشش، پاسپورٹ پر ٹمپرنگ کرنے والا مسافر گرفتار

    جعلی دستاویزات پر تنزانیہ جانے کی کوشش، پاسپورٹ پر ٹمپرنگ کرنے والا مسافر گرفتار

    ایف آئی اے امیگریشن سیالکوٹ نے جعلی دستاویزات پر تنزانیہ اور سعودی عرب جانے کی کوشش کرنے والے 2 مسافروں کو گرفتار کر لیا۔

    تفصیلات کے مطابق ایف ائی اے سیالکوٹ نے دو مسافروں عبد الرحمٰن اور محمد خلیل کو گرفتار کیا ہے، جن میں سے ایک نے جعلی دستاویزات پر تنزانیہ اور دوسرے نے سعودی عرب جانے کی کوشش کی تھی۔

    ملزم عبدالرحمٰن نے اپنے پاسپورٹ پر ٹمپرنگ کی، اور پاسپورٹ پر لگے ساوٴتھ افریقہ کے ویزے کی تاریخ تبدیل کی، ملزم کے ویزے کی معیاد 10 اکتوبر تھی جب کہ ملزم نے معیاد کو ٹمپرنگ کرتے ہوئے 18 اکتوبر کر دیا۔

    ایف آئی اے کی دوسری کارروائی میں ملزم محمد خلیل کو گرفتار کیا گیا، ایف آئی اے کے مطابق ملزم نے فلائٹ نمبر PF 720 کے ذریعے سعودی عرب جانے کی کوشش کی تھی، جب کہ ملزم کا پاسپورٹ اس سے قبل بھی بیرون ملک روانگی کے لیے استعمال ہوا تھا، اور اس کے پاسپورٹ اور سسٹم میں بیرون ملک آمد کے حوالے سے کسی قسم کا ریکارڈ موجود نہ تھا۔

    کرکٹ کلب کی آڑ میں جعلی دستاویزات کی بنیاد پر امریکا جانے کی کوشش کرنے والا ملزم گرفتار

    شک کی بنیاد پر ملزم سے تفتیش کی گئی تو ابتدائی تفتیش میں معلوم ہوا کہ ملزم کے بھائی نے اس سے قبل مذکورہ پاسپورٹ اور شناختی کارڈ پر سفر کیا تھا۔

    گرفتار ملزمان کو مزید قانونی کارروائی کے لیے انسدادِ انسانی اسمگلنگ سرکل گوجرانوالہ منتقل کر دیا گیا ہے۔

  • تنزانیہ کے فٹبال اسٹیڈیم میں بھگدڑ، ایک شخص ہلاک، متعدد زخمی

    تنزانیہ کے فٹبال اسٹیڈیم میں بھگدڑ، ایک شخص ہلاک، متعدد زخمی

    تنزانیہ کے فٹبال اسٹیڈیم میں بھگدڑ مچنے سے ایک شخص ہلاک اور 30 سے زائد افراد زخمی ہو گئے۔

    غیر ملکی میڈیا رپورٹ کے مطابق بھگدڑ اس وقت ہوئی جب تنزانیہ اور الجزائر کی مقامی ٹیموں کے درمیان سی اے ایف کنفیڈریشن کپ کے پہلے مرحلے کا فائنل دیکھنے کے لیے بڑی تعداد میں لوگ پہنچے تھے۔

    اسٹیدیم انتظامیہ کا کہنا ہے کہ واقع سے متعلق مزید تحقیقات کر رہیں ہیں۔

    واضح رہے کہ گزشتہ برس وسطی افریقی ملک کیمرون میں افریقی نیشن کپ کے میچ کے دوران اسٹیڈیم کے باہر بھگدڑ مچنے سے 8 افراد ہلاک اور 50 سے زائد زخمی ہو گئے تھے۔

    انتظامیہ کے مطابق میچ دیکھنے کے لیے 50 ہزار سے زائد افراد نے اسٹیدیم میں داخل ہونے کی کوشش کی جس دوران بھگدڑ مچی گئی تھی۔

  • تنزانیہ : مسافر طیارہ خوفناک حادثے کا شکار، 19افراد ہلاک

    تنزانیہ : مسافر طیارہ خوفناک حادثے کا شکار، 19افراد ہلاک

    دارالسلام : تنزانیہ کی وکٹوریہ جھیل میں مسافر طیارہ گر کر تباہ ہوگیا ، جس کے نتیجے میں 19افراد جان سے گئے۔

    تفصیلات کے مطابق تنزانیہ میں مسافر طیارے کے حادثے میں انیس افراد ہلاک ہو گئے، طیارہ بکوبا ایئرپورٹ پرلینڈنگ سے پہلے تباہ ہوکر وکٹوریہ جھیل میں گر گیا۔

    تنزانیہ براڈکاسٹنگ کارپوریشن نے رپورٹ میں بتایا ہے کہ مسافر طیارہ دارالحکومت دارالسلام سے روانہ ہوا تھا موسم کی خرابی کے باعث مسافر طیارہ بکوبا ائیرپورٹ پر لینڈنگ کرنے والا تھا لیکن طوفان اور شدید بارشوں کی وجہ سے وکٹوریہ جھیل میں گر گیا۔

    سوشل میڈیا پر گردش کرنے والی ویڈیو میں طیار ے کو مکمل طور پر ڈوبا ہوا دکھا جا سکتا ہے جبکہ طیارے کا کچھ پچھلا حصہ اور ٹیل پانی کی لکیر کے اوپر دکھائی دے رہی ہے۔

    طیارے میں عملے کے اراکان سمیت انچاس افراد سوار تھے، طیارہ تیزہوا اور بارش کی وجہ سے حادثے کا شکار ہوا۔

  • تنزانیہ کا مسافر طیارہ جھیل میں جا گرا

    تنزانیہ کا مسافر طیارہ جھیل میں جا گرا

    نیروبی: تنزانیہ میں ایک مسافر طیارہ جھیل میں جا گرا، جس میں سوار مسافروں میں سے 26 کو بچا لیا گیا ہے، دیگر کی تلاش جاری ہے۔

    تفصیلات کے مطابق تنزانیہ کے ریاستی نشریاتی ادارے نے بتایا کہ ایک مسافر طیارہ اتوار کو تنزانیہ کی جھیل وکٹوریہ میں اس وقت گر کر تباہ ہو گیا، جب طوفانی موسم میں اس نے جھیل کے کنارے آباد شہر بوکوبا کے ہوائی اڈے پر لینڈ کرنے کی کوشش کی۔

    بی بی سی کے مطابق بوئنگ طیارے میں 43 افراد سوار تھے، جن میں سے 26 کو بچا کر اسپتال منتقل کر دیا گیا ہے، جب کہ ریسکیو کارکن اور مقامی ماہی گیر دیگر افراد کی تلاش میں مصروف ہیں۔

    حادثے کی ویڈیوز میں نظر آتا ہے کہ طیارہ پانی میں ڈوب چکا ہے، اور صرف اس کی دم پانی سے نکلی ہوئی ہے، اور اس کے چاروں طرف امدادی کارکنوں اور ماہی گیری کی کشتیاں ہیں۔

    واضح رہے کہ بوکوبا ہوائی اڈے کے رن وے کا ایک سرا افریقہ کی سب سے بڑی جھیل وکٹوریہ کے کنارے کے بالکل قریب واقع ہے۔

    پریسیژن ایئر کی پرواز تنزانیہ کے سب سے بڑے شہر دار السلام سے بکوبا کے راستے موانزا جا رہی تھی، جب مبینہ طور پر اسے طوفان اور شدید بارشوں کا سامنا کرنا پڑا۔

  • افریقی سوشل میڈیا اسٹار علی ظفر کے گانے پر جھوم اٹھے

    افریقی سوشل میڈیا اسٹار علی ظفر کے گانے پر جھوم اٹھے

    معروف پاکستانی گلوکار علی ظفر کا گانا جھوم گو کہ کئی سال پہلے ریلیز کیا گیا تھا لیکن وہ اب ایک بار پھر سے مشہور ہورہا ہے۔

    عالمی شہرت یافتہ سوشل میڈیا اسٹار کلی پال بھی علی ظفر کے گانے پر جھوم اٹھے۔

    تنزانیہ سے تعلق رکھنے والے سوشل میڈیا اسٹار کلی پال اور ان کی بہن نے اس مرتبہ پاکستان کے معروف گلوکار علی ظفر کے مشہور گانے جھوم کا انتخاب کیا اور اس پر لپسنگ ویڈیو بنائی۔

     

    View this post on Instagram

     

    A post shared by Kili Paul (@kili_paul)

    کلی پال نے علی ظفر کے گانے کے لیے پسندیدگی کا اظہار کرتے ہوئے اپنی پوسٹ کے کیپشن میں جھوم کو ماسٹر پیس قرار دیتے ہوئے اپنی پوسٹ میں انہیں ٹیگ بھی کیا۔

  • ادب کا نوبل انعام تنزانیہ کے ناول نگار عبدالرزاق گُرناہ نے حاصل کر لیا

    ادب کا نوبل انعام تنزانیہ کے ناول نگار عبدالرزاق گُرناہ نے حاصل کر لیا

    ادب کا نوبل انعام تنزانیہ کے ایک 73 سالہ ناول نگار عبدالرزاق گُرناہ کے نام رہا۔

    تفصیلات کے مطابق سویڈش اکیڈمی آف نوبل پرائز نے سال 2021 کا ادب کا نوبل انعام تنزانیہ کے ادیب عبدالرزاق گرناہ کو دینے کا اعلان کر دیا ہے۔

    تنزانوی نژاد برطانوی مصنف عبدالرزاق نے دس ناول لکھے ہیں، گُرناہ نے نو آبادیاتی افریقا کے مسائل اور دنیا پر نو آبادیاتی نظام کے اثرات کو اپنی تخلیقات کا حصہ بنایا، انھوں نے 21 برس کی عمر میں انگریزی میں لکھنا شروع کیا تھا، تاہم ان کی مادری زبان سواحلی تھی۔

    نوبل پرائز کمیٹی کے مطابق عبدالرزاق کو، تہذیبوں پر نوآبادیات کے اثرات اور پناہ گزینوں کے ساتھ مختلف براعظموں میں پیش آنے والے مصائب کو، انتہائی آسان الفاظ میں بیان کرنے کی وجہ سے ادب کے نوبل انعام کے لیے منتخب کیا گیا۔

    گُرناہ زنجبار جزیرے میں 1948 میں پیدا ہوئے، اور 1960 کی دہائی کے آخر میں پناہ گزین کی حیثیت سے برطانیہ ہجرت کر گئے، انھوں نے برطانیہ ہی میں تعلیم حاصل کی اور وہیں ملازمت بھی اختیار کی، وہ یونیورسٹی میں ادب کے پروفیسر تعینات ہوئے۔ ریٹائرمنٹ سے قبل وہ یونیورسٹی آف کینٹ، کینٹربری میں انگریزی اور پوسٹ کالونیل لٹریچر کے پروفیسر تھے۔

    عبدالرزاق کے دس ناول اور مختصر کہانیوں کی کتابیں شائع ہو چکی ہیں، ان کا سب سے مشہور ناول ’پیراڈائز‘ 1994 میں شائع ہوا، جسے بکر پرائز کے لیے بھی نامزد کیا گیا، 2001 میں شائع ہونے والے ان کے ناول ’بائے دی سی‘ نے لوگوں کی توجہ مہاجرین کے مسائل کی جانب مبذول کروائی۔

    نوآبادیاتی دور میں پیدا ہونے والے تنزانیہ کے اس ناول نگار نے انگریزی میں ادب لکھا، اور ان کے موضوعات مہاجرین کے مسائل، جنگیں، غربت، ثقافتوں پر نوآبادیات کے اثرات جیسے موضوعات رہے، وہ تنزانیہ کے پہلے ادیب ہیں جنھیں نوبل انعام دیا جا رہا ہے۔

    عبدالرزاق کو رواں برس دسمبر میں نوبل انعام دیا جائے گا، انھیں تقریباً 11 لاکھ امریکی ڈالر کی رقم بھی ملے گی۔

  • مڈغاسکر سے کرونا کی حیرت انگیز دوا سے بھرا جہاز تنزانیہ پہنچ گیا

    مڈغاسکر سے کرونا کی حیرت انگیز دوا سے بھرا جہاز تنزانیہ پہنچ گیا

    ڈوڈوما: مشرقی افریقی ملک تنزانیہ نے مڈغاسکر سے منگوایا گیا اینٹی کرونا وائرس مشروب سے بھرا پہلا بحری جہاز وصول کر لیا۔

    غیر ملکی میڈیا کے مطابق عالمی ادارہ صحت (ڈبلیو ایچ او) کی جانب سے متنازعہ قرار دیے جانے والے کرونا مشروب سے بھرا بحری جہاز مڈغاسکر سے تنزانیہ پہنچ گیا، اس مشروب کے بارے میں مڈغاسکر کا دعویٰ ہے کہ یہ جڑی بوٹیوں سے تیار کردہ ہے اور کرونا وائرس کا علاج ہے۔

    دوسری طرف ورلڈ ہیلتھ آرگنائزیشن نے تنبیہ جاری کی تھی کہ اس مشروب کی افادیت غیر تصدیق شدہ ہے، افریقا سینٹرز فار ڈیزیز کنٹرول اینڈ پریوینشن نے بھی کہا تھا کہ اس ڈرنک کو سختی کے ساتھ جانچا جانا چاہیے۔

    مڈغاسکر نے کئی دن پہلے اعلان کیا تھا کہ وہ جلد کرونا وائرس کا ہربل مشروب ‘کو وِڈ آرگینکس’ کی فروخت شروع کر دیں گے، اس کے بعد تنزانیہ نے ایک جہاز منگوایا جب کہ دیگر کئی افریقی ممالک بھی یہ مشروب منگوا چکے ہیں۔

    تنزانیہ کے سرکاری ترجمان حسن عباس نے اپنے ٹویٹر اکاؤنٹ کے ذریعے کہا کہ تنزانیہ نے آج مڈغاسکر سے کرونا وائرس کی دوا کی شپمنٹ وصول کر لی ہے۔

    یہ مشروب ایک بوٹی ارٹمیسیا (artemisia) اور دیگر دیسی جڑی بوٹیوں سے تیار کیا گیا ہے، ارٹیمیسیا ایک ایسی بوٹی ہے جسے ملیریا کی دوا میں استعمال کیا جاتا ہے اور اس کی افادیت تصدیق شدہ ہے، تاہم ڈبلیو ایچ او کا کہنا ہے کہ اس بوٹی کے کچھ اجزا باقاعدہ طور پر کشید کر کے دوا میں استعمال کیے جاتے ہیں، بذات خود یہ بوٹی ملیریا کو ٹھیک نہیں کرتی۔

    یہ مشروب گزشتہ ماہ مڈغاسکر کے صدر آنڈری رجولینا نے ایک نیوز کانفرنس کے دوران لانچ کیا تھا، انھوں نے دعویٰ کیا تھا کہ اس مشروب کے استعمال سے دو مریض صحت یاب ہو چکے ہیں۔ اس اعلان کے بعد ملک میں اس مشروب کے ہزاروں بوتل فروخت کیے گئے جسے ایک ریاستی ادارہ تیار کر رہا ہے، بوتل کی قیمت 40 امریکی سینٹ رکھی گئی ہے۔

    تنزانیہ سے قبل گنی، کانگو، لائبیریا سمیت کئی افریقی ممالک کو اس مشروب کے ہزاروں بوتل مفت میں فراہم کیے جا چکے ہیں، گنی بساؤ کو 16 ہزار بوتلیں بھیجی گئی تھیں، جو اسے دیگر 14 افریقی ممالک میں تقسیم کر رہا ہے۔

    لائبیریا کے ڈپٹی وزیر اطلاعات یوگنی فرغان نے کہا کہ ہمارا اس دوا کو ٹیسٹ کرنے کا کوئی پلان نہیں ہے، یہ لائبیریا کے لوگ لائبیریا کے لوگوں ہی پر استعمال کریں گے، جہاں تک عالمی ادارہ صحت کی بات ہے تو ڈبلیو ایچ او نے دیگر مقبول مقامی ادویہ بھی کبھی ٹیسٹ نہیں کیے، مڈغاسکر ایک افریقی ملک ہے، اس لیے ہم اپنی جڑی بوٹیوں کا استعمال جاری رکھیں گے اور ایک افریقی قوم کی صورت میں آگے بڑھیں گے۔

    واضح رہے کہ تنزانیہ میں اب تک صرف 509 کرونا کیسز سامنے آ چکے ہیں جب کہ ہلاکتوں کی تعداد 21 ہے۔ مڈغاسکر میں کرونا کیسز کی تعداد 193 ہے، اور وائرس سے کوئی موت نہیں ہوئی۔

  • مڈغاسکر کا تجویز کردہ “کرونا کا علاج“ پورے افریقہ میں مقبول!

    مڈغاسکر کا تجویز کردہ “کرونا کا علاج“ پورے افریقہ میں مقبول!

    مشرقی افریقی ملک مڈغاسکر نے ایک مشروب تیار کرنے کی فیکٹری کی تعمیر شروع کردی ہے جس کے بارے میں اس کا دعویٰ ہے کہ یہ مشروب کرونا وائرس کا علاج ہے۔

    کوویڈ اورگینک کے نام سے فروخت کیا جانے والا یہ مشروب ایک مقامی پودے سے تیار کردہ ہے جو ملیریا کے علاج میں مؤثر ہے، افریقی لیڈرز اسے کرونا وائرس کا علاج قرار دے رہے ہیں تاہم ابھی تک اس کا کوئی بین الاقوامی کلینکل ٹیسٹ نہیں کیا گیا۔

    مڈغاسکر کے صدر ایندرے رجولین جنہوں نے کچھ عرصہ قبل اس مشروب کو دنیا کے سامنے پیش کیا تھا، کا کہنا ہے کہ وافر مقدار میں یہ مشروب تیار کرنے کے لیے فیکٹری ایک ماہ میں کام شروع کردے گی۔

    ان کا کہنا ہے کہ مقامی محققین اور سائنسدان اس دوا کو بین الاقوامی معیار کے مطابق بنانے پر کام کر رہے ہیں۔

    صدر کے مطابق سینٹرل افریقہ کے ملک ایکوٹریل گنی کے ایک نائب وزیر بہت سی مقدار میں یہ مشروب خرید کر لے گئے ہیں جبکہ تنزانیہ کے صدر نے اس مشروب کو منگوانے کے لیے ایک طیارہ بھیجنے کا اعلان کیا ہے۔

    ان کا کہنا ہے کہ سینیگال سمیت دیگر افریقی ممالک بھی اس کی خریداری میں دلچسپی ظاہر کرچکے ہیں۔

    سماجی رابطوں کی ویب سائٹ ٹویٹر پر افریقی صارفین نے بھی اس مشروب کے حوالے سے مثبت ردعمل دیا ہے۔

    بعض افراد کا دعویٰ ہے کہ اس مشروب سے کرونا وائرس سے صحتیابی کی شرح 72 فیصد ہے جبکہ اس کی بدولت کرونا وائرس کے 135 میں 97 مریض صحتیاب ہوچکے ہیں۔

  • تنزانیہ میں آئل ٹینکر دھماکا، 60 سے زاید افراد لقمہ اجل بن گئے

    تنزانیہ میں آئل ٹینکر دھماکا، 60 سے زاید افراد لقمہ اجل بن گئے

    ڈوڈوما: افریقی ملک تنرانیہ میں ایک ہول ناک واقعہ پیش آیا ہے، جس میں‌ 60 سے زاید افراد لقمہ اجل بن گئے.

    تفصیلات کے مطابق تنزانیہ کے مشرق میں واقع قصبے موروگورو میں ایک آئل ٹینکر میں دھماکے ہوا، جس کے بعد اس میں شعلے بھڑک اٹھے۔ 

    تیل کی موجودگی کی وجہ سے آگ پھیل گئی، جلد ہی آس پاس موجود درجنوں افراد اس آگ کی لپیٹ میں آگئے، جو کچھ ہی دیر میں پوری طرح جھلس گئے.

    [bs-quote quote=”ہلاک ہونے والے افراد آئل ٹینکر سے پیٹرول چوری کر رہے تھے، جب یہ دھماکا ہوا” style=”style-8″ align=”left” author_name=”انتظامیہ”][/bs-quote]

    امدادی کارروائی تاخیر سے شروع ہوئی،  تب تک کئی افراد اس خوف ناک آگ میں لقمہ اجل بن چکے تھے. اب تک ساٹھ سے زاید افراد کی ہلاکت کی تصدیق ہوئی ہے.

    آگ بچھائی جاچکی ہے، سوختہ لاشوں کو پولیس نے تحویل میں لے لیا ہے، زخمیوں کو اسپتال منتقل کیا جارہا ہے.

    انتظامیہ کے مطابق 65 افراد اس خوف ناک آگ کی لپیٹ میں آئے، جن میں سے 60 کی موت کی تصدیق ہوچکی ہے.

    مزید پڑھیں: تنزانیہ: مسافر کشتی ڈوب گئ، 87 افراد ہلاک، متعدد لاپتہ

    دھماکے کی وجہ کا تعین نہیں ہوسکا، خیال کیا جارہا ہے کہ حفاظتی انتظامات ناکافی تھے.

    انتظامیہ کے مطابق ہلاک ہونے والے افراد آئل ٹینکر سے پیٹرول چوری کر رہے تھے، جب یہ دھماکا ہوا. ممکنہ طور پر آگ کسی شعلے کے باعث لگی تھی۔