Tag: تنیشا شرما کیس

ممبئی: خودکشی کرنے والی بھارتی اداکارہ تنیشا شرما کے دوست اداکار شیزان خان نے انکشاف کیا ہے کہ وہ شردھا واکر قتل کیس سے ڈر گیا تھا، جس کی وجہ سے اس نے تنیشا سے بریک اپ کر لیا۔

بھارتی میڈیا کے مطابق بالی ووڈ اور ٹی وی اداکارہ تُنیشا شرما کی خود کشی کے معاملے میں ملزم اور اداکارہ کے سابق بوائے فرینڈ اداکار شیزان خان نے پولیس کو بیان دیا ہے کہ شردھا قتل کیس کی تفصیلات سے ڈر کر اس نے تنیشا سے زبردستی تعلق ختم کر دیا تھا۔

شیزان خان نے پولیس کے سامنے بیان دیا کہ وہ دہلی کے شردھا واکر قتل کیس کو لے کر کافی ڈرا ہوا تھا، اس قتل کیس سے ملک میں جو ماحول پیدا ہوا تھا اس سے وہ کافی پریشان تھا، شیزان نے بتایا ’’میں نے اپنی سابقہ گرل فرینڈ کو بتایا کہ ہم الگ الگ کمیونٹی سے تعلق رکھتے ہیں، اور ہمارے راستے میں عمر کا فاصلہ بھی حائل ہے۔‘‘

شردھا واکر کے قاتل آفتاب کا رویہ معمہ بن گیا، نارکو اور پولی گراف ٹیسٹ دونوں میں ایک ہی جواب

یاد رہے کہ ٹی وی ڈراما ’علی بابا داستان کابل‘ کی اداکارہ تنیشا شرما نے 24 دسمبر کو شیزان کے میک اپ روم میں خود کشی کر لی تھی، سب لنچ بریک پر تھے جب پندرہ منٹ بعد ہی اچانک اس کی خود کشی کا پتا چلا۔

تنیشا کے اہل خانہ نے شیزان خان پر تنیشا کو خود کشی کرنے کے لیے اکسانے کا سنگین الزام لگایا ہے۔ اداکار شیزان خان کو تنیشا شرما کو خود کشی پر اکسانے کے الزام میں گرفتار کیا گیا ہے، پولیس کا کہنا ہے کہ وہ بار بار اپنے بیانات بدل رہا ہے۔