Tag: توہین الیکشن کمیشن کیس

اسلام آباد : توہین الیکشن کمیشن وچیف الیکشن کمشنرکیس میں بانی پی ٹی آئی اور فوادچوہدری کے اڈیالہ میں ٹرائل کا فیصلہ آج سنایا جائے گا۔

تفصیلات کے مطابق الیکشن کمیشن میں بانی پی ٹی آئی اور فواد چوہدری کیخلاف توہین الیکشن کمیشن وچیف الیکشن کمشنر کیس کی سماعت آج ہوگی۔

جس میں بانی پی ٹی آئی اور فوادچوہدری کے اڈیالہ میں ٹرائل سے متعلق فیصلہ سنایاجائےگا ، الیکشن کمیشن محفوظ فیصلہ دن 12 بجے سنائے گا۔

ذرائع نے بتایا کہ وزارت داخلہ نے بانی پی ٹی آئی کو الیکشن کمیشن پیش کرنے سے معذرت کی تھی اور وزارت قانون سے رائے لیکر اڈیالہ میں ٹرائل کی درخواست کی تھی۔

جس کے بعد الیکشن کمیشن نے وزارت قانون کی رائے موصول ہونے پر فیصلہ محفوظ کیا تھا۔

خیال رہے توہین الیکشن کمیشن کیس میں سابق چیئرمین پی ٹی آئی کو پیش نہ کرنے پر الیکشن کمیشن نے برہمی کا اظہار کرتے ہوئے کہا تھا کہ وزارت داخلہ ایک شخص کو سیکیورٹی نہیں دے سکتی توالیکشن کیسے کرائے گی۔

اسلام آباد : توہین الیکشن کمیشن کیس میں چیئرمین پی ٹی آئی کو پیش نہ کرنے پر الیکشن کمیشن برہم ہوگیا اور کہا وزارت داخلہ ایک شخص کو سیکیورٹی نہیں دے سکتی توالیکشن کیسے کرائے گی۔

تفصیلات کے مطابق چیئرمین پی ٹی آئی، اسد عمر اور فواد چوہدری کیخلاف توہین الیکشن کمیشن کیس کی سماعت ہوئی، نثاردرانی کی سربراہی میں چار رکنی بینچ نے سماعت کی۔

چیئرمین پی ٹی آئی کے وکیل شعیب شاہین ، فواد چوہدری اور اسد عمر الیکشن کمیشن میں پیش ہوئے، اے آئی جی آپریشن نے پی ٹی آئی چیئرمین سے متعلق رپورٹ جمع کرائی، وزارت داخلہ نے رپورٹ میں تجویز دی کہ الیکشن کمیشن اڈیالہ جیل میں سماعت کرے۔

اے آئی جی آپریشنز کا کہنا تھا کہ پنڈی گنجان آبادی ہے اور خطرات سےخالی نہیں ، پی ٹی آئی چیئرمین بھی اپنی زندگی سے متعلق خطرات اظہارکر چکے ہیں ، جس پر ممبر سندھ نثار درانی نے کہا کہ پی ٹی آئی چیئرمین جو کہتے ہیں آپ کو یقین ہے صحیح کررہے ہیں۔

الیکشن کمیشن نےبرہمی کااظہارکرتے ہوئے کہا وزارت داخلہ ایک شخص کو سیکیورٹی نہیں دے سکتا تو الیکشن کیسے کرائے گا، وزارت داخلہ کیسے ہمیں حکم دے سکتا ہے؟ الیکشن کمیشن نے سیکریٹری داخلہ کو طلب کرلیا۔

دوران سماعت فواد چوہدری نےکہا پہلے بھی پیش ہوا اور آج بھی حاضرہوں جبکہ اسدعمر کا کہنا تھا کہ معافی نامہ لکھ کر دیتےہیں، کوئی انا کا مسئلہ نہیں، میرانہیں خیال الیکشن کمیشن کے خلاف غلط ریمارکس دیے ہوں، بعد ازاں الیکشن کمیشن نےسماعت تیرہ نومبر تک ملتوی کردی۔

اسلام آباد : سابق پی ٹی آئی رہنما فواد چوہدری نے توہین الیکشن کمیشن کیس میں الیکشن کمیشن سے معافی مانگ لی ، جس پر الیکشن کمیشن نے تحریری معافی نامہ جمع کرانے کی ہدایت کردی۔

تفصیلات کے مطابق سابق پی ٹی آئی رہنما فواد چوہدری کے خلاف توہین الیکشن کمیشن کیس کی سماعت ہوئی ، چیف الیکشن کمشنر کے سربراہی میں 4 رکنی کمیشن نے سماعت کی۔

فواد چوہدری اپنے وکیل فیصل چوہدری کے ہمراہ پیش ہوئے، دوران سماعت فواد چوہدری نے ذاتی حیثیت میں الیکشن کمیشن سے معذرت کرتے ہوئے کہا میری معذرت قبول کریں اور شو کاز نوٹس واپس لے لیں۔

سابق رہنما کا کہنا تھا کہ پارٹی ایک ادارہ ہے،میں ان کا ترجمان تھا ، ذاتی حیثیت میں معذرت کر سکتا ہوں ، میں قانونی کیسز میں نہیں پڑنا چاہتا آپ کے لیے احترام ہے، اس وقت پارٹی کی پوزیشن تھی جو میں بیان کی۔

جس پر چیف الیکشن کمشنر نے کہا کہ پارٹی چیف آپ سے قتل کرائیں تو کیا آپ کریں گے، جس پر فواد چوہدری نے جواب دیا کہ میں ایسا نہیں کروں گا۔.

چیف الیکشن کمشنر نے ریمارکس دیئے کہ پارٹی چیئرمین کو ئی غلط بات کرے تو کیا مان لیں گے ، آپ کی جماعت نے کمیشن اور میری ذات کے حوالے سے کیا کیا نہیں کہا، میری بیوی کے بارے میں اوپن جلسے میں کہا گیاپھر میڈیا پرمکر بھی گئے، ماحول ہم نے ہی ٹھیک کرنا ہے۔

فواد چوہدری نے معافی مانگتے ہوئے کیس ختم کرنے کی استدعا کی، جس پر الیکشن کمیشن نے تحریری معافی نامہ جمع کرانے کی ہدایت کرتے ہوئے سماعت یکم اگست تک ملتوی کردی۔

اسلام آباد : الیکشن کمیشن نے توہین الیکشن کمیشن کیس میں چیئرمین پی ٹی آئی عمران خان کو 5 جون کو ذاتی حیثیت میں پیش ہونے کی ہدایت کر دی اور واضح کیا کہ عمران خان اور فواد چوہدری کی عدم پیشی پر وارنٹ جاری کیے جائیں گے۔

تفصیلات کے مطابق الیکشن کمیشن میں چیئرمین پی ٹی آئی عمران خان کیخلاف توہین الیکشن کمیشن کیس کی سماعت ہوئی، عمران خان کے وکیل فیصل چودھری نے حاضری سے استثنی کی درخواست دائر کرتے ہوئے کہا کہ عمران خان نیب اور احتساب عدالتوں میں ضمانتوں کیلئے پیش ہو رہے ہیں۔

الیکشن کمیشن کے ممبر خیبر پختونخوا نے کمیشن کو بتایا کہ عمران خان اپنی مرضی سے آج پیش ہو رہے ہیں، عمران خان کل عدالت میں پیش ہو کر آج یہاں آ جاتے۔

عمران خان کے وکیل فیصل چوہدری نے کہا کہ آپ بھی پہلے جج رہے ہیں عدالتوں کو ہمیشہ ترجیح دی جاتی ہے، آج اعتراضات پر سماعت ہوسکتی تھی لیکن انور منصور سپریم کورٹ میں ہیں، گزشتہ سماعت کا حکم نامہ ہمیں آج تک نہیں ملا، حکم نامہ پڑھے بغیر کیس کی تیاری کیسے کر سکتے ہیں؟

الیکشن کمیشن کے ممبر خیبر پختونخوا کا کہنا تھا کہ آج عمران خان کو ذاتی حیثیت میں طلب کیا تھا عدم پیشی پر آپکو پتا ہے کیا ہوگا ؟ جس پر عمران خان کے وکیل نے کہا کہ عمران خان دو ٹکڑوں میں بیک وقت عدالت اور کمیشن میں پیش نہیں ہوسکتے،عمران خان کیخلاف 150 مقدمات ہیں کہاں کہاں پیش ہوسکتے ہیں، ہمارے ہاتھ بندھے ہوئے ہیں، الیکشن کمیشن سمجھتا ہے کہ جان بوجھ کر عمران خان پیش نہیں ہوتے، یہ بات ذہن سے نکال دیں مگر چیزیں ہمارے ہاتھ میں نہیں ہیں۔

الیکشن کمیشن کے ممبر بلوچستان نے کہا کہ عمران خان پر مقدمات قائم ہونے سے پہلے بھی وہ پیش نہیں ہوتے تھے، میرا یہی فیصلہ ہے کہ عمران خان کے وارنٹ جاری کیے جائیں، ہمیں یقین ہے کہ عمران خان جان بوجھ کر پیش نہیں ہو رہے، وقت بھی بتا دیں کیونکہ اب عدالتیں بھی عمران خان کی مرضی سے لگتی ہیں۔

جس پر عمران خان نے وکیل نے کہا کہ انور منصور ہر تاریخ پر پیش ہوتے ہیں آج سپریم کورٹ نے بلایا ہوا ہے، الیکشن کمیشن کے وکیل خود بھی عدالتوں میں تاریخیں لے رہے ہیں،پانچ جون کو سماعت رکھ لیں تو اعتراضات پر دلائل دیں گے۔

الیکشن کمیشن نے ہدایت کی کہ آئندہ سماعت پر عمران خان ذاتی حیثیت میں حاضری یقینی بنائیں اور واضح کیا کہ عمران خان اور فواد چوہدری کی عدم پیشی پر وارنٹ جاری کیے جائیں گے، بعد ازاں سماعت 5 جون تک ملتوی کر دی گئی۔