کراچی: ڈی جی رینجرز میجر جنرل سعید نے شہر کے مختلف علاقوں کا دورہ کرتے ہوئے شہر میں جاری آپریشن کو مزید موثر اور نتیجہ خیز بنانے کے احکامات جاری کیے۔
تفصیلات کے مطابق ڈی جی رینجرز سندھ میجر جنرل محمد سعید نے کراچی کے مختلف علاقوں لیاری، لیاقت آباد، اورنگی ٹاؤن، عزیز آباد، لانڈھی، کورنگی کا دورہ کیا اور کراچی میں جاری آپریشن کی صورتحال پر اطمینان کا اظہار کیا۔
ترجمان رینجرز کی جانب سے جاری کردہ اعلامیے میں کہا گیا ہے کہ ’’ڈی جی رینجرز نے کراچی میں امن و امان کی صورتحال پر اطمینان کا اظہار کرتے ہوئے افسران اور جوانوں کی کارکردگی کو سراہا‘‘۔
کراچی میں مستقل امن و امان کے قیام کو یقینی بنانے کے لیے ڈی جی رینجرز نے آپریشن کو مزید موثر اور نتیجہ خیز بنانے کے احکامات جاری کرتے ہوئے دہشت گردوں کے خلاف بلاامتیاز کارروائی کی ہدایات بھی کی۔
ڈی جی رینجرز نے گڈاپ ٹاؤن میں افسران اور جوانوں سے ملاقات بھی کی، سیکٹر کمانڈر نے حالیہ آپریشن اور صورتحال پر ڈی جی رینجرز کو بریفنگ دی۔میجر جنرل نے افسران اور جوانوں کی کارکردگی کو سراہتے ہوئے آپریشن کو مزید موثر اور نتیجہ خیز بنانے کے احکامات جاری کیے۔
