کراچی: کراچی میں سمندری ہوائیں بحال ہو گئی ہیں، اور ہوا میں نمی کا تناسب زائد ہونے سے موسم مرطوب محسوس ہو رہا ہے۔
محکمہ موسمیات کا کہنا ہے کہ آج کراچی میں دن بھر وقفے وقفے سے تیز ہوائیں چلنے کا امکان ہے، جب کہ آج درجہ حرارت 35 ڈگری تک جا سکتا ہے۔
محکمہ موسمیات کے مطابق صبح اور رات میں شہر کے چند مقامات پر بوندا باندی بھی متوقع ہے، ہوا میں نمی کا تناسب 75 فی صد ہے اور جنوب مغربی سمت سے ہلکی رفتار سے ہوائیں چل رہی ہیں۔
ادھر راولپنڈی اور اسلام آباد سمیت پنجاب کے مختلف علاقوں میں بارش سے گرمی اور حبس میں کمی آ گئی ہے، راولپنڈی، اسلام آباد میں وقفے وقفے سے بارش کا سلسلہ جاری ہے، محکمہ موسمیات نے مزید بارش کی پیشگوئی کی ہے۔
سندھ طاس معاہدہ معطل رکھنے کا بھارتی اعلان عالمی قانون کیخلاف ہے، پاکستان
خوشاب اور جھنگ سمیت پنجاب کے دیگر شہروں میں بھی کہیں ہلکی کہیں تیز بارش نے گرمی کا زور توڑ دیا ہے، کراچی کے مختلف علاقوں میں صبح سویرے بوندا باندی ہوئی، محکمہ موسمیات نے بوندا باندی اور تیز ہوائیں چلنے کا سلسلہ جاری رہنے کی پیشگوئی کی ہے۔
ملک کے بیش تر علاقو ں میں آج موسم گرم اور شدید حبس برقرار رہنے کا امکان ہے، بالائی پنجاب، خیبر پختونخوا، گلگت بلتستان اور کشمیر میں بارش ہو سکتی ہے۔
