کراچی : اے آر وائی فلمز اور وادی اینی میشن کی مشترکہ پیشکش فلم تین بہادر ریو ینج آف بابا بالم کا ایک اور نیا ویڈیو گانا ”جھومے بار بار” ریلیز کردیا گیا ہے ۔
تفصیلات کے مطابق پاکستان کی پہلی اینیمیٹڈ فلم تین بہادر ریوینج آف بابا بالم اسی ماہ سینماؤں کی زینت بننے کو تیار ہے جس کے نئے گانے ”جھومے بار بار” کو آج ریلیز کردیا گیا ہے جسے سوشل میڈیا میں ذبردست پذیرائی مل رہی ہے۔
یاد رہے کہ گزشتہ ماہ فلم کے پہلے گانے ” بینڈ بج گیا” ریلیز کیا گیا تھا جس نے بھی عوام میں بھرپور مقبولیت حاصل کی تھی۔
فلم کی کریٹوو ڈائیریکٹرشرمین عبید چنائے اورایگزیکٹو پروڈیوسر سلمان اقبال ہیں، اس سے قبل اینی میٹڈ فلم ’’تین بہادر پارٹ 2‘‘ کا آفیشل پوسٹر اور فلم کا ٹیزر ٹریلر بھی ریلیز کیا جا چکا ہے۔
اے آر وائی فلمز کے بینر تلے بننے والی یہ فلم تین ننھے کرداروں آمنہ، سعدی اور کامل کی بہادری کی داستان پر مبنی سیکوئل فلم ہے جو رواں سال ماہِ دسمبر میں ملک بھر کے سینیما گھروں کی زینت بنے گی۔
تین بہادر کے سیکوئل میں اداکار بہروز سبزواری ،اداکارہ ثروت گیلانی، احمد علی بٹ، زیبا شہناز، علی گل پیر اور معروف اداکار اور جیتو پاکستان کے میزبان فہد مصطفیٰ صدا کاری کے جوہر دکھائیں گے جب کہ فلم کی موسیقی گلوکار شیراز اپل نے ترتیب دی ہے۔
