اترپردیش: بھارتی ریاست اترپردیش میں خاتون کے ہاں تین سروں والی بچی کی پیدائش ہوئی جس نے ڈاکٹروں کو بھی حیران کردیا۔
غیرملکی خبررساں ادارے کے مطابق بھارتی ریاست اتردپیش کے مقامی اسپتال میں خاتون کو لیبر روم میں لے جانے سے قبل شدید تکلیف ہوئی جس کے بعد خاتون کی ڈیلیوری کی گئی تو خاتون نے تین سروں والی بچی کو جنم دیا جسے دیکھ کر خاتون کے اہل خانہ اور ڈاکٹرز بھی حیران و پریشان رہ گئے۔
ڈاکٹرز کا کہنا ہے کہ خاتون کی ڈیلیوری نارمل ہی ہوئی ہے لیکن بچی کے تین سر دیکھ کر یقین نہیں آرہا ہے۔
بچی کی والدہ کی حالت خطرے سے باہر بتائی گئی ہے تاہم نومولود بچی کے علاج کے بارے میں ڈاکٹرز سر جوڑکر بیٹھ گئے ہیں۔
رپورٹ کے مطابق اس طرح کی بیماری کے واقعات دنیا بھر میں سامنے آتے رہتے ہیں، اس بیماری کو ’اینسی فیلوسیل‘ کا نام دیا گیا ہے۔
میڈیا رپورٹس میں کہا گیا ہے کہ اینسی فیلو سیل بیماری میں نومولود بچی کے بچنے کے چانس 55 فیصد ہیں۔
واضح رہے کہ چار سال قبل بھارت میں عجیب الخلقت بچی کی پیدائش ہوئی تھی جسے دیکھنے کے لیے لوگوں کا تانتا بندھ گیا تھا اور ہندوؤں نے اسے بھگوان قرار دے دیا تھا۔
یاد رہے کہ بچی کا چہرہ عام چہروں جیسا نہیں تھا اور اس کے چہرے پر گوشت کا لوتھڑا موجود تھا جو سونڈ نما نظر آرہا تھا بچی کو لوگوں نے سونڈ کی وجہ سے بھگوان کا اوتار قرار دیا تھا۔