بھارتی فلم انڈسٹری کے معروف اداکار منوج کمار طویل علالت کے بعد 87 برس کی عمر میں خالق حقیقی سے جا ملے تھے، تجربہ کار اداکار کے اثاثوں سے ان کی کئی نسلیں مستفید ہوتی رہیں گی۔
بھارتی میڈیا کا کہنا ہے کہ منوج کمار ممبئی کے کوکیلا بین دھیرو بائی امبانی اسپتال میں زیر علاج تھے، دل کی مختلف بیماریوں کے باعث 4 اپریل کو ان کا انتقال ہوا۔
رپورٹس کے مطابق اسپتال کی طرف سے جاری کیے گئے میڈیکل سرٹیفکیٹ کے مطابق اداکار کی موت کی ثانوی وجہ جگر کی خرابی بتائی گئی تھی۔
معروف اداکار کا اصل نام ’ہری کرشنن گوسوامی‘ تھا اور حب الوطنی پر مبنی فلموں میں کام کرنے کی وجہ سے اُنہیں ’بھارت کمار‘ کے لقب سے بھی نوازا گیا تھا۔
بھارتی میڈیا کے مطابق تجربہ کار اداکار کی موت کے وقت ان کے اثاثوں کی کل مالیت 170 کروڑ بھارتی روپے تھی۔
اتنے اثاثوں کی بڑی وجہ یہ بھی تھی کہ وہ ناصرف ایک مشہور فلمی اداکار تھے بلکہ ایک سرمایہ کار اور کاروباری شخصیت بھی تھے۔
واضح رہے کہ 2007 مین ریلیز ہونے والی فلم ’اوم شانتی اوم‘ باکس آفس پر سُپر ہٹ ثابت ہوئی تھی، تاہم تجربہ کار اداکار منوج اس میں دکھائے گئے ایک خاص منظر کی وجہ سے ناراض تھے۔
اُس منظر میں شاہ رخ خان کے کردار ’اوم پرکاش مکھیجا‘ کو دکھایا گیا جو منوج کمار سے تعلق کا استعمال کرتے ہوئے پریمیئر میں داخل ہوتا ہے جبکہ پولیس ٹریڈ مارک کی وجہ سے اسے پہچاننے میں ناکام ہو جاتی ہے۔
تاہم بعد میں پولیس اہلکار اس پر لاٹھی چارج کرتے ہوئے اسے پریمیئر سے بھگا دیتے ہیں۔
اس پر تجربہ کار اداکار کا کہنا تھا کہ مجھے دکھ ہوا ہے شاہ رخ خان نے میری روح کو زخمی کیا ہے، یہ مجھے نیچا دکھانے اور تضحیک کرنے کی سازش ہے، پچھلے 50 سالوں سے فلمی دنیا سے میری توہین کی گئی ہے۔
انہوں نے ہتک عزت کے مقدمے میں ہرجانے کے طور پر صرف ایک روپے کا مطالبہ کیا کیونکہ ان کے وکیل کے مطابق ان کی ساکھ انمول ہے۔
تجربہ کار اداکار نے فلم سے اس سین کو ہٹانے کی درخواست کی تھی جس پر فلمسازوں نے اتفاق کیا تھا۔ شاہ رخ خان نے ان کو پہنچنے والی کسی بھی تکلیف پر معذرت کرتے ہوئے کہا تھا کہ میں بالکل غلط تھا اگر انہیں تکلیف ہوئی ہے تو میں معذرت خواہ ہوں۔
معافی کے باوجود یہ مسئلہ 2013 میں دوبارہ سامنے آیا جب ’اوم شانتی اوم‘ کو جاپان میں متنازع منظر کے ساتھ دوبارہ ریلیز کیا گیا۔ اس کے بعد تجربہ کار اداکار نے اس منظر کو نہ ہٹانے پر شاہ رخ خان اور ایروز انٹرنیشنل سے 100 کروڑ روپے ہرجانے کا مطالبہ کرتے ہوئے قانونی کارروائی کا مطالبہ کیا تھا۔
تجربہ کار اداکار نے اپنی مایوسی کا اظہار کرتے ہوئے کہا تھا کہ فلم کو جاپان میں وعدے کے باوجود سین ڈیلیٹ کیے بغیر ریلیز کیا گیا۔ انہوں نے مزید کہا تھا کہ قانونی کارروائی نے شاہ رخ خان اور فرح خان میں ذمہ داری کا احساس پیدا نہیں کیا۔ بعدازاں، انہوں احتساب کے فقدان سے مایوس ہو کر مقدمہ واپس لے لیا تھا۔
