Tag: جاب انٹرویو

ملازمت کے لیے انٹرویو دینا ایک پریشان کن لمحہ ہوسکتا ہے، چاہے آپ کتنی ہی اچھی تیاری کرلیں لیکن آنے والا وقت آپ کو گھبراہٹ میں مبتلا کیے رکھتا ہے، لیکن اب آپ کی مدد کے لیے گوگل حاضر ہے۔

امریکی ملٹی نیشنل ٹیکنالوجی کمپنی گوگل نے ملازمت کے لیے انٹرویو کی تیاری کا ٹول پیش کردیا۔

اسے گوگل نے انٹرویو وارم اپ کا نام دیا ہے جس میں ایک سافٹ ویئر آپ کا انٹرویو لیتا ہے، اس کے تمام سوالات حقیقت پر مبنی ہیں اور ہیومن ریسورس ماہرین کی آرا سے تیار کیے گئے ہیں۔

اس ٹول کی پشت پر مشین لرننگ اور مصنوعی ذہانت (آرٹفیشل انٹیلی جنس) موجود ہے اور یہ مشینی زبان میں آپ سے انٹرویو کرتا ہے۔ فی الحال گوگل کیریئر سرٹیفکیٹس شعبے ہی اس میں شامل کیے گئے ہیں جن میں ای کامرس، یوزر انٹر فیس، آئی ٹی مینجمنٹ جیسے کورس کے انٹرویو کے علاوہ عمومی ملازمت کے لیے بھی انٹرویو ہے۔

اس ویب سائٹ پر جائیں تو پہلے ایک ڈراپ ڈاؤن لسٹ نمودار ہوتی ہے جس میں سے آپ اپنی مہارت اور ملازمت کے شعبے کا انتخاب کر سکتے ہیں۔

اس ٹول کو پیش کرتے ہوئے گوگل نے کہا کہ انٹرویو کا شعبہ بہت اہم اور مشکل ہو سکتا ہے، اگر آپ کے دوست، اہل خانہ اور دیگر ماہرین اس میں کوئی مدد نہیں کر سکتے تو ہم نے انٹرویو وارم اپ یا پریکٹس کا ایک پلیٹ فارم پیش کیا ہے۔

گوگل کے مطابق اس کے سوالات متعلقہ شعبوں کے ماہرین اور افرادی قوت کے افسران نے بنائے ہیں اور مشین لرننگ اسے انٹرویو کی صورت میں بیان کرتی ہے، اس کے تحت آپ نہ صرف گھر بیٹھے انٹرویو دے سکتے ہیں بلکہ اپنی صلاحیتوں کو بھی بہتر بنا سکتے ہیں۔

اس ٹول کا دلچسپ پہلو یہ ہے کہ جیسے جیسے آپ جواب دیتے ہیں اس کی ٹیکسٹ فائل اسی لمحے بنتی چلی جاتی ہے، اسے آپ بعد میں پڑھ کر جان سکتے ہیں کہ کس سوال کا کیا جواب دیا گیا ہے۔

گوگل نے امید ظاہر کی ہے کہ اس سے دنیا بھر کے امیدوار مستفید ہوسکیں گے۔