ARYNews.tv | Urdu – Har Lamha Bakhabar

Tag: جارجیا

  • جارجیا کا نیا مقرر ہونے والا صدر کون سا سابق فٹبالر ہے؟

    جارجیا کا نیا مقرر ہونے والا صدر کون سا سابق فٹبالر ہے؟

    تبلیسی: جارجیا کی گورننگ پارٹی نے سابق فٹبالر میخائل کاویلاشویلی کو ملک کا نیا صدر مقرر کر دیا ہے۔

    غیر ملکی میڈیا رپورٹس کے مطابق جارجیا میں اکتوبر میں متنازعہ انتخابات کے بعد ہنگامہ آرائی کی صورت حال ہے، اس دوران گورننگ پارٹی نے ایک سابق فٹبالر کو ملک کا نیا صدر مقرر کر دیا ہے، جو کھلاڑی سے انتہائی دائیں بازو کے سیاست دان بن گئے تھے۔

    الجزیرہ کے مطابق جارجیائی ڈریم پارٹی کی طرف سے نامزد کردہ میخائل کاویلاشویلی، ہفتہ کے ووٹ میں کھڑے واحد امیدوار تھے، 53 سالہ سابق فٹبالر کو کسی مقابلے کا سامنا نہیں کرنا پڑا۔

    اپوزیشن نے ووٹنگ کا بائیکاٹ کیا، کیوں کہ ان کا کہنا تھا کہ یہ حکومت ناجائز ہے، اس لیے وہ کسی ایسے عمل میں حصہ نہیں لیں گے جس سے حکومت کو قانونی حیثیت حاصل ہو۔

    26 اکتوبر کو ہونے والے قانون ساز انتخابات کے نتائج پر ملک گیر احتجاج جاری ہے، اپوزیشن نے پارلیمنٹ کا بائیکاٹ کردیا ہے، مبصرین کا بھی کہنا تھا کہ انتخابات میں رشوت دی گئی اور دوہری ووٹنگ کے واقعات بھی رونما ہوئے۔

    چھ سال قبل مقبول عوامی ووٹوں سے منتخب ہونے والے سابق صدر سلوم زورابیچولی نے کہا کہ ملک کو ایک ’جائز صدر‘ کی ضرورت ہے جسے عوام نے اپنے ووٹوں سے منتخب کیا ہو، نہ کہ ایسی پارلیمنٹ نے جس کی قانونی حیثیت کوئی نہ ہو۔

    ان کا کہنا تھا کہ لوگوں کو اب یہ احساس ہو رہا ہے کہ ہم ایک نازک موڑ پر آ چکے ہیں، یا تو یہ جدوجہد کامیاب ہوگی، یا پھر ہم ایک ایسی حکومت میں داخل ہو جائیں گے جو کم و بیش روسی صدر ولادیمیر پیوٹن کے زیر اثر ہوگی۔

  • جارجیا میں حکومت مخالف مظاہرے پھوٹ پڑے، درجنوں گرفتار

    جارجیا میں حکومت مخالف مظاہرے پھوٹ پڑے، درجنوں گرفتار

    تبلیسی : جارجیا کے دارالحکومت تبلسی میں حکومت مخالف مظاہرے پھوٹ پڑے، حکمران جماعت کی پارلیمانی انتخابات میں فتح کے بعد سے ریاست ہنگامہ آرائی کا شکار ہے۔

    غیر ملکی خبر رساں ادارے کی رپورٹ کے مطابق حکومت کی مخالفت میں ہونے والے مظاہروں کے ردعمل میں جارجیا کے وزیر اعظم اراکلی کوباخیدزے نے کہا ہے کہ ان کی حکومت کسی صورت انقلاب کی اجازت نہیں دے گی۔

    حکمران جماعت جارجین ڈریم پارٹی نے گزشتہ روز اعلان کیا تھا کہ وہ آئندہ چار سال کے لیے یورپی یونین کے ساتھ الحاق کے مذاکرات کو معطل کر رہی ہے جسے یورپی یونین کی جانب سے "بلیک میل” قرار دیا گیا۔

    Georgian police

    اپوزیشن کی جانب سے اس بیان پر شدید ردعمل سامنے آیا جارجیا میں اپوزیشن جماعتوں کی کال پر مظاہرین دارالحکومت کا رخ کیا اور احتجاج کا سلسلہ شروع ہوگیا۔

    اس حوالے سے جارجیا کی وزارت داخلہ کا کہنا ہے کہ دارالحکومت تبلیسی میں رات کے وقت ہونے والے پرتشدد مظاہروں کے دوران 107 افراد کو گرفتار کیا گیا۔

    مظاہرین نے مرکزی شاہراہ پر رکاوٹیں کھڑی کرکے زبردست مظاہرہ کیا اس دوران مظاہرین اور پولیس کے درمیان جھڑپیں بھی ہوئیں، مظاہرین کے ساتھ جھڑپوں میں10اہلکار زخمی ہوگئے۔

    Protests

    جواب میں پولیس نے مشتعل مظاہرین کو منتشر کرنے کے لیے واٹر کینن اور آنسو گیس کا استعمال کیا۔ جارجیا کی حکومت کا کہنا ہے کہ بلاک میں شامل ہونے سے مقصد سے دستبردار ہونا نہیں، رپورٹ کے مطابق جارجیا کی حکومت نے یورپی یونین پر بلیک میلنگ کا الزام لگایا ہے۔

    واضح رہے کہ ” ڈیموکریٹک جارجیا‘‘یا جی ڈی پارٹی کو عرف عام میں کوٹسیبی بھی کہا جاتا ہے، یہ جارجیا کی ایک روس نواز سیاسی جماعت ہے۔

  • جارجیا میں سال ’’2025‘‘ کا استقبال کیسے کیا جائے گا؟ جان کر حیران رہ جائیں

    جارجیا میں سال ’’2025‘‘ کا استقبال کیسے کیا جائے گا؟ جان کر حیران رہ جائیں

    دنیا 2025 کے استقبال کی تیاریاں کر رہی ہے امریکی ریاست جارجیا نا قابل یقین منفرد انداز میں نئے سال کو خوش آمدید کہے گی۔

    ہر سال دنیا کے ہر ملک میں 31 دسمبر کو مقامی وقت کے مطابق رات 12 بجتے ہی نئے سال کو خوش آمدید کہا جاتا ہے۔ اس موقع پر مختلف ممالک میں مختلف انداز میں نیا سال منایا جاتا ہے لیکن جوش یکساں ہوتا ہے۔

    2024 بھی اب تیزی سے رخصت کے قریب جا رہا ہے اور دنیا نے 2025 کی آمد پر اس کے استقبال کی تیاریاں شروع کر دی ہیں۔ تاہم امریکی ریاست جارجیا اس سال کو اتنے منفرد مگر ناقابل یقین انداز میں منانے جا رہی ہے، جس کو جان کر سب ہی حیران رہ جائیں گے۔

    امریکہ کی جنوب مشرقی ریاست جارجیا میں نئے سال کا استقبال ایک بہت بڑے دھماکے سے کیا جا رہا ہے جس کی جارجیا کی کاؤنٹی کمیشن نے منظوری بھی دے دی ہے۔

    غیر ملکی میڈیا کے مطابق جارجیا میں 31 دسمبر اور یکم جنوری کی درمیانی شب 12 بجتے ہی ایک 16 سالہ خالی عمارت کو دھماکے سے اڑا دیا جائے گا۔

    جارجیا سال نو کا جشن کسطرح منائے گا؟ حیرت انگیز منصوبہ سامنے آگیا - ایکسپریس اردو

    رپورٹ کے مطابق مذکورہ عمارت ماضی میں ایک شاندار ہوٹل تھا اور اس عمارت کو میکون کاؤنٹی نے گزشتہ برس 4.5 ملین ڈالر میں خریدا تھا اور اب اس عمارت کو منہدم کرنے کی تیاریاں کی جا رہی ہیں جس کے لیے ایک فرم سے 2.6 ملین ڈالر کا معاہدہ کیا گیا ہے۔

    یہ ہوٹل 1970 میں شروع کیا گیا تھا اور یہاں مشہور آنجہانی گلوکار ایلوس پریسلے بھی قیام کر چکے ہیں تاہم یہ ہوٹل کبھی بھی اپنے مالکان کے لیے بہت زیادہ نفع بخش نہیں رہا۔

    نیویارک کے بینکنگ ڈیپارٹمنٹ نے اس ہوٹل کو دھوکا دہی اور منی لانڈرنگ اسکیم کے الزامات کے تحت 1991 میں سیل بھی کر دیا گیا تھا۔

    اس ہوٹل کی عمارت کو آخری بار رمادا پلازا کے طور پر استعمال کیا گیا اور ڈاؤن ٹاؤن کے شمالی حصے میں دریائے اوکمولجی کے قریب واقع ہے اور 2017 سے خالی پڑا ہے۔

    اس عمارت کا نقشہ مشہور آرکیٹکٹ موریس لیپیدس نے بنایا تھا۔ تاہم بعد ازاں موریس نے کہا تھا کہ یہ عمارت ساخت کے لحاظ سے درست نہیں اور اس کی تزئین و آرائش نہیں کی جا سکتی۔

    میئر مِلر کا کہنا ہے کہ شہر کی انتظامیہ نے ابھی تک اس کا فیصلہ نہیں کیا ہے کہ اس زمین کو کس طرح سے استعمال کیا جائے گا، تاہم جو بھی چیز اس کی جگہ لے گی وہ اس سے 100 گنا بڑھ کر ہو گی۔

  • امریکا: جارجیا کے اسکول میں فائرنگ سے 4 افراد جان سے گئے

    امریکا: جارجیا کے اسکول میں فائرنگ سے 4 افراد جان سے گئے

    امریکی ریاست جارجیا کے اسکول میں فائرنگ کے نتیجے میں 4 افراد لقمہ اجل بن گئے جبکہ 9 شدید زخمی ہوگئے۔

    بین الاقوامی خبر رساں ادارے کی رپورٹ کے مطابق اسکول ترجمان کا اس حوالے سے کہنا ہے کہ فائرنگ کے بعد اسکول میں بھگدڑ مچنے سے بھی متعدد افراد زخمی ہوئے ہیں۔

    پولیس نے بتایا کہ جارجیا کے اسکول میں ہلاک ہونے والوں میں 2 طالب علم اور 2 ٹیچر شامل ہیں، فائرنگ کرنے والا 14 سال کا طالب علم کولٹ گرے ہے اور اسے زندہ حراست میں لے لیا گیا ہے۔

    ڈیموکریٹ صدارتی امیدوار کملاہیرس کا واقعہ سے متعلق کہنا ہے کہ گن کلچر کوہمیشہ کیلئے ختم کرنا ہوگا، وقت آگیا ہے کہ امریکا سے گن وائلنس کے ناسور کا خاتمہ ہو۔ انہوں نے کہا کہ امریکی گن وائلنس کے خاتمے کیلئے کردار ادا کریں۔

    روہنگیا سے مزید ہزاروں مسلمان جان بچا کر بنگلہ دیش پہنچ گئے

    ترجمان وائٹ ہاؤس کے مطابق کانگریس گن کنٹرول کیلئے مؤثر قانون سازی کرے، شہریوں کیلئے آٹومیٹک اسلحے کی خریداری پر پابندی لگائی جائے، اسلحہ رکھنے والوں کے پس منظر کی جانچ کا طریقہ کار سخت کیا جائے۔

  • جارجیا: پارلیمنٹ اراکین کی ایک دوسرے پر تھپڑوں کی بارش، ویڈیو دیکھیں

    جارجیا: پارلیمنٹ اراکین کی ایک دوسرے پر تھپڑوں کی بارش، ویڈیو دیکھیں

    تبلیسی: ایشیا اور یورپ کے سنگم پر واقع ملک جارجیا کی پارلیمنٹ اس وقت میدانِ جنگ بن گئی جب ارکان دست و گریباں ہو گئے اور ایک دوسرے پر تھپڑوں کی بارش کر دی۔

    غیر ملکی میڈیا رپورٹس اور سوشل میڈیا پر وائرل ویڈیو کے مطابق جارجیا کی پارلیمنٹ میں پیر کو حکومت اور حزب اختلاف کے اراکین کے درمیان شدید جھگڑا ہوا۔

    ویڈیو میں دیکھا جا سکتا ہے کہ فریقین نے ایک دوسرے کو تھپڑ جڑ دیے، دراصل غیر ملکی فنڈنگ سے متعلق قانون سازی پر بحث کے دوران لفظی کشیدگی بڑھتے بڑھتے ہاتھا پائی کی نوبت تک پہنچ گئی تھی۔

    واضح رہے کہ بیرونی فنڈنگ پر تنظیموں کو غیر ملکی ایجنٹ قرار دینے پر اپوزیشن ارکان نے احتجاج ریکارڈ کروایا۔

    دارالحکومت تبلیسی میں پارلیمنٹ کی عمارت کے اندر بنائی گئی اس ویڈیو میں قانون سازوں کے درمیان ایک مختصر لیکن پرتشدد جھگڑا دکھایا گیا ہے، قانونی امور کی کمیٹی کے چیئرمین نے اپوزیشن پارٹی یونائیٹڈ نیشنل موومنٹ کے رہنما پر حملہ کیا، جنھوں نے بل کی مخالفت کی۔

  • ڈوبی ہوئی کار سے برآمد انسانی باقیات 1976 سے لاپتا طالب علم کی نکلی

    ڈوبی ہوئی کار سے برآمد انسانی باقیات 1976 سے لاپتا طالب علم کی نکلی

    جارجیا: امریکا میں تقریباً سوا سال قبل دریافت ہونے والی ایک ڈوبی کار سے برآمد انسانی باقیات 1976 سے لاپتا طالب علم کی نکل آئی۔

    امریکی میڈیا کے مطابق امریکی ریاست جارجیا میں تفتیش کاروں نے آخر کار اطمینان کا سانس لے لیا ہے، جو الاباما کریک میں ایک ڈوبی کار سے برآمد ہونے والی انسانی باقیات سے متعلق تحقیق کر رہے تھے۔

    تفتیش کاروں نے معلوم کیا ہے کہ انسانی باقیات کی شناخت 1976 سے لاپتا طالب علم کے طور پر ہوئی ہے، یہ ایک 22 سالہ نوجوان تھا جو 45 سال سے زیادہ عرصے سے لاپتا تھا۔

    ٹروپ کاؤنٹی پولیس کے مطابق بائیس سالہ کائل ویڈ کلنک اسکیلز کو آخری بار 27 جنوری 1976 کو جارجیا کے شہر لاگرینج میں موس کلب پر دیکھا گیا تھا، ٹروپ کاؤنٹی شیرف کے دفتر نے کہا کہ اس کے بعد طالب علم وہاں سے الاباما کی اوبرن یونیورسٹی جانے کے لیے روانہ ہو گیا تھا۔

    پولیس حکام کے مطابق الاباما جاتے ہوئے کائل ویڈ کلنک اسکیلز لا پتا ہو گیا، اور اس کی گم شدگی 8 دسمبر 2021 تک ایک معمہ بنی رہی، کسی کو پتا نہیں چلا کہ وہ کہاں غائب ہوا، آٹھ دسمبر کو اس کی کار ’پنٹو رناباؤٹ‘ الاباما کی چیمبرز کاؤنٹی میں ڈوبی مل گئی۔

    جب کار کو کریک سے نکال کر دیکھا گیا تو گاڑی پر 1976 کا ٹیگ لگا تھا اور ٹروپ کاؤنٹی کا ایک اسٹیکر بھی، جب گاڑی کی شناخت کے نمبر (وی آئی این) کا تعین ہو گیا تو یہ بھی معلوم ہو گیا کہ گاڑی کلنک اسکیلز کی ہے۔

    پولیس کا کہنا تھا کہ جب گاڑی پانی سے نکالی گئی تو اس میں انسانی ڈھانچے کی باقیات اور دیگر ذاتی سامان موجود تھا، جس پر حکام نے انھیں شناخت اور جانچ کے لیے جارجیا بیورو آف انویسٹی گیشن کرائم لیب کو بھیجا۔

    اور آخر کار 19 فروری کو نتائج نے ثابت کیا کہ ڈھانچے کی باقیات کلنک اسکیلز کی ہیں، تاہم ابھی تک یہ نہیں معلوم ہو سکا ہے کہ اس کی موت کیسے واقع ہوئی تھی۔

  • امریکی ریاست میں اومیکرون ویکسین نہ لگوانے والے بچوں کو نشانہ بنانے لگا

    امریکی ریاست میں اومیکرون ویکسین نہ لگوانے والے بچوں کو نشانہ بنانے لگا

    جارجیا: امریکی ریاست جارجیا میں اومیکرون ویرینٹ ان بچوں کو متاثر کرنے لگا ہے جنھیں کرونا ویکسین نہیں لگائی گئی۔

    تفصیلات کے مطابق امریکا میں اومیکرون ویرینٹ سے بچے متاثر ہونے لگے ہیں، ریاست جارجیا میں اسپتال اومیکرون سے متاثرہ بچوں سے بھر چکے ہیں۔

    ڈاکٹرز کا کہنا ہے کہ نیا ویرینٹ 5 سال سے کم عمر بچوں کے لیے خطرہ بن رہا ہے کیوں کہ اس عمر کے بچوں کو ویکسین نہیں لگائی جا رہی، تاہم ان کا کہنا ہے کہ اسپتال آنے والے بچوں میں اومیکرون کی معمولی علامات دیکھی گئیں۔

    ماہرین کے مطابق اومیکرون کی وجہ سے بچوں میں کووِڈ کے کیسز میں تشویش ناک اضافہ دیکھا جا رہا ہے کیوں کہ علامات والے بچوں کی مجموعی تعداد گزشتہ ڈیلٹا ویرینٹ کے مقابلے میں بڑھ رہی ہے۔

    واضح رہے کہ بھارت میں اومیکرون سے 7 بچوں کی ہلاکت نے دنیا بھر میں خطرے کی گھنٹی بجا دی ہے، مرنے والوں بچوں کی عمر 7 سے 12 سال تھی۔

    ماہرین نے بچوں کو محفوظ رکھنے کے لیے گائیڈ لائنز بھی جاری کی ہیں، ڈاکٹرز کا کہنا ہے کہ جتنا ہو سکے بچوں کو ہجوم والی جگہ سے دور رکھیں، انھیں باہر کسی بھی جگہ کو ہاتھ لگانے سے روکیں، ماسک اور سینیٹائزر کے بغیر بچوں کو باہر نہ نکالیں، اپنے بچوں کو صحت بخش خوراک دیں تاکہ جسم کا قدرتی مدافعتی نظام مضبوط رہے ، اور انھیں جسمانی ورزش میں شامل کرنا بھی ضروری ہے۔

  • امریکا میں آنے والے طوفان میں ایک بچے کی تصویر کا عجیب واقعہ

    امریکا میں آنے والے طوفان میں ایک بچے کی تصویر کا عجیب واقعہ

    جارجیا: امریکی ریاست جارجیا میں گزشتہ ہفتے زبردست آندھی اور طوفان آیا تھا جس نے بڑے پیمانے پر تباہی مچا دی تھی، اور سیکڑوں گھروں کو شدید نقصان پہنچا تھا۔

    اسی دوران ایک عجیب واقعہ رونما ہوا، طوفان تھمنے کے بعد جمعے کے روز نیومن کے علاقے میں ایک خاتون ہولی کینر باہر نکلی ہوئی تھیں کہ ان کی نگاہ ایک جگہ پڑے ہوئے کچرے پر ٹھہر گئی۔

    طوفان کی وجہ سے جمع ہونے والے کاٹھ کباڑ میں خاتون کو بچے کی ایک تصویر نظر آئی، تصویر پرانی تھی، جسے دیکھ کر وہ اسے چھوڑ کر آگے نہ بڑھ سکیں، اور تصویر اٹھا کر رکھ لی۔

    خاتون نے مقامی میڈیا کو بتایا کہ یہ تصویر جیسے میرے ہی انتظار میں یہاں پڑی تھی، اس لیے میں اسے چھوڑ کر نہیں جا سکی، جب میں نے تصویر اٹھا کر دیکھی تو پتا چلا کہ یہ اپریل 1976 کی تھی اور بچے کا نام مارک ہارن تھا۔

    امریکا پر سیاہ آفت ٹوٹ پڑی

    خاتون نے کہا کہ میں تصویر گھر لے آئی، لیکن سمجھ نہیں آ رہا تھا کہ اس کا کرنا کیا ہے، اس لیے میں نے اسے اپنے فیس بک پیج اور ایک کمیونٹی پیج پر پوسٹ کر دیا، دیکھتے ہی دیکھتے تصویر بڑے پیمانے پر لوگ شیئر کرنے لگے۔

    ہولی کینر کے بیان کے مطابق فیس بک کے ذریعے آخر کار ایک خاتون سامنے آ گئیں جن کا کہنا تھا کہ وہ اس بچے کی ماں ہیں۔

    خاتون نے ہولی کینر کا شکریہ ادا کرتے ہوئے کہا میں اس تصویر کو دل و جان سے اپنے پاس رکھنا پسند کروں گی، میں نے یہ تصویر 44 برس قبل اپنے دیور اور دیورانی کو بھیجی تھی۔

    ہولی کینر نے بتایا کہ وہ تب سے تصویر والے بچے مارک ہارن کی بیٹی سے رابطے میں ہیں، اور تصویر کی واپسی کے لیے منصوبہ بنا رہے ہیں، اور میں بے چینی سے اس فیملی سے ملاقات کا انتظار کر رہی ہوں۔

  • امریکا پر سیاہ آفت ٹوٹ پڑی

    امریکا پر سیاہ آفت ٹوٹ پڑی

    الاباما: امریکی ریاستوں الاباما اور جارجیا میں آندھی نے وسیع پیمانے پر تباہی مچا دی ہے۔

    تفصیلات کے مطابق امریکی ریاستوں الاباما اور جارجیا میں اچانک پیدا ہونے والے ہوا کے بگولوں کی زد میں آ کر 5 افراد لقمہ اجل بن گئے۔

    قومی موسمیاتی سروس کا کہنا ہے کہ الاباما میں 7 مختلف مقامات پر جمعرات کو آندھی اور بگولوں نے تباہی مچائی، جمعے کو دیگر جنوبی ریاستوں کو بھی خطرہ لاحق ہے۔

    الاباما میں کال ہون کاؤنٹی پولیس چیف نے بتایا کہ بگولوں کی زد میں آتے ہوئے کم سے کم 5 اموات ہوئی ہیں، متعدد افراد زخمی ہو چکے ہیں، کئی مکانات، عمارتوں اور گاڑیوں کو بھی شدید نقصان پہنچا ہے۔

    امریکا میں ہزاروں کمسن بچے زیر حراست

    الاباما ایمرجنسی منیجمنٹ ایجنسی کے ڈائریکٹر کا کہنا تھا کہ طوفان نے سیکڑوں گھر تباہ کر دیے ہیں۔

    ریاست الاباما میں تباہی مچانے کے بعد آندھی نے جمعے کی صبح کو جارجیا کے شہر نیونن کا رخ کیا، جہاں اس نے بڑے پیمانے پر گھروں اور عمارتوں کو نقصان پہنچایا۔

    محکمہ موسمیات کے مطابق یہ آندھی طوفانوں کے ایک خطرناک سسٹم کا حصہ تھا، جو الاباما کے شہر برمنگھم کے جنوب میں منڈلا رہا ہے۔ یہ طوفان ایک لانگ ٹریک سُپر سیل ہے جس نے وسطی الاباما کی کئی کاؤنٹیز میں متعدد آندھیاں پیدا کیں۔

    اس سسٹم نے امریکی ریاست تک پہنچنے سے قبل 100 میل کی رفتار سے سفر کیا تھا، ماہرین موسمیات کا کہنا ہے کہ نامساعد موسمی حالات سے تقریباً 55 لاکھ افراد متاثر ہوں گے۔

    رپورٹس کے مطابق آندھی کے باعث پیل ہام شہر میں 30 تا 50 عمارتیں متاثر ہوئیں، مکانات کی چھتیں اڑ گئیں، درخت اور بجلی کے کھمبے اکھڑ گئے۔

  • امریکا: سینیٹ میں واضح برتری کے لیے نظریں ریاست جارجیا پر

    امریکا: سینیٹ میں واضح برتری کے لیے نظریں ریاست جارجیا پر

    واشنگٹن: امریکی سینیٹ پر کنٹرول کی جنگ شروع ہو گئی ہے، ڈیموکریٹس اور ری پبلکنز کی نظریں ریاست جارجیا پر ٹک گئیں۔

    امریکی میڈیا کے مطابق ریاست جارجیا میں 5 جنوری کو سینیٹ کی 2 نشستوں پر دوبارہ الیکشن ہوگا، نومبر کے سینیٹ الیکشن میں کوئی امیدوار واضح برتری حاصل نہیں کر سکا تھا۔

    سابق صدر اوباما نے ڈیموکریٹس امیدوارں کی جیت کے لیے آن لائن اجلاس میں شرکت کی، انھوں خطاب میں کہا بائیڈن انتظامیہ کو وعدے پورے کرنے کے لیے جارجیا کی جیت ضروری ہے۔

    دوسری طرف نائب صدر مائیک پنس نے ری پبلکنز امیدواروں کی حمایت میں ریلی میں شرکت کی، خطاب میں انھوں نے کہا امریکا کو بچانے کے لیے جارجیا کی نشستیں جیتنی ہوں گی۔

    جوبائیڈن کو خفیہ اداروں کی بریفنگ شروع

    واضح رہے کہ سینیٹ میں اس وقت ری پبلکنز کے حامی 50 اور ڈیموکریٹس کے حامی 48 سینیٹرز ہیں۔

    ادھر نومنتخب امریکی صدر جوبائیڈن کو قومی سلامتی کے معاملات پر روزانہ بریفنگ کا آغاز ہو گیا ہے۔ امریکی میڈیا کے مطابق جوبائیڈن کو خفیہ اداروں نے بریفنگ دینا شروع کر دی ہے، خفیہ ادارے اقتدار کی منتقلی کے دوران نو منتخب صدر کو حالات سے آگاہ رکھتے ہیں۔

    جوبائیڈن نے ایران کے ساتھ ایٹمی معاہدے کو پھر سے بحال کرنے کا اشارہ دیدیا

    دوسری طرف امریکی صدر ٹرمپ بدستور 2020 کے امریکی صدارتی انتخابات کے نتائج سے لڑ رہے ہیں، وہ ان نتائج کو تسلیم کرنے کے لیے تیار نہیں ہیں جس میں انھیں زبردست شکست کا سامنا کرنا پڑا ہے۔