Tag: جارج فلائیڈ

ایڈورڈ کولسٹن کی شخصیت کا شاید بُت اسی روز ٹوٹ گیا تھا جب برطانیہ میں اس کی سواںح عمری شایع ہوئی تھی۔

مصنّف نے تاریخ کے اس کردار کی زندگی، ذریعۂ معاش اور اس کے ایک ‘غیر انسانی فعل’ کا تذکرہ کرتے ہوئے لکھا کہ کولسٹن کی اصل تصویر پیش کرنے کے لیے کچھ باتوں کا پس منظر بھی ضرور جاننا چاہیے، جس کے بعد کولسٹن کے لیے مقامی لوگوں کے خیالات میں تبدیلی آنا شروع ہوئی اور اس کی شخصیت متنازع ہوگئی۔

ایڈورڈ کولسٹن کون تھا؟
(Bristol) برطانیہ کا ایک رہائشی علاقہ ہے جس کی مجموعی آبادی آج چار لاکھ سے زائد نفوس پر مشتمل ہے۔ کولسٹن 1636ء میں برسٹل میں پیدا ہوا اور زندگی کی 84 بہاریں‌ دیکھنے کے بعد 1721ء میں دنیا سے رخصت ہوگیا۔

اس کا تعلق ایک مال دار تجارت پیشہ خاندان سے تھا۔ وہ بھی کاروبار کی طرف مائل ہوا اور قسمت کی یاوری سے خود کو جلد مستحکم کرلیا۔ اس نے کپڑا اسپین، پرتگال، اٹلی اور افریقا بھیجنا شروع کیا اور وہاں سے مختلف مصنوعات منگوا کر برطانیہ میں‌ فروخت کرنے لگا۔ اسی دوران وہ "رائل افریقی کمپنی” کے لیے خدمات انجام دینے لگا جو دراصل مغربی افریقا سے سیاہ فاموں کو امریکا لاکر ان کی تجارت کرتی تھی۔

یہ کمپنی عورتوں اور بچّوں سمیت سیاہ فام افراد کو کیریبین کے جزائر میں سفید فام کاروباری شخصیات کو بیچ کر ‘دام کھرے’ کر لیتی۔ اس زمانے میں‌ آج کے مہذّب اور ترقّی یافتہ ممالک میں غلام رکھنا اور ان کی خریدوفروخت معیوب تھی اور نہ ہی اسے غیرانسانی فعل تصوّر کیا جاتا تھا۔ کولسٹن نے بھی انسانوں کی اس خرید و فروخت میں خوب دولت کمائی۔

سترہویں صدی عیسوی میں کولسٹن نے افریقا سے سیاہ فام عورتوں اور بچّوں سمیت کئی انسانوں کو ان کے گھر بار اور اپنوں سے دور کرکے انھیں‌ جبری مشقّت اور اپنے آقاؤں کا ظلم و ستم سہنے پر مجبور کردیا۔

کولسٹن کو یاد رکھنے کی کیا وجہ تھی؟
اس رئیسِ شہر نے اپنی کمائی کا بڑا حصّہ فلاح و بہبود کے کام پر لگایا اور برسٹل شہر کے علاوہ لندن میں اسکول اور اسپتال بنوائے۔ کہتے ہیں کہ اس نے بے گھر افراد کو چھت فراہم کی اور غریبوں‌ کی مدد کی۔

اس کی انہی خدمات کو دیکھتے ہوئے 1895ء میں کولسٹن کی یادگار کے طور پر برسٹل میں‌ اس کا 18 فٹ لمبا مجسمہ نصب کیا گیا تھا جب کہ شہر میں آج بھی اس سے کئی سڑکیں اور عمارتیں منسوب ہیں اور چھوٹے بڑے مجسمے بھی شاہ راہوں‌ اور مختلف عمارتوں کے باہر دیکھے جاسکتے ہیں۔ کولسٹن اپنی دولت اور اثر رسوخ کے سبب رکنِ پارلیمان بھی رہا اور اسی لیے وہ ایک معزّر اور قابلِ احترام شخص تھا۔

کولسٹن کی شخصیت متنازع کیوں؟
کئی دہائیوں تک برسٹل کے باسی اسے غریب پرور، رحم دل اور اپنا محسن سمجھتے رہے، لیکن اس امیر تاجر کی اوّلین سوانح عمری نے انھیں خاصا بددل اور متنفر کردیا۔ اسے انسان دوست نہیں‌ بلکہ ظالم کہا جانے لگا۔

1990ء میں یہ کہا جانے لگا کہ انسانوں‌ کی خرید و فروخت میں‌ ملوّث کولسٹن قابلِ احترام نہیں‌ ہے اور شہر میں‌ موجود اس کی یادگاروں کو ہٹانا ہوگا جب کہ درس گاہوں اور دیگر عمارتوں کو اس سے منسوب نہ رکھا جائے۔

عام لوگ ہی نہیں برطانیہ کی سنجیدہ اور اہم شخصیات بھی اسے بے شمار انسانوں کا خون بہانے اور ان پر ظلم کرنے کا ذمہ دار قرار دیتے ہیں۔ ان کا کہنا ہے کہ برطانیہ کو تاریخ کے تلخ حقائق کا سامنا کرنا ہو گا تاکہ ہم نسل پرستی کا خاتمہ کر سکیں گے جو باعثِ شرم ہے۔

کولسٹن سے متعلق مختلف مطالبات کرتے ہوئے احتجاجی روش اپنانے کا سلسلہ مختلف برسوں میں جاری رہا ہے، لیکن 2020ء میں‌ ایڈورڈ کولسٹن کا پیتل کا تاریخی مجسمہ ایک احتجاجی مظاہرے کے دوران رسیوں سے باندھ کر شہر کی سڑکوں پر گھسیٹا گیا اور بعد میں اس مجسمے کو برسٹل کی بندرگاہ پر پانی میں غرق کردیا گیا۔

مظاہرین کا مطالبہ تھا کہ نسل پرستی کا خاتمہ یقینی بنایا جائے جس کے لیے ایسے گھناؤنے کاروبار میں ملوث شخصیات کو معاشرے میں عزّت اور احترام دینے کے بجائے ان کا اصل چہرہ سامنے لانے کی بھی ضرورت ہے۔

یہ سب اچانک کیسے ہوا؟
یہ احتجاجی مظاہرہ دراصل سیاہ فام امریکی شہری جارج فلوئیڈ کی سفید فام پولیس افسر کے ہاتھوں ہلاکت اور نسلی امتیاز کے خلاف شروع ہوا تھا جس کے دوران مظاہرین نے ایڈورڈ کولسٹن سے اپنی نفرت کا اظہار اس طرح‌ کیا۔

امریکا کے اُس شہری کی جلد کا رنگ کالا تھا اور وہ غیرمسلح تھا۔ دنیا اُسے مظلوم کہتی ہے، کیوں کہ جس وقت اس کی موت واقع ہوئی، وہ ایک پولیس افسر کی گرفت میں‌ تھا۔ مکمل طور پر بے بس اور وہ وہاں‌ سے بھاگ بھی نہیں‌ سکتا تھا۔ اس کے گرد دوسرے پولیس اہل کار بھی موجود تھے۔

25 مئی 2020ء کو، اس سیاہ فام، غیر مسلح شخص کو ایک سفید فام پولیس افسر نے ‘موت کے گھاٹ’ اتار دیا۔ اس کا نام جارج فلوئیڈ تھا جسے ایک سڑک پر پولیس افسر نے ‘قابو’ کیا اور پھر اس کی گردن پر اپنا گھٹنا رکھ دیا۔ 46 سالہ جارج یہ بوجھ برداشت نہ کرسکا اور اس نے دَم توڑ دیا۔

پولیس کی اس بربریت اور سفاکی کی ویڈیو منظرِ عام پر آئی تو لوگوں کو معلوم ہوا کہ سڑک پر تکلیف دہ حالت میں پڑا ہوا سیاہ فام شخص اور وہاں موجود افراد اُس پولیس افسر کو گردن پر دباؤ کم کرنے کے لیے کہہ رہے ہیں۔

جارج کہہ رہا تھا، ’میں سانس نہیں لے پا رہا ہوں۔‘ لیکن اس کی یہ آواز پولیس افسر کو اپنے ارادے سے باز نہیں‌ رکھ سکی اور جارج فلوئیڈ مر گیا۔

اس سیاہ فام کے آخری جملے نے امریکیوں کو غم و غصّے اور احتجاج کی طرف دھکیل دیا۔ اس دردناک منظر کو دیکھنے والے امریکیوں اور دنیا کے مختلف ممالک کے شہریوں نے ‘بلیک لائیوز میٹر’ کا نعرہ بلند کیا اور عظیم ریاست اور سپر پاور ہونے کے دعوے دار امریکا کو اس غیر انسانی سلوک اور ناانصافی پر مطعون کرتے ہوئے جارج کے لیے انصاف کا مطالبہ کردیا۔

امریکا کی تاریخ میں‌ 2020ء کا یہ واقعہ سیاہ فام افراد سے نفرت، تعصب اور ظلم و ناانصافی کی بدترین مثال کے طور پر یاد رکھا جائے گا۔

گو کہ امریکا میں‌ کسی سیاہ فام کی ہجوم یا پولیس کے ہاتھوں ہلاکت کا یہ پہلا واقعہ نہیں، لیکن اس واقعے نے کووڈ 19 کی وبا کے دوران لوگوں‌ کو اس کے خلاف اجتماع اور سڑکوں پر مظاہروں پر مجبور کردیا تھا۔ ان میں‌ سفید فام امریکی بھی شامل تھے۔

سیاہ فام امریکا کی کُل آبادی کا 13 فی صد بتائے جاتے ہیں۔ ان کے اجداد افریقی تھے جنھوں نے غلام کی حیثیت سے اس سرزمین پر قدم رکھا تھا۔ آج بھی امریکا میں غلاموں‌ کی یہ اولادیں‌ رہائش، تعلیم اور روزگار کے حوالے سے بدترین مسائل سے دوچار ہیں۔ انھیں‌ تعصب اور نسل پرستی کے عفریت کا سامنا ہے جس کے خلاف کئی تنظیمیں سرگرمِ عمل ہیں، لیکن تارکینِ وطن سیاہ فام افراد پر پولیس تشدد اور ان کی ہلاکتوں کا سلسلہ جاری ہے۔

2020ء میں‌ نسل پرستی کے خلاف ‘بلیک لائیوز میٹر’ وہ بڑی تحریک تھی جس نے کرونا وائرس سے خوف زدہ انسانوں دنیا بھر میں اکٹھا ہوکر اس کے خلاف احتجاج پر اکسایا۔

امریکا میں نسل پرستی، سیاہ فام افراد سے امتیازی سلوک اور پولیس کے ہاتھوں قتل کے ایسے واقعات کے خلاف سڑکوں پر آنے والوں کا کہنا تھاکہ صدیوں پرانی عصبیت اور مخصوص ذہنیت کے نتیجے میں پروان چڑھنے والی سوچ نے ایک اور نہتّے اور بے بس انسان سے اس کی زندگی چھین لی۔

اس واقعے کے خلاف آسٹریلیا، برطانیہ، فرانس اور ہالینڈ میں بھی احتجاجی اجتماعات ہوئے، اور‌ شرکا نے نسلی مساوات اور سیاہ فام امریکیوں‌ کے حق میں‌ آواز بلند کی اور بلیک لائیوز میٹر کی تحریک نے زور پکڑا۔ امریکا میں‌ مظاہرین جائے وقوع پر جمع ہوئے اور جارج کے آخری الفاظ دہراتے رہے۔

اس برس انتخابات نے ثابت کیا کہ ڈونلڈ ٹرمپ بھی امریکی عوام کو محبوب نہیں‌ رہے اور انھیں وائٹ ہاؤس سے رخصت ہونا پڑے گا، لیکن اس سے پہلے انھوں نے احتجاجی مظاہرین کو بھی اپنے سخت اور متنازع بیان کی وجہ سے مایوس اور ناراض کیا تھا۔

ڈونلڈ ٹرمپ افریقی اور جنوبی امریکی ممالک کے تارکینِ وطن کے بارے میں اشتعال انگیز کلمات ادا کرنے سے خود کو نہیں روک سکے تھے جس نے اس بحث کو بھی جنم دیا کہ کیا وہ نسل پرست ہیں؟

گو سیاہ فاموں کے حق میں مظاہرے امریکا میں‌ پہلے بھی ہوتے رہے ہیں، لیکن اس گزرتے ہوئے سال میں‌ جارج فلوئیڈ کی موت نے ایک بار پھر امریکی معاشرے کو جھنجھوڑ کر رکھ دیا اور نسلی امتیاز کے خلاف اس کے آخری الفاظ اور اس کی فریاد ایک نعرہ بن گئی۔