اسلام آباد: سیلولر کمپنی جاز کے سی ای او نے کرونا وائرس ریلیف کے سلسلے میں بڑا اعلان کر دیا ہے۔
اے آر وائی نیوز کے پروگرام الیونتھ آور میں گفتگو کرتے ہوئے جاز کمپنی کے سی ای او عامر ابراہیم نے کہا کہ کرونا ریلیف کے لیے 1.2 بلین روپے (1 ارب 20 کروڑ) مختص کیے گئے ہیں، یہ رقم آیندہ 3 ہفتوں میں خرچ کی جائے گی۔
انھوں نے بتایا کہ ہم اپنی سروسز کو سبسڈائز کریں گے، اسپتالوں کو کالز فری کر رہے ہیں، کئی پیکجز سستے کریں گے اور بہت سے پیکجز فری کر دیں گے، اسپتالوں کو طبی حفاظتی سامان بھی فراہم کیا جائے گا، شوکت خانم اسپتال کے ساتھ ایک ایم او یو سائن کیا ہے، ایدھی فاؤنڈیشن کے ساتھ راشن سے متعلق گفتگو جاری ہے، ایسے ہی دو تین اور بھی ادارے ہیں جن سے بات چیت جاری ہے۔
عامر ابراہیم نے پروگرام میں کہا کہ پاکستان میں 70 ملین انٹرنیٹ یوزر ہیں، یوزر بڑھنے کی وجہ سے ہماری انٹرنیٹ سپلائی پر ٹریفک بڑھا ہے، حکومت اسپیکٹرم ریلیز کر دے تو انٹرنیٹ ٹریفک کنٹرول کر سکیں گے، پاکستان میں 16 کروڑ سمز ہیں اور اندازے کے مطابق 10 کروڑ موبائل صارفین ہیں، تقریباً 7 کروڑ موبائل انٹرنیٹ صارفین ہیں۔ انھوں نے کہا کہ پاکستان میں انٹرنیٹ اور کالنگ ریٹ دنیا سے سستے ہیں، جب کہ اسمارٹ فون ریٹ دنیا سے مہنگے ہیں۔
کرونا وائرس، پاکستان نے متاثرہ افراد اور ملاقاتیوں کی موبائل ٹریکنگ شروع کردی
سی ای او جاز کا کہنا تھا کہ ورک فرام ہوم، ایجوکیٹ فرام ہوم کا رحجان بڑھ رہا ہے، دونوں چیزوں میں اہم مسئلہ انٹرنیٹ اور ڈیوائس کا آ رہا ہے، کرونا کے ساتھ ہمیں روزگار کو بھی دیکھنا ہوگا، اس میں کوئی شک نہیں کہ کرونا کے بعد بے روزگاری بڑھے گی، کرونا وبا کی وجہ سے ہمارا لائف اسٹائل تبدیل ہوگا۔
