کراچی : جامعہ کراچی میں دھماکے سے قبل مبینہ خودکش خاتون کی ایک اور ویڈیو سامنے آگئی، جس میں دیکھایا گیا ہے کہ خاتون مبینہ طور پر آخری بار ہوٹل میں اپنے شوہر سے ملنے گئی تھی۔
تفصیلات کے مطابق جامعہ کراچی خودکش دھماکے کی تحقیقات جاری ہیں، دھماکے سے قبل خودکش حملہ آورخاتون کی ایک اور ویڈیو سامنے آگئی۔
ویڈیو شارع فیصل پرمقامی ہوٹل کی ہے، مبینہ طور پر خاتون آخری مرتبہ ہوٹل اپنے شوہر سے ملنے گئی تھی۔
ویڈیو میں خاتون کو دو بچوں کے ہمراہ دیکھا جاسکتا ہے، خاتون نے اپنے کاندھے پر کالا بیگ بھی لٹکا رکھا تھا۔
تفتیشی ذرائع کا کہنا ہے کہ یونیورسٹی میں دھماکے کے دوران اسی بیگ کو استعمال کیاگیا، خاتون بچوں کو شوہر کے حوالے کرنے آئی تھی۔
ذرائع نے بتایا کہ خاتون کے شوہر کی گرفتاری کے لیے اسی جگہ چھاپہ ماراگیا، ہوٹل ریکارڈکے مطابق شوہر اور افتخارنامی شخص کی انٹری تھی۔
یاد رہے جامعہ کراچی میں ہونے والے خودکش دھماکا کی خصوصی ویڈیوز اور تصاویر بھی سامنے آئی تھیں، جس میں دیکھا گیا تھا کہ خودکش بمبار خاتون شاری بلوچ اور شوہر ہیبتان بلوچ نے دھماکے سے قبل شادی کی سالگرہ منائی، سالگرہ کی وڈیو میں دونوں کو گنگناتے، ہنستے اور غبارے پھاڑتے دیکھا جاسکتا تھا۔
خاتون بمبار شاری بلوچ دھماکے سے ایک روز قبل بھی جائے واردات پر موجود تھی، انھیں ٹھیک 2 بج کر 8 منٹ پر گاڑی کو کنفیوشز انسٹی ٹیوٹ میں داخل ہوتے دیکھا گیا تاہم اس نے دھماکا نہیں کیا۔
