کراچی : سندھ حکومت نے جانوروں کی قربانی کے لیے جگہیں مختص کردیں اور کہا عوامی مقامات یا گلیوں میں اجتماعی قربانی نہیں کی جاسکے گی، طے شدہ مقامات کے علاوہ قربانی کرنے پر کارروائی کی جائے گی۔
تفصیلات کے مطابق محکمہ بلدیات سندھ نے قربانی کے حوالے سے نوٹیفکیشن جاری کردیا، جس کے تحت شہر میں عوامی مقامات یاگلیوں میں اجتماعی قربانی نہیں کی جاسکے گی۔
نوٹیفکیشن میں کہا گیا ہے کہ سندھ حکومت نےجانوروں کی قربانی کے لیے جگہیں مختص کردیں، این سی او سی اجلاس کے تناظر میں سڑکوں اورگلیوں میں قربانی کی حوصلہ شکنی کرنی ہے۔
محکمہ بلدیات سندھ کا کہنا ہے کہ ہر یوسی میں اجتماعی قربانی کے لیے مخصوص مقامات طے کیے گئے ہیں، مختص مقامات پرایس او پی اور حفاظتی انتظامات کے قربانی کی جاسکے گی۔
نوٹیفکیشن کے مطابق طے شدہ مقامات کے علاوہ قربانی کرنے پر کارروائی کی جائے گی جبکہ تمام اضلاع میں قربانی کےمقامات کی فہرست جاری کردی گئی ہے۔
